ESTER 1 - ALLAH WENE

Ap suwon uhe Wasti yanggalfag ane

^1-2 Ap suwon Ahasweros ibam o pumbuk Susan welatfahon inowen kinang India famen tulug kinang Etiopia fam o Persia kinang obog toho seneg latfag. Kinang seneg latfahon ino minggiroho weregma ap kinang wal taneg forohowon enebe teng fuwaben 127 wereg latfag.

³ Ahasweros ino ap suwon raja lahibareg weregman eneg mo ilig am wirig am turukmu hinahan atfagma ap suwon inowen seni humon eke esebul ulug ap suwon-suwon at let turukon obog toho wol enepfag. Wol enepfagma Persia inap men Media inap men onowesi oho kinang wal taneg seneg latfag inap oho ap suwon ibam watfag.

⁴ Watfagma ap suwon inowen seni esetuk lit an nine roho wereg lit nanggengge anggolo seneg lahiyon men ili ruruk angge eke hag eke hag foroho lahiyon men notsiyen yet hawag ulug unug haruk latfag. Ari roho enehiyeg toho yunggultukmen eneg hup teng sabiren 180 atfag.

⁵ Hup teng sabiren atfagma Ahasweros inowen ibam owahalma elehet huk toho kilabeg ambehen ap suwonet toronet ibam welatfahonet fahet seni eke esetfareg nul ulug enehiyeg toho yunggultukmen eneg o sabiren atfag.

⁶ Elehet ap yunggultuk ambeg walinggoho ohowon ino sum il yinggirik-yenggereng urukon fam wirig latfag. Sum arimano ahale mut piyanu palehon il ele ke kanti hag angge perak fam wirihon fene suknoho pilabeg latfag. Suknoho pilaptuk ambeg ulug fuma-fuma helep ili rurukon yaron uwag mase roho yaho latfag. Helep arimano pali fil hele perak fam ililohon nunggulig paleg latfagma sum arimano suknoho pilabeg latfag. Pila it yunggultuk ambeg helep anggeyon ili faya urukon il eke hag eke hag werehon fam wirigmu kel taruk ambeg perak emas fam wirihon unduhuk latfag.

⁷ Ari regma ap suwon ino indi fano reg lit ik anggur ahaluwe anggolo kubag amu-amu emas fam wirihon fam hinang isarukmu naruk latfag.

⁸ Ik naruk ane fahet ap suwon inowen amingmingangge ibam forohowon arimano hiyag isaruk lit, ”O wina sambil turuk lahep ane hikit toho tuk fug angge ap wal tanehen namin ulug pelusa ane hikit toho ik hinang isalihip,” ulug imbibag ane hikit toho turuk latfag.

⁹ Ari roho turukmu Ahasweros uhe Wasti inowen oho ap suwon ibamen hiyap obog toho fahet seni eke esetfag.

^10-11 Ari roho turukmen o sabirenam atfagma Ahasweros inowen ik anggur nalug ahiyeg toho wereg lit notsi ap suwon-suwon ariya men numalikisi obog toho menen an nuhe orohole fanowon ino yet hawag ulug amingmingangge at ebe forohowon sabiren ununuk Mehuman, Bizta, Harbona, Bigta, Abagta, Zetar, Karkas men hiyag isaruk lit, ”An nuhe ino hiyap suwonen lahaptuk angge unggulmu wan talug nambeg watmisiyen hiyag irik aliyek!” ulug hiyag isibagma Wasti ambeg hiyag irik libag.

¹² Hiyag irik libagma Wasti inowen ap suwonen hiyag itfag ane sobir isalug watmin fug ulug pok atfag. Pok atfag ane ari fahet ap suwon inowen olok anggolo haruk lit undama ahe lahibag.

¹³ Lahibagma ap suwon inowen alem nuheyen tehekon ino haltul ulug amingmingangge mun ane man ane teko laruk ane fahet inindi anggat teg lit aben tuk teg ane fahet imbibahon onolukon

¹⁴ ununuk Karsena, Setar, Admata, Tarsis, Meres, Marsena, Memukan men wol enepfag. It sabiren ap suwon let turukon itano Persia inap men Media inap men onowesi wereg lit ap suwon otsi sehelimu palimu roho welatfag. Palimu wereg lit likiya hupmu ap suwon men nenele ul peruk ane hikit toho ambeg kuk teg latfag.

¹⁵ Ap suwon inowen it sabiren itano wol enepfareg hiyag isaruk lit, ”An nambeg watmihin ulug namingmingangge feneyen nuhe Wasti hiyag irihi angge famen he inowen an ap suwon nele holuk fug angge pok ahama aben tuk teg ane fahet imbibahon hikit toho at ubam nungge timin?” ulug kapal isibag.

¹⁶ Kapal isibagma hun Memukan inowen ele uruk lit, ”Wasti inowen ap suwon Ahasweros ele eneg ying tehek fug, nit ap suwon-suwon welaheyon men ap o pumbuk obog toho Ahasweros inowen sen enesuhon men nenele ying nenebehek.

¹⁷ Aren tehekon ari hiyap obog tohowen hol hahupteg enele uruk lit, ’Ap suwon Ahasweros inowen uhe Wasti fam nambeg watmihin ulug wol tirisi angge famen uheyen ele holuk fug angge pok atisi,’ uhupteg it enehunsi unubam ambi ane eneg turuk lit it enele holuk fug angge apmayap eneptuk lamuhup tohon.

¹⁸ O yoho tu fam eneg Persia Media inap onowesi unuhesi arimanowen Wasti inowen ehekon fahet hol halusareg fobik it enehunsi oho ambi ane eneg hiyag isaruk lamuhup. Hiyag isaruk lamuhup ane ariyen hiyaben enehunsi enele holtuk eleg ane men aben unuhesi fahet onolok haruk ane men su aruhu.

¹⁹ Ari fahet hat ap suwonen fano pemihin halug Wasti ino nin an nolohotma waruhu fug ulug kong toho imbin. Kong toho embemihinon ari nin am fug angge welamag ulug suwesingga Persia inap men Media inap menen aben tuk teg ane fahet haharoho imbibahon fam hahare femihin. Hahare femihin ane hikit toho Wasti ubabut siyahon ino pilabe fuhunteg at ubalma hiyap ubabut fanowon eke hiyap suwon lahabuhun.

²⁰ Hat ap suwonen kong toho embemihin ane kinang suwon haren seneg lahenon atogman atogma ap hiyag isil lahupmu ap suwonen oho toronen oho hol hahupteg hiyap obog tohowen it enehunsi apmayap enebuk fug angge enele holtuk lamuhup,” ibag.

²¹ Ibag ane ari fahet ap suwon otsi menen fano pibareg ap suwon inowen ari hikit toho turuk lit

²² aren kong toho imbibag ane ino o pumbuk wal tanehen enele uruk ane men suwesingga hahatuk ane men hikit toho suwesingga fam hahare fibag. Hahare feruk lit, ”Ap wal tanehen it inibam werehon ngi reg lit werehen unuhesi unumalikisi menen enele holtuk lamuhup!” ulug haharoho imbihiyon ari o pumbuk obog tohowen holukag ulug hiyag isil lalihip ulug otsi mon enepfag.