ESTER 6 - ALLAH WENE

Haman inowen Mordekhai hi ribag ane

¹ O hup atfagma ap suwon nohuk fug teg ane turuken amingmingangge unubam suwesingga an ap suwon laharikik sambilen tulug mun ane man ane teko laruk ane haharehon ino wak aliyek ulug hiyag isibagma walug watfareg hahareg ane ari winag halug hiyag utuk latfag.

² Hiyag utuk lit ap suwon amingmingangge at ebe forohowon ununuk Bigtan men Teres menen inikni Ahasweros ware fusul ulug turukmen Mordekhai inowen oluk atfareg ap suwon hiyag itfag ane fahet haharehon oho hiyag itfag.

³ Hiyag itfagma ap suwon inowen amingmingangge unubam, ”Mordekhai inowen an windat naptisi ane fahet niren hebeloho at hi ruruk lit nungge-nungge og utukuk ano?” ulug kapal isibagma amingmingangge arimanowen, ”Nungge-nungge og utukuk fug,” ulug hiyag itfag.

⁴ Hiyag itfagma ap suwon inowen, ”Ap eke owahalma wereg ano?” ulug kapal isibag. Kapal isibag li itano Haman inowen Mordekhai e hutuk tibihiyon fam ililoho po ribisik lahaminen ap suwon hiyag irik lamin ulug we ket eneg ap suwon ibam owahalma watfareg welatfag.

⁵ Weregma amingmingangge arimanowen, ”Haman ino owahalma wereg,” ibagma ap suwonen, ”Kik wamag!” ibag.

⁶ Haman ino kik watfagma ap suwon inowen kapal haruk lit, ”Ap suwonen ap tu hi rimin perukon fano ane nungge ubam tuk teg peruk lahen?” ulug umung harukmu Haman indimuwen peruk lit, ”Hi rimin peruk ahun ehekon ino we an nubam ehek,” pibag.

⁷ Ari pibareg Haman inowen ap suwon fam ele uruk lit, ”Ap suwonen hi rimin peruk ahun fam fano ane telep peruk lahiyon iminon tu:

⁸ Sum fanowon ap suwon inggarehen wan turukon men wam kuda ap suwon inggareg lahalug larukon unggulmu aliliyangge lahaptukon men oko walug

⁹ ap suwon otsi at iraham werehon sehelimuwon eke inggikmu og utukmu at inowen sum fanowon ino ap suwonen hi rimin peruk ahun fam wan tebelug ap ino wam kuda fam lahalug emberimu heriyegma hondoholug o pumbuk suwon sili pulmu lawag. Ari roho hondoholug laruk lit ap obog tohowen holukag ulug ele hi roho, ’Ari hag toho ap suwonen hi rimin perukon fam turuk,’ ukag,” ibag.

¹⁰ Ibagma ap suwonen Haman hiyag utuk lit, ”Folo-folo sum fanowon ehenon men wam kuda ehenon ino men wamihinteg Yahudi ahun Mordekhai an nibam sokolma heriyehon ino haren ehen ane hikit toho ubam timihin. Haren ehen ane il misig oho umbusuk fug angge ubam turuk lit at hi rimihin,” ibag.

¹¹ Ibagma Haman inowen sum fanowon ap suwonen wan turukon men wam kuda ap suwonen tohon men oko walug sum ino Mordekhai ubam wan tebelug Mordekhai ino wam kuda fam lahalug emberimu heriyegma hondoholug o pumbuk sili pulmu libag. Ari roho hondoholug laruk lit ap obog tohowen holukag ulug ele hi roho, ’Ari hag toho ap suwonen hi rimin perukon fam turuk,’ uruk latfag.

¹² Ari tibagma Mordekhai ino suhuloho ap suwon ibam sokolma heriyeg ambeg larukmu Haman ino indi siyahen orohole sum fam hililip toho pu-pu angge ibam libag.

¹³ Ibam libareg Haman inowen at ubam teko libag ane ari uhe Zeres men ori indi enesuhon obog toho men hiyag isibag. Hiyag isibagma uhe men ori inindi anggat tehon arimano menen at ubam enele uruk lit, ”Hun Mordekhai olohotman hat mako wamburuk lit apma atuk lahen ane ak tehek. At ino Yahudi inaben ondohowon wereg angge re haren at apmayap tuk fug teg laruhun angge famen hat at olohotman mako wamburukmen eneg mondabi apma aruhun,” ulug hiyag isibag.

¹⁴ Ari ulug hiyag isibareg Haman men enele urukmen ap suwon amingmingangge arimano enembeg watfareg Haman ap suwon menen Ester ibamen suburu nalusa ulug folo-folo Ester ibam hondoholug libag.