DANIEL 1 - ALLAH WENE

Daniel ori men welatfag ane ( 1:1–6:28 ) Daniel ori men o Babilonia inap onowe Nebukadnezar ambeg welatfag ane

¹ Ap suwon unuk Yoyakim inowen Yehuda inap fet enesugmen mo hinahan atfagma ap suwon Babel inap fet enesug latfahon unuk Nebukadnezar ino o Yerusalem watfareg unusimin ulug waling enesug latfag.

² Waling enesugmu Yehuda inap onowe Yoyakim ino umalikisi winon men umbagpag turuk angge Allah ibam forohowon minggiroho winon men Ninikni Allahn Nebukadnezar inggikmu og itfag. Og itfagma kinang Babilonia fam hilalug libareg usa angge wel turuk ibam walug ili ruruk angge foroho ambeg imbisik libag.

³ Imbisik libareg ap suwon Nebukadnezar inowen hun Aspenas ap suwon ibam foroho ahun ino fam ele uruk lit, ”Israel inap sehelimuwon ap suwon men alem seneg inap menen indag enesuhon winako og enebuhun.

⁴ Og enebuhunon arimano ap kabiniyon enehap siyag teg elehon, onorohole fanowon, alem obog toho onolukon, inindi anggat teg lit mun ane man ane fuki roho wenggel harukon, yabuk ap suwon wereg ambeg wa hag tohon og enebuhunteg Babilonia ninaben hahatuk ane men nenele men hiyag isaruk laruhun.

⁵ Hiyag isarukmu likiya hupmu fano-fano angge suburu men ik anggur ahaluwe men anden naruk lahiyon minggiroho it og isaruk lamuhup. Mo hinahan milal eneptuk lamuhupmu onoluk atuk halug an ap suwon namingmingangge wereg lit let naptuk lamuhup,” ulug Nebukadnezar inowen hun Aspenas hiyag itfag.

⁶ Aspenas inowen Israel inap og enepfahon arimano sehelimuwon Yehuda inap ununuk te Daniel, Hananya, Misael, Azarya enebe uhan og enepfag.

⁷ Og enepfareg it uhan itano Babilonia inap enele roho ununuk keron suwal eneptuk lit Daniel unuk te Beltsazar, Hananya unuk Sadrakh, Misael unuk Mesakh, Azarya unuk Abednego suwal enepfag.

⁸ Suwal enepfagma Danielen Allahn hili imbibahon pisan timin fuhen fano-fano angge ap suwonen narukon arimano saliyog naruk laruhuk fug ulug kong toho imbibareg Aspenas fam hiyag utuk lit, ”An ninggareg siyahap tahuk tohon ap suwonen naruk angge og nutuk laruhun fug,” ulug heng tibag.

⁹ Heng tibagma Allahn pibag ane roho Aspenas inowen Daniel indi reg latfareg

¹⁰ at ubam ele uruk lit, ”Nikni ap suwonen, ’Suburu men ik men ihi ane hikit toho og isaruk lamuhup,’ ulug emberisimu an nakol toho welahi. Fobik aren honori ap winon kabiniyon enebe fano regman hit henebe uhan siyag tegma yet hisahu halug ap suwonen an siyahap nabuk nowen,” ibag.

¹¹ Ari ibagma Daniel inowen hun Aspenas ot it enebe uhan itano fet enesug latfahon ino fam ele uruk lit,

¹² ”Hup numenam fano-fano angge ap suwonen narukon og nisa fug angge we suburu suwan ik men eneg og nisaruk lit wal nisahun.

¹³ Hup numenam wal nisahunteg nit nenebe men nonori winon suburu ik ap suwonen tohon narukon enebe men wirim nisahunteg nit hamingmingangge yet nisahun ane hikit toho nunubam tuhun,” ibag.

¹⁴ Danielen heng tibag ane hol hibareg o numenam wal isaruk latfag.

¹⁵ Hup numenam atfagma Daniel ori men fano wereg lit enebe fit tarukmu ap kabiniyon winon fano-fano angge ap suwonen tohon naruk latfahon obog toho arimano it men ambi reg elegma yet isibag.

¹⁶ Ari regma yet isibareg fet enesug ahun inowen fano-fano angge ap suwonen tohon embeseruk lit we suburu men suwan men eneg og isaruk latfag.

¹⁷ Og isarukmu Allahn ap uhan itano let eneptukmu inindi anggat atuk lit suwesingga andog toho emberuk latfahon ekeyon-ekeyon men alem obog toho men fahet onoluk atuk latfag. Danielen oho fulu roho yet haruk ane men nei og haruk ane men fahet seleg toho hiyag isa reg latfag.

¹⁸ Ari roho weregman ap suwon inowen ap kabiniyon arimano nambeg hondog eneplug wamuhup ulug sali imbibahon obog atfag sambil ino Aspenas inowen Nebukadnezar ambeg hondog eneplug libag.

¹⁹ Hondog eneplug libagma ap suwon inowen it men enele uruk lit it sehelimuwon misig oho Daniel, Hananya, Misael, Azarya hahon weregma yet isibag fug. Ari reg latfagma it enebe uhan itano ap suwon amingmingangge atfag.

²⁰ Weregma ap suwon inowen alem angginon obog toho fahet it uhan itano unubam seleg toho hiyag nemek ulug umung isaruk latfag. Umung isarukmu ap winon inindi anggat teg inap men hal inap men o Babilonia kinang fam welatfahon arimanowen seleg toho hiyag um fugmu it uhan itano mun ane man ane obog toho onoluk teg lit mondabi palimu weregma yet isaruk latfag.

²¹ Daniel ap suwon Nebukadnezar men weregman eneg o Persia ahun Kores inowen Babilonia inap apmayap eneptuk lit onowe in atfag.