Ibrani 1 - Timur Liriny

Ratu natanuk ber tomwatar nalyole Anaky 1:1-4

¹ Wangur mir kateman! Luryain e, Ratu natanuk lain yadin ber empninrar nusninrar. I natanuk ber sir nor matan ribun nalyole nabyar.

² Nempa na ler famudi ye Ratu natanuk ber kit nalyole Anaky lo. Ma luryain e, Ratu nose langit ma saryamprene numur ni mparetar nalyole Anaky a nbal. Ma I ntetak ma nal kuase ber Anaky ma nonri safe-safe monuk a ne.

³ Ma Anaky a ne ma nfatutu Ratu Ni kuase ma nlie nlengan. Ma Anaky a ne Ni adat ma Ni kuase feleles farlan Ratu nbal. Ma nor Ni ngribatnir ma nfen ber kuase ne, I najake saryamprene ye nor ni mparetar ma nangafel. Ma lama I nalin tomwatar nof nir salar, I nfangat far surga. Ne I nti namtoran Ratu ma Ni kuase ma nlie nlengan a ne seriny fian ma radu a rfarete.

⁴ Mpa Ratu Anaky a ne silai I nlengan nof malaektar. Ma Ratu nafneni ngare na I ma nangafel a nlengan nof ngare ma nal ber malaektar a ne.

Ratu Anaky Ni kuase nlie nlengan nof malaektar 1:5-14

⁵ Ratu nfalak ber Anaky farye: “Ko ye Yakw Anaky; ma nof lere ye Yakw kweluk Ame ma ber Ko.” Ma Ratu nfalak a nbal ber Anaky feti, “Keta kweluk Ame ma ber Ko, ma keta Ko mweluk Anakw.” Ma kit tafai feti to lain sa nbal ma Ratu nfalak farane ber Ni malaektar.

⁶ Ma kit tafai feti Ratu Anaky a ne ma neluk keyai ber tomwatar monuk na saryamprene. Noak ma Ratu nsiduk Anaky keyai ne ma nma saryamprene, I nfalak farye: “Ningw malaektar monuk ka rsatngur ber Anakw a ne.”

⁷ Ma Ratu nfalak na malaektar farye: “Yakw kose Ningw malaektar a ne farlan mnaur uman, ma Ningw mangkaryayar e, farlan au ma nfolur.”

⁸ Nempa na Anaky e, I nfalak farye: “Yakw Anaky Ko, Ko ye Ratu ma keta mfwarete terik ma dedesar! Ma Ko mfwarete na Nim ain farete mor malonri.

⁹ Ko mkwamis tomwatar ma rose kabain malondyar ma to mpweang tomwatar ma rose kabain yatkar. Iane nwayat ma kweluk Nim Ratu ma kfwair Ko, nema tomwatar ralang Ko, ma dalamy a nsenang, ma dalamy senange ne nlengan nof tbwarim monuk.”

¹⁰ Ratu nfalak ber Anaky a nbal: “Ko ye Mangnrure, Ko ye ma luryain e mose langit, ma saryamprene ye koko Ko a mose nbal.

¹¹ Safe-safe monuk a ne keta rlie, ma keta rayatak farlan rabtyar ma rayatak lo, nempa keta Ko e, mumin dedesar.

¹² Ma keta Ko myebas langit ma saryamprene ma rayatak a ne, farlan ma mlulun rabtyar ma rayatak a ne ma myebas sir. Ma keta mlikur ma mufbweberi safe-safe monuk ma rayatak a ne. Nempa Ko e mwon dedesar, ma mworip terik ma dedesar.”

¹³ Ratu nfalak ber Anaky farye: “Mumtoran seringw fian ye, terik ma kose ma Nim muswar rsatngur ber Ko.” Ma kit tafai feti to lain sa nbal ma Ratu nfalak farane ber Ni malaektar.

¹⁴ Mpa malaektar monuk a ne, iane smwangtar ma rlangun Ratu. Ma Ratu nsiduk sir ma rtulung tomwatar ma keta nfair sir a ne.