MAZMUR 1 - ALLAH WENE

Buku tamon Mazmur ( 1–41 ) Ahiyeg toho wereg ane fahet sini yunggultuk ane

¹ Allah wene ninirim peruk inaben enele siyahon urukmu holtuk eleg ahun ino fano. Ap siyag ane turuk inap onombolim laruk eleg ahun ino ahiyeg toho welamag. Ap Allah abug uruk inap iniraham hur atuk eleg ahun ino indi se roho welamag.

² Ninikni Allahn ari roho turuk lamuhup ulug imbibahon fahet indi haruk lit likiya hupmu wenggel haruk ahun ino fano welaruhu.

³ At inowen mun angge man angge inggiken sen harukon fam fano aruhu. At ino ik elerukmu kinang fanoman wilip atuk ahen hag toho wereg. E inggila halo uk fug angge weregma e anggen urukon li waharikim fano yihik feruk.

⁴ Allah wene ninirim peruk inap e fanowon ari hag toho wereg eleg. E inggila lilohon siyeluwen walug larukon hag toho wereg.

⁵ Allahn ap obog toho kabog enebuhu sambil hinog og enebuhumu in am fug angge kunuk toho welamuhup. Fano ane turuk inap palu enebuhureg siyag ane turuk inap umbusuhu.

⁶ Funggalem fanowon larukon Ninikni Allahn isaruk lit wereg. Funggalem siyahon larukon mondabi siyagma lahup.