Hosea 1 - Yupik Bible

¹ Waniwa una qanerkiuraq Atanrem tunellra Hosea-mun Beeri-m qetunraanun, Uzziah-m, Jotham-aam, Ahaz-am, Hezekiah-m-llu angayuqaullrata nalliini Judah-mi, Jeroboam-aaq-llu Jehoash-aam qetunraa angayuqauluni Israel-aami.

Hosea-m Nulirra Irniari-llu

² Ataneq ciuqlirmek qanllermini Israel-aamun Hosea-kun, waten qanertuq Hosea-mun, “Ayagluten kassuucartua; nulian piciunrilnguuciquq, irniaten-llu elliitun ayuqeciqut. Tuacetun wiinga yum'a unitellruatnga piciunrirluteng-llu.”

³ Tua-i Hosea kassuutuq arnamek Gomer-aamek at'legmek, Diblaim-aam panianek. Yuurtellran kinguani irniangeqarraarutiignek, qetunraagnek,

⁴ Ataneq Hosea-mun qanertuq, “Acirru Jezreel-amek, ak'aningailan anucimirqecetaallerkaqa Israel-aam angayuqra ciuliaran Jehu-m tuqurqillra yugnek pitekluku Jezreel-ami. Taqevkaqataranka Jehu-m kinguvri angayuqaunermek.

⁵ Taum-llu nalliini Jezreel-am Kuignayuani Israel-aam anguyagcuutai piunrirciqanka.”

⁶ Gomer-aaq irninqigtuq — maa-i paningluni. Ataneq Hosea-mun qanertuq, “Acirru ‘Kenkumanrilnguq’, tua-i-wa Israel-aam yui kenkenrirciqngamki wall'u au͡g'arisngaunaki.

⁷ Judah-m tau͡gaam yui kenkeciqanka. Wiinga, Ataneq Agayutiitni, anirturciqanka, tau͡gaam anguyagkun pingaitanka — nuussitgun, urluverteggun pitegcautetgun wall'u horse-aatgun, horse-aatgun-llu atulalriatgun.”

⁸ Gomer-aam panini aamartenriamiu, cali qinganqigtuq allamek-llu qetunrangenqiggluni.

⁹ Ataneq qanertuq Hosea-mun, “Acirru ‘Yuk'enritanka,’ tua-i-wa Israel-aam yui yuk'enrilamki, wiinga-llu ellaita Agayutkevkenii.”

Israel-aaq Ayuqucillermitun Utercecimaqatartuq

¹⁰ Israel-aam yui imarpiim qau͡gyaitun ayuqliriciqut, amllerem ugaani naaqumasciiganateng cuqcimasciiganateng-llu. Maa-i Agayun ellaitnun qanlartuq, “Yuk'enritamci,” tau͡gaam erneq agiirtuq qanllerkaa ellaitnun, “Elpeci irniaqaaci unguvalriim Agayutem!”

¹¹ Judah-m yui Israel-aam-llu yui ataam ilaksaguciiqut. Cucuklirciqut-llu ataucimek ciuliqagtekameggnek, ataam-llu amllericiqut tukuurrluteng-llu nunameggni; Aa-ang, erenra Jezreel-am angelriaruciquq!