1 Kɔlɛŋte 1 - Eka Eswhī

Pɔ́ɔl á ega ntsāʼtɛ

¹ Meŋ Pɔ́ɔl, mbɔ Ndém a le tsɔ́ʼ á gá ánɛ lekɔŋ yi, ŋ́gɛ, meŋ ecʉ́ʼ á nziŋ‑ntō Yɛɛ́so Klísto, mbɔɔ méŋ mɔ́ yímpɛ Sostɛn, mé tíi akɛtte jʉɔ.

² Ńtíi á mbū alúŋ epɔ̄ Ndém zīi, á tésɔŋ Kɔlɛŋte, á wɛ́ pīi Ndém a le zapá ánɛ Yɛɛ́so Klísto, ŋ́ghʉ̄ pɛ ecʉ́ʼ epuɔ pí. A lɛɛ́ ntɔ́ŋɔ á wɛ́ ŋ́gɛ, pɛ ecʉ́ʼ epuɔ pí, pɛ a epuɔ metsem pīi, pɔ́ gʉɔ̄ tɛ ŋkó á akɔ̄ ajʉʼ lɛ́, ńtɔ́ŋ lezēŋ Atsyapuɔ Yɛɛ́so Klísto, á Atsyapuɔ wɔp, ńzéŋ ŋgɔ́ eyímpɛ.

³ Ŋ́gɛ Mɔʼɔ́ yímpɛ Ndém, pɔ́ Atsyapuɔ Yɛɛ́so Klísto, e eghʉ̄ anu mbɔŋ té ndhʉ ánɛ pɛ, ŋ́ghʉ̄ pɛ enáŋ mé apwɛne.

Menu mbɔŋ mīi Ndém a le tsīa ánɛ Yɛɛ́so ŋghʉ̄

⁴ Meŋ á si esyáknɛ á Ndém té ká á athū pɛ, melaʼ anu mbɔŋ té ndhʉ zīi, a á si ntsīa ánɛ Yɛɛ́so Klísto, ŋ́ghʉ̄ɛ ánɛ pɛ.

⁵ Ésyáknɛ épúp melaʼ mīi, Ndém a tsiā ánɛ Yɛɛ́so Klísto, ŋ́gyá á wɛ́ etsō mbɔŋ ntsem tɛ é záne. Ŋ́gyá á wɛ́ á leshūŋ ashuŋne zí, mbɔɔ á lejūʼ ashuŋne zí.

⁶ Ńzhɛ́ ŋ́gɛ, ashuŋne Yɛɛ́so Klísto zīi, meŋ nde shúŋ á wɛ́ lā, Ndém a ke ghʉ̄ʉ̄, pɛ chʉ́ nnɛ̄t ŋkúʼte mé taʼ ntē.

⁷ Ŋ́kúʼte tɛ amɔ̄ʼ ajūɔ mbɔŋ zīi, Ndém a gɔ eyá á mbū pɛ ndémndēm, á té zɛ́t á mbū pɛ ŋkíŋɛ ɛ́. Á wɛ́ pīi pɛ é si nzwíʼtɛ aleʼé zīi, Atsyapuɔ yímpɛ Yɛɛ́so Klísto, a a láʼ ezéŋ epiŋ nzem.

⁸ Yí mé e láʼ eghʉ, pɛ ekúʼte á anu zí, mé taʼ ntē tɛ nzōko. Tɛ́ a etsīa épúp, a eláʼ ŋgɔ́ á aleʼé zīi, a záʼa ntsaŋ ezɔp a epuɔ metsem, a enɔ̄ŋ le ndāʼa á wɛ́ ɛ́.

⁹ Ndém a le tɔ́ŋ á wɛ́, ŋ́gɛ pɛ a Méŋ yi Atsyapuɔ Yɛɛ́so Klísto, e ecʉ́ʼ á taʼ. A laʼneē akɔ̄ lɛ́, ńdáʼ ŋghʉ̄.

Tákátáká á ŋgyā alúŋ epuɔ Yɛɛ́so á Kɔlɛŋte

¹⁰ Epɔ̄ memía, meŋ á si ŋké mbiŋɛ esēmtɛ á wɛ́, ánɛ lezēŋ Atsyapuɔ yímpɛ Yɛɛ́so Klísto. Ŋ́gɛ pɛ egɔ́ á taʼ nchu. Ŋ́gɛ ndɛ́ʼ tákátáká, á gɔ́ á tsetsɛlɛ pɛ. Pɛ epú ncʉ́ʼ á taʼ ŋiŋ, ŋ́gɔ́ á taʼ ntē, ŋ́gwɛ̄ á taʼ akwaŋte.

¹¹ Epɔ̄ memía pá, meŋ ndʉ́ɛ́ páʼa melaʼ mīi, epuɔ mba Klowe, é ke shúŋ á gá ŋ́gɛ, tákátáká a á tsetsɛlɛ pɛ.

¹² Ńdɔkɔ ŋ́gɛ, emɔ̄ʼ epuɔ é nnɔ pɛ ndʉ́ɛ́ ŋ́gɛ: «Meŋ á ŋiŋ Pɔ́ɔl. » Emɔ̄ʼ é nɔŋ ŋ́gɛ: «Meŋ á ŋiŋ Apolos. Emɔ̄ʼ é nɔŋ ŋ́gɛ: «Meŋ á ŋiŋ Sefas. » Emɔ̄ʼ é nɔŋ ŋ́gɛ: «Meŋ á ŋiŋ Klísto. »

¹³ Á páʼā, Klísto á gɔ́ ŋgapte gapte lɛ́? Mɛ́ lɛɛ́ ŋgwáʼa ŋkwɛ̄tɛ á gá Pɔ́ɔl, ánɛ mbaŋne paŋné melaʼ mefa mɛ́ kɛ? Mɛ́ le wáʼa nnōʼ á wɛ́ á ntshi páʼā, áa ánɛ lezēŋ tsá, meŋ Pɔ́ɔl kɛ?

¹⁴ Ndém a á ghʉ, á gɔ́ yīi, meŋ ndɛ te tsɔ taʼ ŋiŋ nnɔ wɛ á ntshi nōoʼ, ńdaʼ Klispus pɔ́ Ŋgayus.

¹⁵ Á piŋɛ ŋgɔ́ épúp, mbɔ ŋiŋ a gɔ le lé ŋ́gɛ, meŋ nde nōʼ á yí á ntshi, ŋ́gɛ a egɔ́ á ŋiŋ nnɔ ga á.

¹⁶ Yééé, meŋ nde zéŋ nnoʼ epuɔ mba Stefanas á ntshi. Meŋ á kwaŋ ŋ́gɛ, meŋ ndɛ te pīŋ nzéŋ ńnōʼ mmɔʼ ŋiŋ ndɛʼɛ á ntshi ɛ́.

¹⁷ Klísto a lɛɛ́ te ntúɔ́ á gá ŋ́gɛ, meŋ egʉ̄ɔ nnōʼ epuɔ á ntshi ɛ́. A lɛɛ́ ntúɔ́ á gá ŋ́gɛ, meŋ egʉ̄ɔ ntswī ŋke mbɔŋ. Ŋ́ké ŋgē etswii, meŋ ńde zóko nnūʼu ashuŋne ɛ́, ḿbɔ́k á gá á leghʉ, mɛ́ le júʼ anu zīi, Klísto a le kwhʉ́ ánɛ mbaŋne paŋné páʼā, ńdɔkɔ ndʉ́ɛ́ ɛ́.

Yɛɛ́so a á si ŋgɔ́ á azhɛ̄‑anu zīi á fhó á mbū Ndém

¹⁸ Ŋke mbɔŋ yīi pek tswii, é fhó ánɛ páʼ Klísto a le kwhʉ́ ánɛ mbaŋne paŋné, é mbū epuɔ pīi, é ánɛ mɛnzhɛ lepī, ŋ́gɔ́ áa anu te methū. Ŋ́ké mbiŋ ŋ́gɔ́ á mbū epuɔ pīi, Ndém a lē ntshí á wɔ́p ánɛ mɛnzhɛ letswɛ̄t, á yímpɛ, Ndém á lɔkɔ nchʉ́ɛ nnɛ̄t, ńtswīi mete mí.

¹⁹ Meŋ ndʉ́ɛ́ páʼā melaʼ mīi, Ndém a le lé á ntē aŋwaʼne yí ŋ́gɛ: «Meŋ a shʉʼ eták azhɛ̄‑anu megaŋ azhɛ̄‑anu, épiŋ epík leghi megaŋ leghi. »

²⁰ Á piŋɛ ŋgɔ́ épúp, mbɔ megaŋ azhɛ̄‑anu é té ndɔ̄kɔ azhɛ̄‑anu ŋgʉ̄ɔ mé ajʉʼ ɛ́. Mbɔ wɔ kɛ́ʼte‑mbé Ndém, é té ndɔkɔ ŋgʉ̄ɔ mé ajʉʼ ɛ́. Mbɔ wɔ túŋ‑atseŋ anu, ánɛ leleŋ ŋgɔŋ cʉ̄ɔ, é té ndɔkɔ ŋgʉ̄ɔ mé ajʉʼ ɛ́. Á té páʼa, Ndém á lɔkɔ ŋghʉ̄ɛ, azhɛ̄‑anu ŋgɔŋ jʉɔ, á cʉ́ʼɛ áa apiá‑anu lɛ̄?

²¹ Páʼ epuɔ ŋgɔŋ puɔ, é kɛ te lɔ̄k azhɛ̄‑anu zɔ́p, éfhó ánɛ ajū mīi, Ndém a á lɔk azhɛ̄‑anu zí ŋghʉ̄, ḿvéŋ á yí lā, Ndém a á piŋ ŋkɔ̄ŋ á yí á lefhō ánɛ ŋke mbɔŋ yīi, pek tswii, pɔ́ piŋ nnɔ̄ŋ ntɔ́ŋɔ lɛ apiá‑anu, tɛ́ ŋghʉ̄, epuɔ pīi, pɔ́ é véŋ ŋke mɛ́t, e tswɛ́t.

²² Epuɔ Yúda é si ŋkía ŋkʉʼne menu, tɛ́ evéŋ ŋke mɛ́t. Epuɔ pīi é té epuɔ Yúda á, é nɔŋ ŋkɔ̄ŋɔ á lefhō ánɛ ashuŋne azhɛ̄‑anu, tɛ́ mvéŋ zɔ́p.

²³ Ŋ́ké ŋgɔ́ mé pek, mbɔ pek é si ntswīi ŋke mbɔŋ ánɛ Nzaʼ‑Ŋkhʉ, páʼ mɛ́ le kwɛtē á yí ánɛ mbaŋne paŋné. Ŋke mɛ́t, é gɔ́ á mbū epuɔ Yúda, ŋ́gɔ́ á nde anu. Ŋ́gɔ́ á mbū epuɔ pīi, é té epuɔ Yúda á, ŋ́gɔ́ áa anu te methū.

²⁴ Táʼ, ŋ́ké ŋgɔ́ á mbū epuɔ pīi, Ndém a le tɔ́ŋ á wɔ́p, tɛ a láʼa ŋgɔ́ á ŋiŋ Yúda kɛ́ á ŋiŋ yīi a te ŋiŋ Yúda á, mbɔ pɔ́ é si nzhɛ́ɛ á légɛ, Klísto mé si ntswīi mete Ndém, yí mé zéŋ nnɔ̄ŋ ntswīi azhɛ̄‑anu Ndém.

²⁵ Ajū mīi epuɔ menɔŋ é jʉɔ́ ŋ́gɛ, á anu te methū zīi, Ndém a ghʉɛ, azō mɛ́t á azhɛ̄‑anu, ńtɔ́k azhɛ̄‑anu epuɔ menɔŋ. Ajū mīi pɔ́ jʉɔ́, Ndém á ghʉ, pɔ́ gɛ á té azō ɔ́, azō mɛ́t, á teē ntsya azi, epuɔ menɔŋ é gɔ eghʉ̄ʉ.

Azhɛ̄‑anu pɔ́ atāk ánɛ alúŋ epɔ̄ Ndém

²⁶ Epɔ̄ memía, pɛ enáʼ ncʉte ńjʉ́ɔ, á wɛ́ pīi Ndém a le tɔ́ŋ á wɛ́. Epuɔ tɛ nzá é tsetsɛlɛ pɛ, pɔ́ té wɛ̄ á azhɛ̄‑anu, ánɛ eyi lejʉ̄ɔ epuɔ menɔŋ ɔ́. Epuɔ tɛ nzá, é té gɔ́ mete epuɔ ɔ́. Epuɔ tɛ nzá, é té ntúɔ́ ánɛ etseŋ ŋgyā memía epuɔ ɔ́.

²⁷ Táʼ, Ndém a le ké ŋkaŋ ajū mīi, epuɔ menɔŋ é ŋgɔŋ ega, ńjʉ́ɔ páʼ apiá‑anu lā, ńdɔk mmāʼ esē á athū megaŋ azhɛ̄‑anu. Ŋ́kāŋ epuɔ pīi, epuɔ menɔŋ é té lɔ̄k á wɔ́p ntɔ́ŋ azō á ŋgɔŋ ega á, ńdɔk mmāʼ esē á athū mete epuɔ.

²⁸ Ndém a le kāŋ epuɔ pīi, mɛ́ é ndo esī atsetsáʼ, ŋ́gwák á wɔ́p wáke, épuɔ pīi, mɛ́ té lɔ̄k á wɔ́p ntɔ́ŋ á azō ɔ́, épuɔ pīi, é zi mbú te etsō ɔ́, ńdɔk ŋkōk nzwiŋ epuɔ pīi, mɛ́ é nnɔŋ ndɔ̄kɔ á wɔ́p ntɔ́ŋɔ azō.

²⁹ Ŋ́ghʉ̄ɛ épúp, ńdɔkɔ ŋ́gɛ, ndɛ́ʼ ŋiŋ á pfeŋ á kíkhí á mvhɔ yí.

³⁰ Yí Ndém mé le tswāŋ á wɛ́ a Yɛɛ́so Klísto. Ŋ́ghʉ̄ɛ épúp páʼā, ŋ́gɛ Yɛɛ́so Klísto a egɔ́ á mbū pímpɛ, ŋ́gɔ́ á ŋiŋ yīi a zíʼnɛ azhɛ̄‑anu zīi, á fhɔ́ɔ á mbū yí Ndém. Á zeéŋ ŋgɔ́ melaʼ Yɛɛ́so mɛ́t, tɛ́ ḿpɛ é epuɔ ndeŋ ndeŋ á mvhɔ Ndém. Mbɔ Yɛɛ́so a le cūʼ á yímpɛ, ánɛ mefa, ḿpɛ é tswhi ŋgɔ́ epuɔ Ndém.

³¹ Ndém a lɛɛ́ ŋghʉɛ épúp páʼa, á gɔ́ páʼ mɛ́ le tí á nte aŋwaʼne yí ŋ́gɛ: «Ŋiŋ a nɔŋ mpfēŋɛ á kíkhí yi, á fhó áa ánɛ ajū mīi, Atsyapuɔ a le ghʉ̄ʉ̄, tɛ́ mpfēŋ. »