AMOS 1 - ALLAH WENE

¹ Hun Amos wam domba anggolo foroho lit o Tekoa weregma Allahn o Israel inap wereg ane fahet hiyag utukmu uruk latfag ane suwesingga aru fam haharoho imbibag. Uruk latfag ane ari ap suwon Uzia inowen Yehuda kinang seneg lit weregma hun Yoas amloho Yerobeam inowen Israel kinang seneg latfag li itano Amos inowen hiyag isaruk latfareg mo piren libagma o mek suwon ino tibag.

² Hun Amos inowen uruk latfag ane aru, ”Tom Sion o Yerusalem werehon ino famen Ninikni Allah ele ululu sup turuk hag toho urukmu wam endetuk ke kinang lilog atil laruk lit e hoholangge tom Karmel fam werehon arimano oho pug atil laruk.”

O pumbuk walinggoho werehon Allahn alem angginon unubam umbuhuk ibag ane O Siria inap fahet ibag ane

³ Ninikni Allahn uruk ane aru holeg lamek, ”O Siria inap Damsyik werehon arimanowen siyag ane eneg til laruk lit werehen Anden unusuhuk uruk lahiyon aru umbusuhuk fug. Kinang habultuk angge ayeg olokon ino ap enemberim ke lit isa larukmu enehap kiririp heheg lin uruk hag toho Siria inap arimanowen Gilead inap unubam onolok ane anggolo turuk latusa.

⁴ Ari fahet Siria inap onowe Hazael inowen witfag ibam nin fobik ap suwon Benhadad inowen elehet walinggoho ohowon ino fam Anden indok pilabik waruhukmu obog toho nahu.

⁵ Elehet o Damsyik walinggoho ohowon fam sok latukon halog tubusuhukteg tonggo Awen foroho ahun men Bet-Eden inap fet enesug ahun men elehap enebuhukmu Siria inap ininggik hele waroho o Kir imbisik lahup.”

O Filistin inap fahet ibag ane

⁶ Ninikni Allahn uruk ane aru holeg lamek, ”Filistin inap o Gaza werehon arimanowen siyag ane eneg til laruk lit werehen Anden unusuhuk uruk lahiyon aru umbusuhuk fug. O pumbuk it men seli roho werehon enebe obog toho ap enemingmingangge welamag ulug Edom inap og isa laruson ari fahet

⁷ elehet o Gaza walinggoho ohowon ino fam Anden indok pilabik waruhukmu ap suwon inibam o fanowon obog toho arimano nahu.

⁸ O Asdod inap men Askelon inap men fet enesug inap itano Anden elehap eneptuk lit o Ekron inap An ninggik ineyonen unusuhukmu o Filistin inap onoluk welamuhubon arimano waroho lin uhup.”

O Tirus inap fahet ibag ane

⁹ Ninikni Allahn uruk ane aru holeg lamek, ”Tirus inaben siyag ane eneg til laruk lit werehen Anden unusuhuk uruk lahiyon aru umbusuhuk fug. It arimanowen o pumbuk eke fam, ’Nininggik ahandip toho welamuhuk,’ ulug enele sali imbibag ane wenggel ha fug angge o pumbuk ino enebe obog toho ininggik hele waroho Edom inap enemingmingangge welamag ulug og isa laruson ari fahet

¹⁰ elehet o Tirus walinggoho ohowon fam Anden indok pilabik waruhukmu ap suwon inibam o fanowon arimano obog toho nahu.”

O Edom inap fahet ibag ane

¹¹ Ninikni Allahn uruk ane aru holeg lamek, ”O Edom inaben siyag ane eneg til laruk lit werehen Anden unusuhuk uruk lahiyon aru umbusuhuk fug. Onori Israel inap inindi isa fug angge muko siko unusil laruk latusa. Onolok ane inindimu wenggeltukon ariyen ahe laharukmen eneg werehon ari fahet

¹² o pumbuk Teman fam Anden indok pilabik waruhukmu o Bozra elehet walinggoho ohowon ino oho obog toho nahu.”

O Amon inap fahet ibag ane

¹³ Ninikni Allahn uruk ane aru holeg lamek, ”O Amon inaben siyag ane eneg til laruk lit werehen Anden unusuhuk uruk lahiyon aru umbusuhuk fug. Nit nenengginang hiyal amag ulug o Gilead kinang fam kuruk lit hiyap malik forohowon arimano enehum pilang heheg unusuruson ari fahet

¹⁴ elehet o Raba walinggoho ohowon ino Anden indok pisag isahukmu ap suwon inibam o fanowon obog toho nahu. Indoken nahu sambil ino tog sele-sele atukmu enele ngik-ngog tuhup ane siyelu ele hag toho holuhup.

¹⁵ Amon kinang seneg ahun men onowesi suwon winon men ininggik hele waroho pin halog toho wilip enebuhup.”