Ejē Ɔkɔ̄kā 1 - YƐKA ONĪPĪPƐ̄ YĪ ƆWƆ BA̍LA EJĒ ƆKƆ̄KĀ

RIBI OMO̍HE ( 1—41 ) A̍hōhi olēchi̍ lēchi̍

¹ A̍hōhi ge̍ - iyī āchɛ nīi hi̍hi̍yo̍ yī obu̍tū yī āchɛ ɔdwɔ̄bi̍-lɛlā ma̍. Aa̍ nīi i̍ chɛ̄ ga la ɔgulɛ̄lā yī āchɛ ɛyɛ̍ɛ̄lā abi̍ ɛla̍ā ni̍ ma̍. Aa̍ nīi i̍ chɛ̄ trīibi yī āchɛ ɛnāa lɛlā yī Ɔwɔ fi̍yaa ni̍ ma̍.

² Aa̍ ma̍, Lihɔ yī Ɔwɔ Ādādā lɛ wa̍ wɔnyɔnyɛ la ode gbōgbō: Yɛnɔ-lotu̍, anu̍ nīi āchɛ eli̍ngɔ̍ɔ ē bī ro̍ōre̍, gwɔ̍ɔ̄gwa̍ a̍nɛ.

³ Lɛlā yī āchɛ eli̍ngɔ̍ɔ lɛ bāa ɔchi̍ nīi bū rɛ la oko̍o yī ɔkpa̍ ma̍: Ɔchi̍ nīi īpū yī nū rōrū chweri̍chweri̍ myɛ̄grāa-myɛ̄grāa ma̍. Ɔchi̍ nīi yɛ ē wa̍ īkpō yī nū hwɔhi hwɔhi yɛ̄gɛ̄grāa yī nū ma̍. Ɔjāha̍-ɔjāha̍ wa̍a̍ nīi āchɛ eli̍ngɔ̍ɔ ē ya̍ ma̍ ē ngmo̍okro de wa̍ ke̍e̍.

⁴ Lɛlā yī āchɛ ɔdwɔ̄bi̍-lɛlā ma̍ lɛ i̍ngɔ̍ɔ ni̍ lachi̍lachi̍. Aa̍ ma̍ lɛ ke̍e̍ bāa a̍chra̍ yī igu nīi ahuhu ē gwō hunū ma̍.

⁵ Āchɛ ɔdwɔ̄bi̍-lɛlā wa̍a̍, Ɔwɔ ge̍ē hɛ̍ wā lɛpɔ̄ ɔdwɔ̄bi̍ ɔdwɔnyɛ. Āchɛ ɔyɛ̍ɛ̄lā abi̍ i̍ ge̍ē gatū la ogrēeyī yī āchɛ ɔnɛ̄ɛhɛhi yī Ɔwɔ ni̍.

⁶ Ɔwɔ Ādādā je̍ ɔgulɛ̄lā yī āchɛ ɔnɛ̄ɛhɛhi wa̍a̍ gihi gɔbū. Iyī āchɛ ɔdwɔ̄bi̍-lɛlā ma̍, e̍ gblāa la ode chāajɛ kpɛɛ ojōjī.