ESTER 3 - ALLAH WENE

Hun Haman inowen Yahudi inap siyahap enebuhuk pibag ane

¹ Welatfareg ap suwon Ahasweros inowen Amalek ahun Agag inowen endetfahonen ondohowon Hamedata amloho unuk Haman ino fam, ”An notsi sehelimuwon hat eneg an niraham wereg lit let naptuk laruhun,” ulug lahapfag.

² Lahapfagma ap suwon amingmingangge ibamen yabuk turukon obog tohowen inikni ap suwonen ibag ane hikit toho Haman olohotma enelenggen fam hur atug onorohole han kinangma sahung teg lit hi ruruk latfag angge famen Mordekhai ino elenggen fam hur am fug angge unduhuk latfag.

³ Unduhukmu yet hibareg ap suwon amingmingangge arimanowen Mordekhai fam, ”Nungge fahet haren ap suwonen hiyag nisarisi ane holuk fug angge unduhuk lahen?” ulug kapal hibag.

⁴ Ari ulug kapal hibareg likiya hupmu at ubam enele urukmen warukmen komo rurukmu Mordekhai inowen, ”An Yahudi nahun welahireg hun ino olohotma nelenggen fam hur aruhuk fug,” ulug hiyag isaruk lit enele holfag fug. Holfag fugmu ap suwon amingmingangge arimanowen Hamanen alem ari fahet hol hamisi halug nangginmisi ulug Haman ino hiyag itfag.

⁵ Hiyag itfagma nungge fahet Mordekhai inowen an nolohotma elenggen fam hur atuk lit hi naptuk eleg ulug undama ahe lahibag.

⁶ Ahe lahibagma Haman indimuwen Mordekhai amu eneg ware fusuhuk halug ari siyag pibareg Mordekhai ino Yahudi inaben ondohowon wereg ulug hiyag itfahon ino fahet wenggel haruk lit aret oriyet mangno roho unusuhuk pibag. Ari pibareg Yahudi inap o Persia kinang fam werehon obog toho elehap enebuhuk ulug yami ruruk latfag.

⁷ Elehap enebuhuk sambil nonoluk atmisi ulug Hamanen otsi hiyag isibag ane hikit toho enehangge eke hik tibag. Ahasweros ino ap suwon lahibag sambilen tulug mo ilig am wirig am turukmen nisanggowen atfagma pikalem tamon fam enehangge ino hik tibagma pikalem nisanggowon fam atfag.

⁸ Atfagma Haman inowen ap suwon Ahasweros fam ele uruk lit, ”Ap o pumbuk winon nit nenengginang fam pohon hag toho wereg lit inibam o kema-kema linggik-longgo roho wereg. It arimano hat humalikisi o pumbuk winon enele wal-wal urukon men hili roho wereg. Iren turuk ane men hat humalikisi winonen turuk ane men wirim teg eleg. Haren ari-ari turuk lamuhup ulug kong toho emberikinon iren turuk eleg. Ap arimanowen ari roho turuk ane fahet hat ap suwonen fano puk fug teg lahen.

⁹ Haren fano pemihin halug ap arimano obog toho unusuhup ulug suwesingga fam haharoho embelug ap obog toho hiyag isil lahup imihin. Imihin ane hikir aruhu halug anden ili ruruk angge perak ap arimanowen lin isahubon anggin te 340.000 kilogram hat ap suwon hanggengge foroho inap ininggikmu og isahuk,” ulug hiyag itfag.

¹⁰ Ari ulug hiyag itfagma Ahasweros inowen sehene enehangge ap suwonen wan turukon inggikmuwen ho roho Yahudi inap men seli roho werehon Haman ino og itfag.

¹¹ Og utuk lit, ”Haren fano puhunon hikit toho ap arimano unubam turuk laruhun. Fano-fano angge perak iren lin isahubon arimano oho hat eneg ngi aruhun,” ulug hiyag itfag.

¹² Hiyag itfagma pikalem tamon fam hup nuwalen atfagma Haman inowen anden tuhuk peruk lahi ane ari ap suwon-suwon Ahasweros iraham werehon men, kinang wal taneg senehon men, o pumbuk wal taneg senehon men hiyag isamin ulug ap suwon amingmingangge suwesingga hahatukon arimano wol enepfag. Wol enepfareg aren ele hiyag isarukmu ap o pumbuk wal taneg werehonen enele wal-wal uruk ane men suwesingga hahatuk ane men hikit toho suwesingga fam haharoho imbibag. Imbibagma suwesingga aruma ap suwon Ahasweros unuk fam hahareg ulug Haman inowen sehene enehangge emberuk angge ap suwonen tohon ino fam enehangge imbibag.

¹³ Suwesingga arimano fam haharoho imbibahon tu, ”Yahudi inap kabiniyonet sabalonet abet hiyabet unumalikisiyet misihim eneg eleg amuhup ulug pikalem nisanggowon fam hup nuwalen aruhumu obog toho lilibug heheg pinggi unusuhup. Unusulug enenggengge huhulangge hilahup,” ulug haharoho imbibag. Suwesingga arimano haharoho imbibagma ap suwon amingmingangge unuyug ilaluwe roho larukonen walug laruk lit Persia kinang atogman atogma o pumbuk obog toho og isil laruk latfag.

¹⁴ Og isil libagma ap suwon-suwon kinang wal taneg seneg latfahon arimanowen it hiyag isibag ane hikit toho ap o pumbuk obog toho hiyag isil laruk lit, ”Pikalem nisanggowon fam hup nuwalen aruhumu hiren Yahudi inap obog toho unusuhuben wep toho welamok!” ulug hiyag isibag.

¹⁵ Ari roho ap suwon amingmingangge folo-folo larukonen suwesingga ap suwon unuk fam hahatfahon arimano o kema-kema og isil libagma suwesingga fam haharoho imbibag ane ino o Susan inap oho hiyag isibag. Hiyag isibagma itano o Susan inap arimano enekolen enele ngik-ngog turukmu ap suwon men Haman men enemumu wereg lit enehiyehen ik naruk latfag.