IFA̍YI̍LƐ̄MƆN 1 - Ye̳ka Onīpīpē̳ Yī O̳wo̳

Owu̍tu

¹ Ami Ipɔ̍ɔli nīi - oligbakɔbɔ wu̍chē yī Ikra̍yisi Iji̍sɔ̄ɔsi ma̍, ami ba̍la Iti̍mōti ɔɔ̍nɛ̍ yī alɔ ta̍ īpū nūma̍ tɛ̄rɔ̄ a̍nɛ. Alɔ tɛ̄rɔ̄ nūma̍ hu awɔ Ifa̍yi̍lɛ̄mɔn nīi - ɔya alɔ, gba̍a - olu̍ku̍rɔ̍ ūkpo̍he ba̍la alɔ ma̍.

² Ɛrɔ̄ nūma̍ gba̍a - iyī ogrēeyī yī āchɛ yī Ɔwɔ nīi kū la wɔlɛ̍ yī wɔ ma̍ nɛ; o̍ chī gba̍a - iyī A̍fiya nīi - ɔɔ̍nɛ̍ yī alɔ ɔnɔ̄nyā ma̍, ba̍la Aki̍pūusi nīi - ɔ̄chɛ ɔkplɛ̍wu̍ bāa alɔ ma̍ nɛ.

³ Ɔwɔ A̍dā yī alɔ ba̍la Iji̍sɔ̄ɔsi Ikra̍yisi nīi - Ādādā ma̍ ge̍ de ɔpiyɛ ba̍la ogbodɔ̍dɔ̍ de ala̍.

Ɔhɔtū ba̍la ɔtū ode chōche yī Ifa̍yi̍lɛ̄mɔn

⁴ Ifa̍yi̍lɛ̄mɔn ɔɔ̍nɛ̍ yī u! Myɛ̄grāa-myɛ̄grāa, n ē jɔhā de Ɔwɔ ē bla ē tū wɔ; n ē da ɔ̍ o̍be wu̍chē yī wɔ.

⁵ Wu̍chē oji̍ nɛ, n plɛ̍ɛ̄lā yī ɔhɔtū nīi a lɛ de āchɛ yī Ɔwɔ ma̍; n po̍ lɔkɔ nīi a de ɔtū che Ādā Iji̍sɔ̄ɔsi ma̍.

⁶ N yɛ ē jɔhā hīka lɛlā ūkpo̍he ūkpo̍he ɔyɔ̍ɔ̄ya̍ yī alɔ ba̍la awɔ nīi - āchɛ ode ɔtū che Ikra̍yisi ma̍ ge̍ tū wɔ wɔbɔ̄, ya̍ nīi a ā jo̍ōkū yī ochi̍chi̍ yī ɔpiyɛ ɔha̍lɔha̍ wa̍a̍ nīi alɔ ba̍la awɔ lɛ la ɔhɔ̄leyī nīi alɔ hɔ̄ ma̍ la Ikra̍yisi ma̍.

⁷ Ɔɔ̍nɛ̍ yī u ohiyumɔtū! Ɔhɔtū ɔla̍ā nīi a lɛ ma̍ ya̍ nīi n wɔ̄wīyā kpɛ̍ɛji; o̍ tū u yɛngrɔ̄ɔ gba̍a̍ mɛ̍. A de ūkpɔ̄tū onīpīpɛ̄ tū āchɛ yī Ɔwɔ ke̍e̍ mɛ̍.

Lɛlā yī Onɛ̍sīmusi

⁸ Bāa ɔɔ̍nɛ̍ yī wɔ la abɔ̄ yī Ikra̍yisi ma̍, n ge̍ē mlɔtū ka bɛ̍ɛ̄nɛ̄ hīka, i̍ngɛ̍ɛ̄nɛ̄ pi̍i̍ nīi a ge̍ē ya̍ a̍nɛ.

⁹ Ɔhɔtū i̍ chī chɛ̄ ni̍ ma̍, abɔ̄ nīi n ge̍ē ra̍ de wɔ a̍nɛ. Jo̍ōkū gɛ hīka, ami Ipɔ̍ɔli, ɔnyāku̍ ɔngrɔ̄ɔ nīi de pīya oligbakɔbɔ wu̍chē yī Ikra̍yisi Iji̍sɔ̄ɔsi ma̍ tɛ̄rɔ̄ nūma̍ a̍nɛ.

¹⁰ N yɛ ē ra̍ābɔ̄ de wɔ u̍ma̍ama wu̍chē yī Onɛ̍sīmusi, ɔyi̍ yī u la abɔ̄ yī Ikra̍yisi. N de pīya a̍dā yī nū amu la ɛbɛ nīi n tū igbakɔbɔ ma̍ mɛ̍.

¹¹ I̍gbi̍chɛ, Onɛ̍sīmusi nūma̍ i̍ ɔjɔ̄jā ɔlamu ɔlamu de wɔ ni̍; u̍ma̍ama, ɔ̄chɛ ɔlamu ɔlamu de awɔ ba̍la ami nɛ.

¹² N de ɔ̍ tɛ̄rɔ̄ yɛ abɔ̍ɔ yewā dikpo̍ ē ba̍ wɔ mɛ̍. O̍ lɛ bɔ̄ɔjā nīi ūkpɔ̄tū yī u nīi n de tɛ̄rɔ̄ a̍nɛ ma̍.

¹³ U̍ma̍ama nīi n tū ma̍ la igbakɔbɔ wu̍chē yī Wɔ̄kā Ɔlwɔnyɛ yī Ɔwɔ ma̍, o̍ hla̍ ami nīi n ge̍ ku̍ ɔ̄ hɔ̄ amu nīi o̍ ge̍ bī hɔ̄ tū u wɔbɔ̄ kulɛhu̍ yī wɔ.

¹⁴ N i̍ chikpo̍ ge̍ē ku̍ wɔ wɔhu̍ wɔhu̍ la wɔbɔ̄ otū um otōtū ni̍. N chikpo̍ nīi a ge̍ ya̍ i̍ngɔ̍ɔ la abɔ̄ yī awɔ ɔlɔjā. N i̍ ge̍ē ya̍ lɛlɛ̄lā i̍ngɔ̍ɔ ni̍, ɔ̍chi̍kpa̍kpa̍ awɔ ɔlɔjā chɛ̄ o̍bū.

¹⁵ Ɔha̍ni̍, Onɛ̍sīmusi pīya hī wɔ yɛ̄grāa ɔha̍ pi̍nyɛ̍ hɛ̄ɛbɛ nīi o̍ ge̍ē ku̍chē wā dikpo̍ ē ba̍ wɔ ge̍ē hɔ̄ ku yɛ̄grāa ɔha̍lɔha̍ bɛ̍ɛ̄nɛ̄ bɛ̍ɛ!

¹⁶ U̍ma̍ama nūma̍, Onɛ̍sīmusi i̍ ɔfiyɛ ɔbɔbɔ ji gɛ ni̍; ɔ̄chɛ ɔlamu ɔlamu hi̍ ɔfiyɛ ji nɛ. Ɔɔ̍nɛ̍ yī alɔ lēchi̍ lēchi̍ la abɔ̄ yī Ikra̍yisi nɛ. Ɔ̄chɛ ɔlamu ɔlamu gba̍a̍ de u nɛ. Awɔ kpɛ̍ɛ nīi o̍ chī ge̍ē wɛ ɔ̄chɛ ɔlamu ɔlamu ē de wɔ we̍ a̍nɛ. Wu̍chē oji̍ nɛ, ɔfiyɛ yī wɔ nɛ, o̍ chī gba̍a - ɔɔ̍nɛ̍ yī wɔ la abɔ̄ yī Ādādā yī alɔ nɛ.

¹⁷ A ge̍ nāa ami bāa ikoni̍ yī wɔ ma̍, ɔ̍lɔma̍ ku̍ ɔ̄ ba̍ ɔtū lɔkɔ nīi a ke̍ ge̍ ku̍ ami ba̍ ɔtū ma̍.

¹⁸ O̍ ge̍ ya̍ wɔ lɛlā abi̍ ɔha̍ kɛ̄ɛ dɛ̄ wɔ ure̍ ɔha̍, ka nīi ami ē kla̍ awɔ ure̍.

¹⁹ Ɛbɛ nūma̍, n ge̍ē ta̍ īpū yī nū la abɔ̄ yī ami ɔlɔjā: AMI IPƆ̍ƆLI GE̍Ē KLA̍ URE̍. N i̍ chī ge̍ē bla awɔ ɔbɔ̄bla ē gɛ ni̍ mɛ̍ɛ̍. A dɛ̄ um ure̍ yī lɛlā wu̍chē yī ɔhɔ̄leyī yī awɔ ɔlɔjā pi̍i̍.

²⁰ Ɔɔ̍nɛ̍ yī u ɔnɔ̄ngrɔ̄ɔ, chu̍chu̍u wu̍chē yī Ādādā ɔlɔjā nīi a ā tū u wɔbɔ̄. Ya̍ i̍ngɔ̍ɔ lɛbɛ nīi a ā de ūkpɔ̄tū onīpīpɛ̄ tū ami ɔɔ̍nɛ̍ yī wɔ la abɔ̄ yī Ikra̍yisi.

²¹ N jo̍ōkū gblɛ̍ɛgblɛ̍ɛ hīka a ge̍ē ya̍ lɔkɔ nīi n ka ma̍, anu̍ nīi ta̍ īpū nūma̍ a̍nɛ. N u̍tu jo̍ōkū ka a ge̍ē ya̍ gla i̍ngɔ̍ɔ ē ta̍ pɛtɛpɛtɛ.

²² Ɔha̍ nīi n gba̍a chikpo̍ ma̍, gāla̍ ɛbɛ otōtū ɔha̍ lā abɔ̍ɔ tīgbē yī u. N yɛ amu deyīche hīka Ɔwɔ ge̍ē po̍ ɔhā yī ala̍ wa̍a̍, o̍ ge̍ ku̍chē la ami ē de ala̍.

Ɔma̍kpɔɔ

²³ Ɛpa̍frāasi nīi tū amu la igbakɔbɔ ba̍la ami wu̍chē yī Ikra̍yisi ma̍ tɛ̄rɔ̄ yī ɔma̍kpɔɔ hu wɔ.

²⁴ Ima̍aki, ba̍la Ari̍si̍tākusi, ba̍la Idɛ̍māasi ba̍la Ilu̍uku, aa̍ nūma̍ wa̍a̍ nīi alu̍ku̍rɔ̍ ūkpo̍he ūkpo̍he ba̍la ami ma̍ tɛ̄rɔ̄ yī ɔma̍kpɔɔ hu wɔ i̍ngi̍ngɔ̍ɔ.

²⁵ Ɔpiyɛ yī Iji̍sɔ̄ɔsi Ikra̍yisi nīi - Ādādā ma̍ ge̍ hɔ̄ ba̍la ala̍ wa̍a̍.