Rut 1 - ALLAH WENE

Hun Elimelekh uhe malik men suburu oboken o Moab libag ane

¹ Indam ap suwon hakim inap arimanowen Israel inap fet enesug latfag li itano Kanaan kinang fam suburu obok lahibag. Lahibagma ap misig uhe men umalikisi ap umalik piren men o Betlehem Yehuda kinang famen wilip atlug o Moab kinang fam libareg ap pohon hag toho welatfag.

² Ap libahon ino unuk Elimelekh, uhe unuk te Naomi, umalikisi piren itano ununuk te Mahlon men Kilyon men it itano ununggul unuk Efrata inap o Betlehem yug toho welatfag angge famen suburu oboken o Moab libareg welatfag.

³ Weregman eneg Elimelekh ino war atfagma uhe Naomi umalikisi piren itano men wereg latfag.

⁴ Wereg lit umalikisi piren itanowen Moab hiyap hilibag. Hilibahon itano misig unuk Rut, misig unuk Orpa hilibareg weregman mo numen libag.

⁵ Mo numen welatfareg Mahlon men Kilyon men oho war atfagma inisinga Naomi ino amu eneg yuwog wereg latfag.

Naomi iyamalhe Rut men o Betlehem suhuloho watfag ane

⁶ O Moab welatfareg hol harukmen Ninikni Allahn umalikisi Israel inap indi isaruk lit suburu og isarisi urukmu hol hibareg Naomi ino iyamalhomi menen enesum tug tibareg o Moab welatfag ambeg embeselug

⁷ Naomi ibam kinang Yehuda fam lul ulug kalemma laruk lit

⁸ Naomi inowen iyamalhomi piren itano unubam te, ”Naholani, hinisingasi inibam man-man suhuloho lalihip! Hiren an men henehunsi war atuson itano men hinindi nenesug latikip hag toho Nikni Allahn oho hit indi henesug laruhu.

⁹ Nikni Allahn hit let heneptukmu henehunsi hilahupteg hinibam man-man yuwag toho welamuhup,” ulug mako pug toho hi eneptukmen it piren itanowen enele hum toho uba yatuk latfag.

¹⁰ Uba yatuk lit it piren itanowen iniyamalhe fam, ”Nit suhuloho lul fug, hat men ambiyeg hori wereg ambeg lul,” ulug hiyag itfagma

¹¹ Naomi inowen, ”Naholani, nungge fahet an men ambiyeg lul? Hinibam man-man lalihip. Anden ap umalik hit henehunsi amuhubon eke indag enebihi ha fug teg lahireg

¹² hinibam suhuloho lalihip. An nebe mondabi sabal teg lahireg ap eke wa fug teg lahi. An nebe tuhum teg lalereg hahen yoho hubanggo ap helele halug malik ap angge indag enepleyon itano

¹³ hiren nangno eneptukmen nangginoho folo-folo su alep? Amusun toho nangno eneptuk lit ap winon hila fug angge welalep? Naholani, ambiyeg lul fug! Nikni Allahn an nubam alem angginon emberisi angge re ambiyeg lulteg andet hiret siyag toho welamuhuk tohon lalihip!” ulug hiyag isibag.

¹⁴ Hiyag isibagma it itanowen enele hi roho uba yatuk lit Orpa inowen nibam suhuloho lamin ulug iyamalhe mako pug toho hi ribagma Rut ino hat men ambiyeg lul ulug Naomi iraham pok atfag.

¹⁵ Pok atfagma Naomi inowen, ”Hat hehe honori inibam nunumba ulug wel eneptukon wereg ambeg lahama har oho hehe ombolim lamihin,” ibagma

¹⁶ Rut inowen, ”Haren te, ’An numbahalug hibam lamihin,’ ulug hele hine roho an nubam imihin fug. Hat kema lahun halug an oho ambiyeg lahuk, hat nohoruk laruhun ambeg an oho nohoruk laruhuk, hat hori oho an nori amuhup, Allah haren tohon ino anden oho wel turuk laruhuk,

¹⁷ hat war aruhun ambeg an oho war aruhukmu kinangma sal nabuhup. Nit nenebe pirenet sebe roho weregman eneg war atuk lit nenemu-nenemu amuhuk. Nele si ane ihi halug Ninikni Allahn alem angginon an nubam umbuhu,” ibag.

¹⁸ Rut inowen ambiyeg lul ulug ele ine atukmu yet hibareg Naomiyen hebeloho ubam ele ibag fug.

¹⁹ Ele ibag fureg it enebe pirenet o Betlehem libag. Libareg o pumbuk ino kurukmu yet isibareg Betlehem inaben enele yante-hante uruk lit hiyaben, ”He Naomi ino waha ano?” uruk latfag.

²⁰ Uruk latfagma Naomi inowen hiyag isaruk lit, ”An nunuk Naomi uk fug, Allah ine anggolowon inowen an nindi oukap naptisimu nunuk Ouken suwal nabuhup.

²¹ Tuman laruk lit an ninggikmu anggolo walug larikik angge famen waharuk lit an ninggikmu eleg angge Ninikni Allahn hondog naplug waha. At ine anggolowon inowen an nele ying naptuk lit alem angginon nubam emberisimu nungge fahet an nunuk Naomi uruk lahep?” ibag.

²² Ari roho hiyag isil laruk lit Naomi men iyamalhe Moab hiyap Rut ino men o Moab kinang embeselug o Betlehem inap arimanowen suburu roti anggen paltukon ket ak turukmu watfag.