Ecclesiastes 1 - Yupik Bible

Unguva Catngunrituq

¹ Ukut qaneryaraqai Umyuartulriim qaneryariurtem, David-aam qetunraan, angayuqaullrem Jerusalem-aami.

² Caunrituq, caunrituq, qanertuq Umyuartulria. Unguva caunrituq, tamarmi caunrituq.

³ Camek yuk unangelarta caliluni makugtellermikun?

⁴ Kinguveqellriit yuulartut tuamta-llu catairulluteng, tau͡gken ellarpak cakaniyuunani.

⁵ Akerta pit'elartuq tevirluni-llu, ataam-llu cali uterrluni pit'ellerkaminun.

⁶ Anuqa anuqlilartuq ungalatmun, tuamta-llu uivluni negetmun— uivaarturluni ataam utertaqluni.

⁷ Kuiget tamarmeng qurrlulartut imarpigmun, tau͡gken imarpik muiyuunani. Meq utertelartuq kuiget ayagnillratnun, tua-i-llu cali ayanqiggluni qurrlullermitun-llu cali pinqiggluni.

⁸ Iimteggun canek tangaagurangramta tangelnguyuitukut, ciutemteggun-llu niiqurangramta niitellnguyuunata.

⁹ Ca imna ciungani pilleq cali piciquq. Ca-llu ciungani pimalleq cali pimaarkauluni. Ellarpiim ilua nutaraulriamek pitaituq.

¹⁰ Qanerciqsaaqut-llu, “Atam waniwa nutaraq!” Tau͡gken ak'a tauna ciungani pillruluni, avani ciuqvani yuurpailemta.

¹¹ Cat pilallret kingunemten̄i umyuaqestaitut, kia-llu imum umyuaqngaunaki cat piarkat waken ayagluki ca tayima tekilluku.

Umyuartulriim Yuucimini Atullri

¹² Wiinga, Umyuartulriami, angayuqaullruunga tamalkuan Israel-aamun Jerusalem-aami.

¹³ Umyuangellruunga cumigglua yuvrirluki elitnaurnaluki cat tamalkuita taqumalriit maani ellarpagmi. Wiinga pillerkiullruunga umyuartutacirramtun yuvrirnaluki elitnaurluki-llu cat piurallret maani ellarpagmi. Agayun-llu elliillrulliniuq assiitellriamek tekitarkamten̄ek.

¹⁴ Tangellruaqa cam tamarmi piurallra maani ellarpagmi, qanrutamken, caunritut. Anuqmek malirqeralriatun ayuquq.

¹⁵ Nalqigcesciigatan ca perelria; naaqisciigatuten catailngurnek.

¹⁶ Wangnek qanrutua, “Umyuarturiunga, umyuartunrurrlua allani ciumni atanirturillerni Jerusalem-aami. Ayuqucingumalukek umyuartuyaraq elisngayaraq-llu.”

¹⁷ Cumigglua elicullruaqa ayuqucia umyuartuyaram cali-llu usviilliqsaram. Tau͡gaam nallunri'rqa tamana-llu ayuqelliniuq anuqmek malirqeralriatun.

¹⁸ Umyuarturiinallren maliggluku uitacurlautekaten amllericiqut; nallunririinaquvet-llu cat angniilutkaten amlleriluteng.