IMAMAT 1 - ALLAH WENE

Wam waroho hubu lahaptukon fahet hiyag isibag ane

¹ Ninikni Allahn o sabo fanowon undaman Musa wol tibareg at ubam ele uruk lit,

² ”Israel inap hiyag isahunon tu: Hit misihen Ninikni Allah fahet hubu lahapmin peruk halug wam sapi ano kambing domba ano waroho hubu lahaptuk laruhu.

³ Ap inowen wam sapi waroho yalmin puhu halug Ninikni Allahn fano pukag ulug wam sapi yuhambukon siyag teg elehon eneko Allah olohotma o sabo fanowon sok iraham walug waruhu.

⁴ Walug waruhureg wam unggulmu inggik umbuhumu Allahn wam ino walug waruhu ane fahet ahiyeg hahureg ap inowen siyag ane turukon elehap tuhu.

⁵ Wam unggulmu inggik umbuhureg Ninikni Allah olohotman wam ino ware fuhumu Allah amingmingangge imam hun Harunen ondohowonen endebuhubon ekeyen wam amep ino oko walug hubu lahaptuk ambeg o sabo fanowon alukema werehon walinggoho hik isil lahu.

⁶ Hik isil larukmu wam ikniyen ambohom ahap nonggole feselug unu senggele fuhu.

⁷ Senggele fuhumu imam ahun inowen hubu lahaptuk ambeg indok pisako e kilabe felug

⁸ wam senggeleg ino men unggul men sei men e emberimu imbik lahaku.

⁹ Imbik laharukmu wam ikniyen wam al men uyug men ik umaho fuhumu imam inowen hubu lahaptuk ambeg umbuhureg Ninikni Allahn amben fano pukag ulug abirangge yaluhu.

¹⁰ Ap ekeyen wam domba ano kambing ano waroho yalmin puhu halug wam yuhambukon siyag teg elehon eneko walug waruhu.

¹¹ Walug waruhureg Ninikni Allah olohotman hubu lahaptuk ambeg pikit filen ware fuhumu imam ahun hun Harunen ondohowonen endebuhubon ekeyen wam amep ino oko wahureg hubu lahaptuk ambeg walinggoho hik isil lahu.

¹² Hik isil larikim wam ikniyen senggele fuhumu imam ahun inowen wam senggeleg ino men unggul men sei men hubu lahaptuk ambeg indok narikim e yalehon emberimu imbik lahaku.

¹³ Imbik laharukmu wam ikniyen wam al men uyug men ik umaho fuhumu imam inowen hubu lahaptuk ambeg umbuhureg Ninikni Allahn amben fano pukag ulug abirangge yaluhu.

¹⁴ Ap ekeyen suwe eke waroho yalmin puhu halug suwe yalma ano pel hahon ano walug waruhu.

¹⁵ Walug waruhureg imam ahun ino og uruhumu hubu lahaptuk ambeg walug lalug suwe unggul lebeg toho indok yaluhu. Yale felug suwe ebe ino amep pete roho hubu lahaptuk ambeg umbangguwag ke are ruruk laruhu.

¹⁶ Are rebelug kip undama werehonet angge hubu lahaptuk ambeg iraham yali fil ul hik isaruk ambeg hik isahu.

¹⁷ Hik isahureg suwe aherabul kobog toho wambuk nowen ulug we tor angge eneg lit-hahureg Ninikni Allahn amben fano pukag ulug suwe ebe ino hubu lahaptuk ambeg indok yaluhu.