OBAJA 1 - ALLAH WENE

Edom inap unubam teko lahu ane fahet ibag ane

¹ Ninikni Allahn teko lahu ane fahet hun Obaja hiyag utuk latfag ane tuma hahareg: Ninikni Allah ineyon inowen Edom inap fahet ele urukmu holtukuk. Ap o pumbuk obog tohowen holukag ulug amingmingangge eke monde ferisimu hiyag isil laruk lit, ”Edom inap men tog abulen maniyek!” ulug hiyag isarisi.

² Allahn Edom inap unubam ele irisiyon tu, ”Anden hit o pumbuk winon obog toho enepma welamuhup ulug hunumbahakukmu ap obog tohowen hit hininggaliyap heneptuk lamuhup.

³ Hit hinibam tom fam helep pun elma welahebon hinindimuwen, ’Ap misihen oho nit lehoma welahe ambehen lisoho pilap nenebik waruhu fug,’ ulug palimuwap taruk lahebon ariyen hininggareg hinindi ninap taruk lahep.

⁴ Hit hinibam suwe tunguni inowen ei wituk hag toho suhal poholma werehon sehelimu wiri fuhup halug oho Anden hit lisoho pilap henebik waruhuk,” ulug Ninikni Allahn ele il laruk lit,

⁵ ”Hubanggo yoholiyangge hilaruk inap hinibam kik waharuk lit iren seneg lam teg ane hikit toho henenggengge we tor angge eneg helelep angge famen An kik waruhuk sambil mondabi siyahap henebuhuk. Aben hiniyabuk anggur yatuk ambeg kulug anggen tahan taruk lit anggen winon embeselep angge famen Anden hit lisoho pilap henebik waruhuk sambil ino hit mondabi siyag amuhup.

⁶ Hit henenggengge obog toho hulul ulug o kema-kema hebel-pebel toho yami ril laruk lit hirahoma foroho lahep angge oho hilahup.

⁷ Hit men nininggik ahandip toho welamuhuk uruson arimano obog tohowen henele ying heneptuk lit siyahap heneptuk lamuhup. Hit men suburu kut-kut naruk latikibon arimanowen hit henengginang famen yanggal henebuhup. Yanggal henebuhupmu hit larukmen yebangge ap seliyonen yep tubuhubon fam luhur amuhup angge famen nungge fahet ari hag toho nunubam teko laruk ulug hinindi anggar aruhu fug.

⁸ O ino sambil Anden ap inindi anggat tehon obog toho o Edom kinang famen elehap enebuhukmu mun ane man ane alem onoluk teg ane eleg aruhu,” ulug Ninikni Allahn ele il laruk lit,

⁹ ”Hit sehelimuwon sehen senehon o Teman inap arimano inine eleg aruhumu ap tom Edom fam werehon obog toho ap seliyonen unusurukmu war amuhup.

¹⁰ Hit Esauen ondohowonen ondohowon welahebonen honori hun Yakub inowen endetfahonen ondohowon arimano unubam honolok ane turuk latikibon fahet hit hininggali roho weregman eneg mondabi eleg amuhup.

¹¹ Ap o winamonen o Yerusalem pin kuruk lit ap sehen senehon men olma inap men sen eneptusareg enebeyet enenggeyet ninibam og eneplug lahuken wal-wal san hilamisi ulug enehangge hik turusa. Ari turusa sambil ino hiren oho ap o winamon arimano inibil atuk lit iniraham unduhuk latikip.

¹² O ino sambil hit honori Yehuda inap arimano siyahap eneptuson fahet hiren wasubag sup isalug ininggaliyap eneptuk latikibon ari siyag. Siyag ahe ulug inindi mondabi anggin atisiyon fahet hiren inda yag eneplep fug. Asengseng-pasengseng toho welatuson fahet henele hemet toho elep fug.

¹³ Hiren Allah umalikisi sat toho weregma kim usul ulug inibam elehet walinggoho ohowon pisan isalug pumbukmu kelep fug. Hiren oho enenggengge hulul ulug hininggik leho felep fug.

¹⁴ Yehuda inap linggik-longgo urukmen sen eneplug winon pinggi unusuruk lit winon ap seliyon ininggikmu embeselep fug,” irisi.

¹⁵ Ninikni Allahn nin ele uruk lit, ”Anden ap o pumbuk obog toho alem unubam werehon kong tuhuk sambil horog teg. O ino sambil hit o Edom hinaben honolok toho turuk latikip ane hikit toho hit hunubam teko lahu. Honori unubam turuk latikip ane hebeloho hit hininggareg hunubam aruhu.

¹⁶ An numalikisi Yehuda inaben nantom Sion famen ik olokon Anden hinang isarikikon narusa hag toho ap o pumbuk obog toho hinang isahukmu lilipuk toho narukmen eneg siyag atuk lit misig oho oluk welaruhu fug,” irisi.

Allahn Israel inap windat enebuhuk ibag ane

¹⁷ Ninikni Allahn ele uruk lit, ”Anden alem obog toho kong tuhuk sambil ino o Yerusalem tom Sion fam werehon arimano fano amuhup. Inibam tom Sion ino Allah wereg ambeg ulug ap yuhun angge laruk lamuhup fug. O itano li hun Yakuben ondohowonen ondohowon arimanowen kinang ap seliyonen ilmig taruson hebeloho ngi amuhup.

¹⁸ It Yehuda inap arimano men onori Israel inap hun Yusuf inowen ondohowonen ondohowon arimano men indok ambulpul turukon hag amuhupmu Esauen endetfahonen ondohowon Edom inap arimano indok ilim angge hag weregma indoken obog toho nahumu ap misig oho oluk welaruhu fug ulug An Hinikni Allahn nele uruk lahi,” irisi.

¹⁹ Ari teko lahu li Yehuda inap inibam ik ambut fil welatuson arimanowen tom Edom fam wereg inaben ilmig tarusa ambeg hebeloho ngi arik kuhup. Yehuda inap inibam tom alma hubula fil welatuson arimanowen kinang Filistin inaben ilmig tarusa ambeg suhuloho seneg lamuhup. Yehuda inap winon arimanowen ik eleruk fil Efraim kinang unuk eke Samaria kinang ino ngi arik kuhupmu Benyamin inap arimano ik Yordan paloho Gilead kinang senerik lahupteg ngi amuhup.

²⁰ Israel inap inibam ik eleruk fil welatuson famen ininggik lisoho o Asyur kinang fam og eneplug laruson arimanowen Kanaan inap enengginang ilmig ta laruk lit o pumbuk Zarfat oho ilmig tahup. Yerusalem inap o Babilonia inaben o Sefarad og eneplug laruson arimanowen o pumbuk Yehuda kinangma ik ambut fil werehon arimano ngi amuhup.

²¹ Tom Sion fam welamuhubon Allahn ili og enebuhuwonen Edom inap tom fam werehon arimano sen enesug lamuhup. Ari roho turukmu Ninikni Allahn kinang atogman atogma ki reg lit ap o pumbuk obog toho fet enesug laruhu.