ESTER 5 - ALLAH WENE

Ester ap suwon ambeg libag ane

¹ Hup hinahanam atfagma Ester inowen sum hiyap suwonen wan turukon wan talug ap suwon ibam owahalma elehet huk toho kilabeg ambeg libareg ap suwonen yet niyamisi ulug unduhuk latfag. At libag li itano ap suwon ino sok aluke fil ap suwon hur atuk ambeg heriyeg latfag.

² Heriyeg lit yet harukmen uhe Ester owahalma unduhukmu yet hibareg ap suwon inowen fano waha ulug wanggun emas fam wirihon inggikmu seneg latfahon ino at ibil leg hibagma Ester horogma libareg inggiken wanggun ambiyangma tung hibag.

³ Tung hibagma ap suwon inowen at ubam ele uruk lit, ”Ester, hat hiyap suwon welahenon, nungge heng napmin ulug nambeg wahen? Kinang anden seneg lahiyon pul ke minggiroho og nimin ulug heng napmihin halug oho og hitmin,” ibag.

⁴ Ibagma Ester inowen, ”Hat ap suwonen fano pemihin halug hat men Haman men suburu anden eserihiyon nulen o yoho eneg nambeg watlihip,” ulug hiyag itfag.

⁵ Hiyag itfagma ap suwonen otsi unubam ele uruk lit, ”Ester inowen heng nabehek ane hikit toho at ambeg suburu na lulen hun Haman ino folo-folo hondohik aliyek,” ulug hiyag isibag. Hiyag isibag ane ari hikit toho Haman hondohik libagma watfareg ap suwon men ambiyeg Ester ambeg libareg suburu nibag.

⁶ Ap suwon inowen ik anggur ahaluwe naruk lit Ester fam, ”Haren nungge og netep pehenteg wol nabehen? Og netep pehenon imihinmu og hitmin. Kinang anden seneg lahiyon pul ke minggiroho og nimin ulug heng napmihin halug oho og hitmin,” ibag.

⁷ Ibagma Ester inowen, ”Anden og netep peruk lahiyon iminon tu:

⁸ Hat ap suwonen an hindi nasug lit he inowen an heng napmisiyon nahiyehen og itmin pemihin halug hat ap suwon men Haman men sono oho suburu anden eseruhukon ambiyeg nahuken an nambeg wamuhup. Wamuhupmu haren kapal neyehenon hikit toho an og netep peruk lahiyon hiyag huruhuk,” ibag.

Haman inowen Mordekhai ware fusuhuk pibag ane

⁹ Haman ino Ester ibam embeselug indi ahiyeg toho nibam lamin ulug laruk lit yet harukmen Mordekhai ino ap suwon ibam sok iraham heriyegma yet hibag. Yet hibareg nungge fahet an hi napmin ulug nolohotman in am fug angge we heriyeg lit eneg wereg ulug Mordekhai fahet olok anggolo hibag.

¹⁰ Olok hibag angge famen indi hondo rebeseruk lit ibam libareg at ori indi enesuhon men uhe unuk Zeres men wol enepfagma ambeg watfag.

¹¹ Watfagma Haman inowen it onolohotman awelwel taruk lit, ”An tung nahunen nanggengge anggolo foroho lit numalikisi ap angge anggolo indag tarikik. Ari regma ap suwon inowen lahap naptuk lit, ’An notsi ap suwon-suwon sehelimuwon hat eneg an niraham wereg lit let naptuk laruhun,’ ulug palimuwap naptisi,” ibag.

¹² Ari ibareg nin ele uruk lit, ”O yoho hiyap suwon Ester inowen ap suwon men suburu nuk oho lit ap winon wol enebuk fug angge we an eneg it men ambiyeg suburu nul ulug wol nabehek. O yoho wol nabehek hag toho sono oho ap suwon men ambiyeg suburu nahuken wamuhup ulug hiyag nerehek.

¹³ Ari roho an nubam fano ane eneg turukmu nindi fano roho welale angge famen Yahudi ahun Mordekhai ap suwon ibam sokolma heriyehon ino oluk wereg li anden hun ino yet halug nindi siyag atuk ane eleg aruhu fug,” ibag.

¹⁴ Ari ibagma uhe Zeres ino men ori menen at ubam ele uruk lit, ”E uwag wirimangge yat toho wirim turukon il falfalik fimahen 22 meter wirim tohon walug watug yaho felihiben hotsi hiyag isamihin. Hiyag isamihinteg sono likiya ap suwon fam Mordekhai ino e ino fam ililoho po ribisik lahaminen hiyag nitmihin uhun. Ari roho tuhunteg hindi hahiyeg toho ap suwon men ambiyeg suburu na lahup,” ulug hiyag itfag. Hiyag itfag ane ari fahet Haman inowen fano pibareg e uwag ino yaho felihip ulug otsi hiyag isibag.