Zwide 1 - Eka Eswhī

Atsaʼte

¹ Meŋ Zwíde ntsiʼnzem Jáak, ŋ́gɔ́ á ŋgaŋ afaʼ Yɛɛ́so Klísto mé tíi akɛtte jʉɔ páʼa. Ńtíi á mbū epuɔ pīi, Ndém a le tɔ́ŋ á wɔ́p ŋ́gɛ, pɔ́ ecʉ́ʼ epuɔ pí, épuɔ pīi Ndém, á Mɔʼɔ́ yímpɛ a kɔɔ̄ŋ á wɔ́p, ŋ́kápte á wɔ́p, ńdɔkɔ nzwíʼtɛ á Yɛɛ́so Klísto.

² Ŋ́gɛ Ndém a lɛ ŋgwɛ̄ atsāmezeŋɛ té ndhʉ á mbū pɛ, ŋ́ghʉ̄ pɛ enáŋ mé apwɛne, ńnáŋ mé ŋkɔŋne té ndhʉ.

Ndém a a láʼ etswáʼ wɔ zíʼne‑menu te methū

³ Mepɔŋ mesoó pá, meŋ ke nɔ̄ŋ mbúu ntsáa tɛʼ, á gá á letī á mbū pɛ, ńdɔk eshúŋ á wɛ́ anu, ánɛ páʼ Ndém a a láʼ eghʉ, ḿpɛ metsem e epú ntswɛ́t. Meŋ á piŋ njʉ́ɔ ŋ́gɛ, á mbɔŋ á gá á letī ndɔ̄k ntswíʼte á wɛ́ á lelʉɔ̄ʼ, tɛ amɔ̄ʼ anu ndɛʼɛ, á le tswīʼne ánɛ anu Ndém, páʼ Yɛɛ́so a le ziʼné á mbū pímpɛ epuɔ Ndém, ḿpɛ pīiŋ mbɔ́ŋte á lekūʼte ɛ́. Anu mɛ́t á gɔ́ áa zɛ́mɔʼɔ́, ŋiŋ á piŋ te pɔŋté á lelāʼ aleʼé, ńtswīʼne amɔ̄ʼ éwú ú.

⁴ Meŋ ndʉ́ɛ́ páʼa, melaʼ mīi emɔ̄ʼ epuɔ é ke ŋɛté ŋkó á tsetsɛlɛ pɛ, ńnɔŋ ŋkúmnɛ njuʼɔ́ anu mbɔŋ té ndhʉ zīi, Ndém yímpɛ a le lɔ̄k ntsá mezeŋɛ mímpɛ. Ŋ́kúmnɛ épúp, ńdɔkɔ ntswíʼtɛ memɛnzhɛ tepɔŋ pīi, pɔ́ ziŋɛ éwú. Pɔ́ é si ŋghʉ̄ɛ épúp páʼā, ńdɔkɔ ŋkʉ̄ŋnɛ á Yɛɛ́so Klísto Atsyapuɔ yímpɛ, ŋ́gɔ́ ndaʼ efɔ yímpɛ. Tɛ efhó tɛ afʉʼ, mɛ́ tí á ntē aŋwaʼne Ndém ŋ́gɛ, Ndém a a láʼ etswá ŋgʉɔ athʉ́ lepé á athū wɔ te júʼ‑nchu yí puɔ mɛ́t.

⁵ Anu zīi meŋ gʉɔ mé ŋkímte pɛ lāa, pɛ é si nzi nzhɛ́ɛ tɛ ntsékne. Atsyapuɔ Ndém a le kú epuɔ alāʼ pí, á mbū epuɔ Ejīpto páʼā, ḿbiŋ eshʉ̄ʼ á nnɔ pɔ́p, ŋ́ghʉ̄, epuɔ pīi, pɔ́ ka fɛ́ nnɛ̄t ŋgyá mé yí í, é lákne.

⁶ Pɛ ezéŋ ŋkímte mecɔʼ Ndém pīi, pɔ́ lɛ te kɔ̄ŋ á letshī ánɛ ajʉʼ zīi, Ndém a le tshí á wɔ́p éwú ú, ŋ́kɔ̄ŋ á wɔ́p á lefhō ánɛ etsɔ́p lenaŋá, ŋ́gʉ̄ɔ. Ndém a lē mbú ntsēŋɛ á wɔ́p á lemiʼɛ, á ajʉʼ zīi, á seéŋ lɛ cʉʉ́ʉ́, ńdɔkɔ nzwíʼtɛ á mía aleʼé zīi, yí e gʉɔ mé nzaáʼ ntsaŋ.

⁷ Ŋ́gɔ́ mé tésɔŋ Sodɔm pɔ́ eyi Gomɔɔ, mbɔɔ emɔ̄ʼ metésɔŋ á legʉ̄ŋ éwú pīi, pɔ́ le zīŋ azɔ́p ánɛ mɛnzhɛ tepɔŋ, páʼ mecɔʼ Ndém mɛ́t lā, ńcʉ́ʼ megaŋ agā, tɛ ŋ́gʉɔ njʉ́ɔ mecɔʼ Ndém ŋ́gɛ, pɔ́ a pɔ́p e enɔ̄ŋ, tɛ́ mecɔʼ Ndém é zi te páʼ epuɔ menɔŋ ɔ́. Ndém á le néŋ epuɔ tésɔŋ puɔ mɛ́t á ntē mmók yīi, é té láʼ epí í, ńdɔkɔ ŋgyáa efʉʼ á mbū epuɔ metsem.

⁸ Epuɔ mɛ́t pīi pɔ́ ke ŋɛté ŋkó á tsetsɛlɛ pɛ, pɔ́ é si nnɔŋ ŋghʉ̄ɛ páʼ epuɔ metésɔŋ puɔ mɛ́t lā, ńdɔ̄k á wɔ́p á leŋia, ńnéŋɛ epe ánɛ mbe nnɛ̄t zɔp, ŋ́gwáka mete Klísto, ńzɔ̄tɛ megaŋ shʉ́shɔ́k.

⁹ Tɛ́ mbɔ Míshʉɛ, á tɛ ŋgyā mecɔʼ Ndém, a lɛ te épúp ghʉ. A le nɔ̄ŋ ndʉʼɛ anu á nchu Sɛ́ta, pɔ́ yí é nɔŋ ntɔ̄ʼnɛ apfhō Mɔɔ́sɛ, á láʼ te lé anu á mbū Sɛ́ta tɛ ndɔ̄k nzɔ̄te á yí í, ńdaʼ páʼ a le lé me yí ŋ́gɛ: «Tɛ Atsyapuɔ Ndém, a elɛ ntswá á wú ŋgʉɔ athʉ́ lepé. »

¹⁰ Epuɔ pīi pɔ́ ŋɛ́tɛ ŋkúɔ́ á tsetsɛlɛ pɛ lā, pɔ́ é si nzɔ̄tɛ ajū mīi, pɔ́ té si nzhɛ́ ɛ. Azi pɔ́ é si nzhɛ́ɛ, á lɛ ŋgɔ́ á mbū pɔ́p, ŋ́gɔ́ áa páʼ ajū mīi, á kɔ́ʼɔ á athū na lā, á te leghi. Aziɛ́ mé piŋ nnɔ̄ŋ ŋghʉ̄ɛ, pɔ́ faa nzhɛ.

¹¹ Ndɔ e é athū pɔ́p, melaʼ mīi, pɔ́ ke kɔ̄ŋ á wɔ́p á leziŋ ánɛ mekhu Kaɛŋ. Pɔ́ ke kɔ̄ŋ á wɔ́p á lekō ánɛ mefa melaʼ ŋkāp, páʼ Balam lā. Ŋ́kɔ̄ŋ á wɔ́p á lelākne páʼ Koole, a le tē athū, ńdákne épúp lā.

¹² Pɔ́ mé si ntsēŋtɛ nzwiŋ wɛ́, áfʉʼ zīi pɛ a pɔ́p é cúʼtɛ mpfɛ́tɛ etsō, páʼ epɔ̄ memía lā. Pɔ́ gɔ́ éwú, ńnɔŋ ŋkʉ̄ɔ ŋgɔŋ, té esē ŋkú á wɔ́p, mbiŋ nzī te nɔ̄ŋ esáŋa á ŋiŋ ɛ́. Pɔ́ é si ŋgɔ́ páʼ alɔ zīi, afēm á túʼɔ ndɔ̄kɔ ŋkʉ̄nɛ, á piŋ ŋgɔ́ yīi, á gɔ́ le ghʉ̄, mbeŋ é lú ú lā. Ŋ́gɔ́ páʼ athʉ́ zīi, á zi mbú ŋgɔ́ le zém, tɛ mbɔɔ afʉʼ zīi, á pɔŋteé á lezēm ɛ́ lā, áthʉ́ zīi, mɛ́ é tsɔ́ʼ mé meŋgaŋ, á kwhʉ́, ḿbú ŋkwhʉ́ lā.

¹³ Pɔ́ é páʼ menē ntshi lā, efʉʉ́ʼ‑menu tepɔŋ mɔ́p, é gɔ́ páʼ ekaŋne tsīi, menē ntshi mɛ́t é gáʼa, ńzwɛnɛ ŋŋémɛ á akʉŋɛ́ ntshi, éfūʼtɛ éwú lā. Pɔ́ zeéŋ ŋgɔ́ páʼ mecɔʼ saŋ pīi, é gánɛ lā, mbɔ Ndém a lē ndáʼ ncūŋte á ajʉʼ zīi, ejʉʼ é éwú eséŋɛ lɛ cʉʉ́ʉ́, á mbū pɔ́p.

¹⁴ Enɔk, páte esambīa ánɛ ndhu Ádam, a le té njhʉ̄ eshúŋne ánɛ wɔ ŋɛ́te‑ŋkó á nnɔ puɔ mɛ́t, ńdé ŋ́gɛ: «A awuɔ yīi, Atsyapuɔ Ndém a a si shʉʼɛ, pɔ́ a atʉtʉ mecɔʼ pí, é gɔ́ nnɔ lāa.

¹⁵ Pɔ́ shʉʼɛ épúp, á nzáʼ ntsaŋ zɔp a epuɔ metsem. Étswá ŋgʉɔ athʉ́ lepé ánɛ wɔ te júʼ‑nchu yí metsem, melaʼ mefa mɔ́p ntsem, mbɔɔ melaʼ nzɔ zīi, wɔ te júʼ‑nchu Ndém puɔ mɛ́t, ŋ́gɔ́ megaŋ mefa, é lɔkɔ nzɔ̄tɛ á yí. »

¹⁶ Epuɔ puɔ mɛ́t é efʉʼ metsem, ńzwɛ́tte zwɛtté, ńzéŋ ndā nnɛ̄t la. Pɔ́ é efʉʼ metsem, ŋ́ghʉ̄ áa ajū mīi mbe nnɛ̄t zɔ́p e é si ntshónɛ á wɔ́p, ŋ́gɛ pɔ́ eghʉ̄. Meshuŋne aŋaʼte nnɛ̄t, mé nɔŋ ntúɔ́ á nchu pɔ́p. Pɔ́ gē elʉte á ŋiŋ, á gɔ́ áa éyi, pɔ́ lɔkɔ efāʼa á lejhʉ̄ apɛ á nzem yí.

Ntí zīi epuɔ Yɛɛ́so é pɔŋteé á lelɔk nzīŋ

¹⁷ Ŋ́ké ŋgɔ́ mé pɛ, mépɔŋ mesoó pá, pɛ ekímte menu mīi, meziŋ‑ntō Atsyapuɔ yímpɛ Yɛɛ́so Klísto, é le té njhʉ̄ eshúŋ á wɛ́.

¹⁸ Pɔ́ le lé á mbū pɛ ŋ́gɛ: «A láʼ egɔ́ ánɛ mezoknzem aleʼé alāʼ, emɔ̄ʼ epuɔ e ezwī á wɛ́, ńnɔŋ nnáŋa páʼ mbe nnɛ̄t zɔp e é si ntshónɛ á wɔ́p, ŋ́gɔ́ wɔ te júʼ‑nchu Ndém. »

¹⁹ Á épúp, pɔ́ mé si ŋgɔ́ epuɔ pīi, pɔ́ maʼa mefakne á nnɔ epuɔ Yɛɛ́so. Pɔ́ ghʉʉ̄ azɔ́p, áa ajū mīi, epuɔ ŋgɔŋ puɔ é kɔɔ̄ŋ. Azwakne Ndém á té ánɛ pɔ́p ɔ́.

²⁰ Tɛ́ ŋké ŋgɔ́ mé pɛ, mépɔŋ mesoó pá, pɛ ezɛ́t ntswiʼnɛ ntáŋtɛ, ńtsóʼne ewɛ lenāŋ áa ánɛ anu zīi, Yɛɛ́so a le ziʼnéē, á fhó áa mbū Ndém, pɛ pīiŋ mbɔ́ŋte á lekūʼte. Pɛ elā á mbū Azwakne Ndém, a elɔ̄k mete mí, ntswíte á wɛ́ á leswīŋte á Ndém.

²¹ Pɛ eghʉ̄ tɛ Ndém a ezɛ́t ntswiʼnɛ ŋkɔ̄ŋɔ á wɛ́ kɔŋ. Ńnɔŋ nzwíʼtɛ ŋ́gɛ Atsyapuɔ yímpɛ Yɛɛ́so Klísto, a efhó ánɛ atsāmezeŋɛ zīi, a wɛɛ̄ ánɛ pímpɛ, ŋ́ghʉ̄, ḿpɛ efú ntā á lezēŋ Ndém.

²² Pɛ etsá mezeŋɛ epuɔ pīi, pɔ́ é si mmīʼtɛ á levēŋ anu jʉɔ mɛ́t,

²³ ŋ́ghʉ̄ pɔ́ etswɛ́t mmók yīi, pɔ́ nnɔŋ ŋgʉ̄ɔ mé éwú. Ŋ́gɔ́ mé emɔ̄ʼ epuɔ, mbɔ pɛ etsá á wɔ́p, efāʼ eshhʉ̄, tɛ pɔ́ evéŋ anu zɛ́. Pɛ eké ŋgē eghʉ épúp, ńnɔŋ mbɔ́kɔ ezɔp ntií. Ḿbá tɛ mbɔɔ menzhó mɔ́p, páʼ epe é lē mbū ŋkó éwú, éfhɔ́ɔ ánɛ menu tepɔŋ lā.

Lewuʼte Ndém ndɔk nzōko

²⁴ Awuʼte á egɔ́ á mbū ŋiŋ yīi, a kuūʼ á lekāpte á wɛ́ tɛ ŋgɔ́ yīi, ŋiŋ a gɔ le a mɛnzhɛ fāa. Ŋ́kápte á wɛ́, tɛ ŋgɔ́ yīi, pɛ e láʼ ege etshí á ntē shʉ́shɔ́k yí, énɔŋ ekáka, alɔ́ʼ á le ánɛ pɛ ɛ́.

²⁵ Á mbū ndaʼ Ndém yímpɛ, páʼ a le lɔ̄k á Yɛɛ́so Klísto Atsyapuɔ yímpɛ, ŋ́ghʉ̄, ḿpɛ tswɛ́t. Awuʼte a egɔ́ á mbū yí. Yí mé efɔ yímpɛ, mete e egɔ́ á mbū yí, yí mé pɔɔ́ŋ á lesāʼ á yímpɛ, tɛ efhó tɛ afʉʼ, mbɔɔ tsetsɔŋɔ, ŋgʉɔ ŋkó á meŋguʼ meŋguʼ. Á páʼa.