Sɛ́ag 1 - Nɛsɔ́g nɛ́ Nɛwa

¹ Mɛ Sɛ́ag nyɔ́ ndɛɛ́ uʼkudin o Táán na o Sə́dúk Yə́sus Kilíʼtus, mbə́busóyídi pəŋi pɔɔ́n pá Táán pá poɛ́gólɛ́gɛd agɛɛnan a mɔnɔŋ miim má a nsí aá!

Mɔɔd nyɔ́ amáág oʼto na Táán, Táán alɛ́ɛ́ kumuúloodi ngə́

² Pomóŋŋí, ntɔ́b ngim yɛ́ yaáboóboan, púsiəd yɛ́lɛ́ na tɔnyɔ́g

³ lɛ́ kaag oʼto koáŋan kóog náan na Táán a ntɔ́b yɛ́ɛy kóaboyɛ́ɛlɛ lɛ́ pógon.

⁴ Pónóʼtan ntɔ́b yɛ́ɛy ná póan pɔɔd fɔ́lɔ́b, ntɛ́m yaaŋan ɛ́yɛɛn mmoáŋáán.

⁵ A ondáŋ wááŋan, sɔ́g nyɔ́ adɛálɛŋɛɛ́ nkə kɛ́ alɛɛ́ agɛɛlɛ, ə́ŋíən nsiŋ na Táán, aamoyɛ́ʼkɛn lɛ́ nyɔ́lɛ́ alɛ aŋáan na ungim, adɛábɛn nyɔ́ əmə́muŋíən yoom.

⁶ Kɛ́lɛ lɛ́, mɔɔd əə́ndəŋíən yoom na Táán, áyaŋ əgəə́liʼtini a ɔʼtɛ́m wə́ə́ŋ lɛ́ ɔɔ́ʼkɔɔŋ yɛ́lɛ́, adɛnjɛ́ɛ́n na isuŋ a ɔʼtɛ́m. Nyɔ́ alɛɛ́ na isuŋ alɛ wɔnɔ́ kɛsaángaa kɛ́ ɔfɛfɛm ólɛɛ́ əgiim úfióŋi lɛ́ ná wáafɛmɛd a ɛbá yɛ́ɛnɛ, kɛsaángaa kɛ́yɛɛn tɛn kɔ. Úməʼkimbuúlini, kɛ́lɛ́ tɛn kíyimbuúlini.

⁷ Ombod ó mɔɔd wɔnɔ́ wóow náan ódɛnjáyáágɛ́ɛ́ a oʼto lɛ́ Sə́dúk alɛ́ɛ́ komoyɛ́ʼkɛn yoom na yoom

⁸ lɛ́ nyɔ́lɛ́ oʼkóodi oʼtɛ́lɛm ɔmbɔ́ úmmuʼ. Alɛ lɛ́, amaʼkodagɛdɛ ongoo úmmuʼ yuudi, ə́yiʼkini kusúid kə́mmú ngim.

Ndə́b a noá na tugúm

⁹ Wɛ ungəə́liʼtiniʼ nyɔ́ olɛɛ́ na osog, odɛnjááŋ lɛ́ wɔnɔ́ ná olɛɛ́ na osog, ndóo. Táán agoyɛ́ngɛ́gɛ́nɛn tugúm a mɔɛn.

¹⁰ Wɛ nyɔ́ olɛɛ́ na tugúm, nyɔ́ga lɛ́ Táán amágoyɛ́ʼkɛn ɔʼtɛ́m ó kəə́suuli nkó a nsí. Kɛ́lɛ lɛ́, omálɛ́ŋɛ́ɛ́ lɛ́ olɛ́ɛ́ kugu wɔnɔ́ ná ándɛ mbɛ́n yaáyómbɛlɛd.

¹¹ Əgín wɔnɔ́ ná kɛ́lɛanɛɛ́ lɛ́, ɔmbɔ́ ombɛ́n ódɛ́ɛ́ tuə́, ná yoóy yáalon na toɛn, wáayómbɛlɛd, pɛsam pɛ́ság kudə́əŋ a nsí, kɔdɛ́ɛ kuə́ŋ tɛn koáman Yoom ímuʼ tɛn náan aa mɔɔd o tugúm alɛ́ɛ́ komanɛɛ́. Kugu kólɛ́ɛ́ kumuúsiəd nyɔ́lɛ́ a maʼtom mə́ə́ŋ kɛɛlɛ.

Ndə́b a noá na pɛásɔ́sɛ́n pɛ́ pɛ́lɛ́ɛ́ kibiyíimin

¹² Kɔŋɛʼ na mɔɔd nyɔ́ adɛndɛ́ɛ́ kudə́ŋií a pɛásɔ́sɛ́n lɛ́ ná pɛásɔ́sɛ́n pɛ́ɛb pɛ́aman, Táán aamoyɛ́ʼkɛn pɛsáábɔ́n pɛ́ yɛɛ́gágɛn na ungim nyɔ́ alɛɛ́ na nnyɔ́ŋánán na nyɔ́lɛ́. Ɔlaa áa alɛ́ɛ́ komoyɛ́ʼkɛnɛɛ́ a pɛsáábɔ́n pɛ́ɛb.

¹³ Kɛnɛŋ kɛ́ pɛásɔ́sɛ́n pɛ́lɛɛ́ əguyə́njən mɔɔd, mɔɔd nyóon ədisə́ə́ lɛ́ Táán áa alɛɛ́ agomoásɔsɛn, ndóo! Táán adɛágaásɔsɛn mɔɔd lɛ́ nyɔ́lɛ́nyɔ́amɔɛ́d pɛásɔ́sɛ́n pɛ́dɛɔ́gɔ pɛ́gomodɔ́bɔ.

¹⁴ Mafɛgaʼ má mabɛ́ má málɛɛ́ na mɔɔd a ɔʼtɛ́m áa mə́əmudíʼkəni lɛ́ ə́də́əŋ a kɔbɛ́.

¹⁵ Kɛnɛŋ kɛ́ mɔɔd əə́yə́ən mafɛgaʼ má mabɛ́ má málɛɛ́ na nyɔ́lɛ́ a ɔʼtɛ́m, əədə́əŋ a kɔbɛ́. Kɛnɛŋ kɛ́ əə́ʼkudə́ŋií anɛ́ɛ́n náan a kólɛ́ áság kosongɛlɛd tɛn kɔ. Pɛsáábɔ́n tɛn pɛ́ kɔbɛ́ a pɛ́ɛb pɛ́lɛɛ́ kugu kó pɛnɛŋ piim.

¹⁶ Pəŋi pomóŋŋí páam pá ɔʼtɛ́m, pudiyə́lígə́ə́ pəŋibáamɔɛ́d.

¹⁷ Yoom yiim ɛ́laŋ yɛ́ tɛɔ́gɔɔŋ ɛ́lɛ əgiim a mɔɛn. Ɛ́lɛ əgiim na Táán Sɛ wəəs nyɔ́ ayɛ́ɛ́lɛ moom móonɛ lɛ́: Wɔɔ́s, wəə́ na muə́dədəʼ. Táán nyɔ́ ɔdɛɔ́gɔ ugibidúminií ngim, ədibiidí a mbin.

¹⁸ Yɛɛ́nyɔ́ŋɛn nyɔ́lɛ́nyɔ́amɔɛ́d lɛ́ ábɛyɛ́ʼkɛn ɔlaa a nɔgɛ́ɛ́ nuə́ŋ nó fɔ́lɔ́b nó ayɛ́bɛdɛánɛ. Ayɛ́ɛ́lɛ náan agɛɛlɛ lɛ́ tíɛn na oʼto na oʼto a yoom yiim yɛ́ ayɛ́ɛ́lɛ.

Mɔɔd ogóódi koob, áyɛɛlɛ nkə kɛ́ kɛ́lɛɛ́ kɔ

¹⁹ Pomóŋŋí páam pá ɔʼtɛ́m, Pudinjə́bə́líí nkə kɛ́ɛnɛ kɛ́ mbándabodɛ́anɛɛ́ nyɔʼkɔ́: Mɔɔd alɛ agosɔyɔ, pódam ntóɛŋ kɔŋɛʼ kɔŋɛʼ agoob nkə kɛ́ alɛɛ́ əgusəə. Podɛmbɔ́gɔ́nɔn tɔgɛ́ɛ́, pudiyə́bísígíí tɛn koob ilúún

²⁰ lɛ́ kɛnɛŋ kɛ́ mɔɔd aáʼkoóbɛ́ɛ́ ilúún, adɛágɛɛlɛ kə́mmú nkə kɛ́ kɛ́lɛɛ́ sáád a əngis á Táán.

²¹ Kólɛ́ aa ndábodɛ́anɛ na pəŋi nyɔʼkɔ́: Tíən pɛbán pɛ́ pɛbɛ́ piim pɛ́ pɛ́lɛɛ́ na pəŋi a ntɛ́m. Pudiyíʼkíni kɛɛlanɛ kɔbɛ́ kə́mmú. Ə́súlíən nkó a nsí, púsiəd tɔgɛ́ɛ́ tó Táán tó tólɛɛ́ a ntɛ́m yaaŋan. Túgóódi toɛn tógɔɔyɛ məŋun mááŋan.

²² Podɛnjóób koóbáán Tɔsɔm tó Táán na ntóɛŋ. Ɛlɛ́an nkə kɛ́ tóabodɛ́anɛ. Wɛ nyɔ́ waágoob tólɛ́ koóbáán na ntóɛŋ odiɛlɛ nkə kɛ́ kɛ́lɛɛ́ kɔ, wɛ nyóon umə́lígə́ə́ wɛɛ́nyɔ́amɔɛ́d.

²³ Mɔɔd nyɔ́ alɛɛ́ agoob koóbáán Tɔsɔm tó Táán na ntóɛŋ, adiɛlɛ nkə kɛ́ kɛ́lɛɛ́ kɔ, nyóon alɛ wɔnɔ́ mɔɔd nyɔ́ aádɛ́lɛm agaádɛ́ʼtɛg wɔnɔ́ ná alɛɛ́ a wəə́.

²⁴ Ná yɛɛ́mán kaádɛ́ʼtɛg, aáság kosan. A ngim yɛ́ɛy, wɔnɔ́ ná əndigií na wəə́ a udi wə́ə́ŋ, ədiə́giiʼkini kaálɛŋ wɔnɔ́ ná alɛɛ́.

²⁵ Náa, mɔɔd oʼkóodi kɛɛn əgín lɛ́ amaʼkoob pɛcɛm, kiə́ŋ kɛáman, kɛnɛŋ sɔɔŋ əmə́bə́líí, ndóo! Kíəguunə lɛ́ yɛ́ngɛg pɛ́lɛ́. Nyɔ́ alɛɛ́ əguunə kolɛŋ koob nkə kɛ́ kɛ́lɛɛ́ a pɛcɛm pɛ́ Táán, aágɛɛ́ngɛg pɛ́lɛ́ na toɛn, nyóon, Táán alɛ́ɛ́ komosáábɔn a niɛlɛʼ niə́ŋ nɛ́ɛn lɛ́ pɛcɛm piə́ŋ pɛ́lɛ pɛcɛm pɛ́ pɛ́lɛɛ́ pɛŋɛʼ agaáyɛn náan. Pɛ́lɛ pɛcɛm pɛ́ pɛ́abɛyááŋɛn.

²⁶ Kɛnɛŋ kɛ́ mɔɔd əmə́sə́líí lɛ́ nyɔ́lɛ́ alɛ ungəə́liʼtiniʼ o fɔ́lɔ́b náa ɔdɛɔ́gɔ əgunuŋií nɔmɛm nuə́ŋ, ɔɔ́sɔyɔ pɛbán pɛ́ pɛ́dɛɔ́gɔ pɛŋɛʼ, nyóon álɛŋ lɛ́ alɛ əgəə́lígə nyɔ́lɛ́nyɔ́amɔɛ́d. Kəə́liʼtiniʼ kuə́ŋ kólɛ iyó.

²⁷ Taa pigólí pɛ́ mɔɔd nyɔ́ alɛɛ́ əgəə́liʼtini Táán Sɛ aa pɛ́ɛnɛ pɛ́lɛɛ́ lɛ́: Odɛʼtó mɔɔ́n wo nsí, ɔmbɔ́ tɛn kidí kɛ́ ɔʼkɛ́ɛd a ntɔ́b yɔɔbɔn Ə́núŋíí agɛɛlɛ lɛ́ pɛbán pɛ́ pɛbɛ́ pá a nsí yɛ́ɛnɛ pídiígudə́ə́ŋi a kɔbɛ́. Táá pɛbán pɛ́ píəgə́mmi Táán a pɛ́ɛb.