Ɔlɔ́ma 1 - Nɛsɔ́g nɛ́ Nɛwa

Póol əyə́ʼtúmíí nufuuʼ nuə́ŋ na pisoyidiʼ

¹ Pomóŋŋí, mɛ Póol, uʼkudin o Yə́sus Kilíʼtus aa mbə́budílən nufuuʼ nóonɛ. Táán ayɛ́ʼtɔ́ŋɔn lɛ́ nyɛ́ɛn mɔɔ́n o maʼtom, əmə́yiʼtə́nigi lɛ́ ndɔɛgɛ Tɔsɔm tuə́ŋ Tólaŋ.

² Tɔsɔm Tólaŋ tógo tóod, ayɛ́bɛgágɛn tólɛ́ əgín kɔ́gɔ́ɔg kalaʼ a Pagálaʼtaʼ pá Táán, a unuʼ ó palɔɛgɛʼ pɛbán pə́ə́ŋ

^3-4 Tólɛ əgusəə kɛbán kɛ́ mɔɔ́n wəəŋ, Sə́dúk wəəs Yə́sus Kilíʼtus nyɔ́ əyə́biə́níí a noá na mɔɔd, a yoog ɛ pɔɔd yɛ nkúm Tə́fid. A ngim yɛ́ɛy ná ayɛ́ɛ əə́ʼkiim yóndɛg a pɛlóŋ, Sɛ əyímulígígi a oʼkɔɔ wə́ə́ŋ ó mɔɔ́n ó Táán a toɛn tó Uŋun wó Ufúlúʼtú.

⁵ Táán ayɛ́ʼtɛ́ɛ́lɛn ɔʼtɛ́m lɛ́ nyɛ́ɛn mɔɔ́n o maʼtom agɛɛlɛ lɛ́ pɔɔd pá a mɔnɔŋ miim páág oʼto na nyɔ́lɛ́, pálɛ pámoyóbɛn, pálɛ pányáadɛ niiŋ niə́ŋ.

⁶ Pəŋi polɛ tɛn a ondáŋ ó mɔnɔŋ móom, pəŋi pá Yə́sus Kilíʼtus ayɛ́boodɔ́ŋɔn.

⁷ Pəŋi piim pá polɛɛ́ a Ɔlɔ́ma, pəŋi aa mbə́budílən nufuuʼ nóonɛ, pəŋi piim pá Táán alɛɛ́ agobonyɔ́ŋɛn. Ayɛ́boodɔ́ŋɔn lɛ́ ná póɛn tə́ngə́d a oʼto wə́ə́ŋ. Táán Sɛ wəəs pɔ́lɛ́ na Yə́sus Kilíʼtus Sə́dúk wəəs páboyɛ́ɛlɛ kɔŋɛʼ á! Páboyɛ́ʼkɛn tɛn kiwiiyiʼ á!

Póol alɛ anyɔ́ŋɛn lɛ́ ná amɛ́ɛn adála pəə́liʼtiniʼ pá a Ɔlɔ́ma

⁸ Kɛ́ na oʼto na oʼto, ndɛ agɛɛ́ʼkɛn pisoyidiʼ na Táán waam a kidíídí kɛáŋan kɛ́ pəŋi piim lɛ́ pálɛ agosɔyɔ nsí ngim wɔnɔ́ ná poágɛ́nɛ́ɛ́ oʼto na nyɔ́lɛ́. Mbámoyɛ́ʼkɛn pɛ́lɛ́ a ngim ɛ Yə́sus Kilíʼtus.

⁹ Táán nyɔ́ ndɛɛ́ əgugudin na ɔʼtɛ́m wáam ungim kɛnɛŋ kɛ́ ndɛɛ́ alɔɛgɛ Tɔsɔm Tólaŋ tó túəsəə kɛbán kɛ́ mɔɔ́n wəəŋ, nyɔ́lɛ́ aálɛŋ lɛ́ nkə kɛ́ɛnɛ kɛ́ ndə́əsəə kɛ́lɛ fɔ́lɔ́b. Kɛ́lɛ lɛ́: Kɛnɛŋ kɛ́ ndɛ ɔgɔɔ́sɔ́gɔlɔn Táán, ntɛɔ́gɔ əgubuyə́bəli, ndɛ əbuŋən niiŋ nɛáŋan pɛnɛŋ piim,

¹⁰ ndáamoyɔ́sɔ́gɔlɔn tɛn pɛnɛŋ piim lɛ́ amaʼkɔnyɔ́ga, aagɛnyɛɛ́ʼkɛn ngə́ anɛ́ɛ́n lɛ́ nyíim, lɛ́ pɛ́go pɛ́ ndɛɛ́ agobóŋan yɛ́lɛ́, ntɛɔ́gɔ ɔɔgɔɔŋ.

¹¹ Kɛ́lɛ lɛ́, ɔʼtɛ́m wáam ungim ólɛ káag na pəŋi, əgín lɛ́ ná mbíim aboodála, mpoosánɛnɛ nkə kɛ́ Uŋun wó Ufúlúʼtú wáagɛɛ́ʼkɛnanan ná póɔŋ toɛn lɛ́ pógon,

¹² ɔmbɔ́ lɛ́, tísəə agá tɛɔʼkɔ́, ná ndə́giim káag ná polɛɛ́, kəə́liʼtiniʼ kó kólɛɛ́ na pəsi piim lɛ́ na mɛɛ́nyɔ́amɔɛ́d na pəŋi, kóbɛgónɛ pəsi piim nkó.

¹³ Pomóŋŋí, ndɛ anyɔ́ŋɛn lɛ́ pólɛŋ poɔʼkɔ́, pɛnɛŋ piíŋ áa Njúúnə ngə́ lɛ́ nyíim aboodála, ntɛɔ́ŋ əgiig na nɛ́gɔŋ kɛ́. Ɔʼtɛ́m wáam ólɛ lɛ́ ná pigólí pɛ́am pɛálón na kɛsom a pəŋi wɔnɔ́ ná pɛ́ njɛ́ɛ́lɛ a mɔnɔŋ mɛ́ndɛ́ŋ pɛ́ɛ́lón na kɛsom.

¹⁴ Oʼtom wóonɛ ólɛ na mɛ nkódánán lɛ́ nyɛ́ɛn agɛɛlɛ wólɛ́ pɛnɔ piim lɛ́ na pɛnɔɔŋɛʼ kɛ́, na pá páʼkaáyásɛnɛɛ́ əngis, na pá pə́ligíí a mbin, na pá pámáaʼkan kɛ́fɔlɛ́, nyɛɛn tɛn ɔmbɔ́ na pá pándɛŋɛnɛɛ́ yoom na yoom.

¹⁵ A kólɛ́ aa ɔʼtɛ́m wáam ólɛɛ́ ɔgɔ́lɔ əgín lɛ́ ná mbíim aboólɔɛgɛnɛ tɛn pəŋi pá polɛɛ́ a Ɔlɔ́ma, Tɔsɔm Tólaŋ.

Toɛn tó Táán tólɛ a Tɔsɔm Tólaŋ

¹⁶ Ntɛɔ́gɔ agaaŋ kolɔɛgɛ Tɔsɔm Tólaŋ. A tólɛ́ aa toɛn tó Táán tólɛɛ́, toɛn tuə́ŋ tó tóɔgɔɔyɛ ungim nyɔ́ amáág oʼto na Yə́sus Kilíʼtus, kəə́bə́ə́ a Yúdɛn, agɛɛnanan anɛ́ɛ́n a pɛnɔɔŋɛʼ.

¹⁷ Kɛ́lɛ lɛ́, Tɔsɔm Tólaŋ tólɛ agɛbɛyásɛnɛn lɛ́ ngə́ yɛ́ Táán aágɛɛ́ʼkɛn pɔɔd kilumiʼ ɛlɛ mmuʼ súg. Ɛlɛ əgín lɛ́ páág oʼto na Yə́sus Kilíʼtus, las aa yɛ́ɛy lɛ́ náan aa kɛ́lɛɛ́ kidiídílə́ a Kálaʼtaʼ ɛ Táán. Kɛ́lɛ kɔ kidiídílə́ lɛ́: «Nyɔ́ amáág oʼto na nyɔ́lɛ́ Táán áa alɛ́ɛ́ kɛɛnɛɛ́ na kilumiʼ a udi wə́ə́ŋ, áyɛɛn na ɔlaa ó pɛnɛŋ piim»

Ungim alɛ na nsɔ́ɔ́ lɛ́ ayɛ́ɛ́lɛ kɔbɛ́

¹⁸ Kɔ́gɔ́ɔg a mɔɛn, Táán oóloodi lɛ́ nyɔ́lɛ́ adɛányɔ́ga na kɔbɛ́ kuim, annyɔ́ga na nkə kiim kɛ́ kɛ́dɛɔ́gɔ sáád kɛ́ pɔɔd páagɛɛlanɛ. Pɛbán pɛɔ́bɔn pɛ́ɛb aa píəgúbə pafɔ́lɔ́b lɛ́ pádɛndón táán.

¹⁹ Pɔ́lɛ́ páálɛŋ moááŋ nkə kɛ́ mɔɔd ogódíí lɛ́ álɛŋ a noá na Táán lɛ́ əyíbulóódi kɛ́lɛ́ əgín náanɛ moááŋ.

²⁰ Kɛ́lɛ lɛ́, kɔ́gɔ́ɔg pɛ́ nsí ɛyásáŋɛ́ɛ́, mɔɔd adɛ́ʼtála na əngis yə́ə́ŋ, toɛn tó Táán tó tólɛɛ́ a pəliə́g, na nkə kɛ́ nyɔ́lɛ́nyɔ́amɔɛ́d Táán alɛɛ́. Náa, nkə kɛ́ɛg kiim kɛ́lɛ agodɛ́ʼtɛganan a nkə kɛ́ ayɛ́ɛ́lɛ. Ngə́ ɛ mɔɔd kusəə lɛ́ nyɔ́lɛ́ andɛŋɛn Táán ɛdɛɔ́gɔ.

²¹ Kɛ́lɛ lɛ́: Páálɛŋ Táán, náa pádɛányɔ́ŋɛnɛɛ́ komonyáadɛ, pádɛmoyɛ́ʼkɛn tɛn pisoyidiʼ. Kɔmɔɛ́d lɛ́ nkə kɛ́ kɛ́lɛɛ́ lɛ́ pámoyɛ́ɛlɛnɛ aa kɛ́ɛg. Mafɛgaʼ mɔ́ɔ́bɔn málɛ agá a pɛbán pɛ́ náan iyó, əngis yɔ́ɔ́bɔn na mbin, mafɛgaʼ mɔ́ɔ́bɔn na puyəgí.

²² Pálɛ əgusəə lɛ́ pɔ́lɛ́ pálɛ na nsiŋ, pádɛálɛ́ŋɛ́ɛ́ lɛ́ pándɛ agá piyəg.

²³ Pánnyáádɛ Táán nyɔ́ alɛɛ́ na nugəm, Táán nyɔ́ adɛndɛ́ɛ́ kugúú, pálɛ agá agɔnyáadanɛ moom mó mólɛɛ́ lɛ́ múəgu na koany. Páanyáadɛ moom mó pɔɔd páámaá komaán na ombɔg yɔ́ɔ́bɔn, náanɛ wɔnɔ́ pílíngə́lingə pɛ́ pɔɔd, na pɛ́ pɛsag, na pɛ́ ponyam, na pɛ́ nkud

²⁴ Kólɛ́ aa Táán əyíbudíin ngə́ lɛ́ pɛ́ɛn yuudi na pɛbán pɛɔ́bɔn pɛ́ pɛbɛ́ kɛɛlɛ, wɔnɔ́ ná pógódíí njaan ɛgɛɛlɛ pɛ́lɛ́. Náan pálɛ əgufiləni nkó yɔɔbɔn pɔ́lɛ́báamɔɛ́d na pɛbán pɛ́ masɔɔ pɛ́ páagɛɛlanɛ.

²⁵ Pə́ʼkudum ngim na ngə́ ɛ pafɔ́lɔ́b pamɔɛ́d pá Táán, pə́ndəyə́ən agá ngə́ ɛ pɛnyaʼ. Pɛ́ɛ́nyáádɛ agá moom mó Táán ayɛ́ɛ́lɛ, pə́əgudin mólɛ́, pə́ə́dí Táán nyɔ́ ayɛ́ɛ́lɛ moom móom muim, pádɛmonyáádɛ, nyɔ́lɛ́ nyɔ́ alɛɛ́ lɛ́ pámonyáadɛ a pɛnɛŋ piim. Aamɛn.

²⁶ Əgín tɛn a oʼto wóow aa Táán əyíbuudí lɛ́ pɛ́ɛn yuudi na pɛbán pɛɔ́bɔn pɛ́ masɔɔ kɛɛlanɛ, wɔnɔ́ ná pógódíí njaan ɛgɛɛlɛ pɛ́lɛ́. Pagɛ́ɛd pɔ́ɔ́bɔn tɛn pə́ʼkudi ɔlaa wó umbúlim wɔnɔ́ ná Táán ayɛ́ɛ́lɛ lɛ́ ɔnɔ́mɛɛd əəbúlim na ɔʼkɛ́ɛd, pɔ́lɛ́ pándɛ agá lɛ́ ɔʼkɛ́ɛd aabágɛdɛn sɔ́g ɔʼkɛ́ɛd!

²⁷ Panɔ́mɛɛd tɛn náan yoom ímuʼ. Pɔ́dɛɔ́gɔ əgubúlimən kə́mmú na pagɛ́ɛd wɔnɔ́ ná kɛ́yásáŋɛ́ɛ́, ɔʼtɛ́m wɔ́ɔ́bɔn wándɛ agá na pɔsɔ́g panɔ́mɛɛd lɛ́ ɔnɔ́mɛɛd aabágɛdɛn sɔ́g ɔnɔ́mɛɛd. Oʼto kono igə náan! A niɛlɛ nɛɔ́bɔn nɛ́ɛn, pálɛ əgəə́súidən pɔ́lɛ́báamɔɛ́d ntɔ́b yɛ́ yaásɛʼtan na pɛbán pɛ́ pɛbɛ́ pɛ́ páagɛɛlanɛ.

²⁸ Wɔnɔ́ ná pádɛʼkáanyɔ́ŋɛnɛɛ́ kolɛŋ Táán, Táán tɛn əyíbuudí na nsiŋ yɔɔbɔn yɛ́ nkɔ́dɛ́ʼkɔd, páagɛɛlanɛ pɛbán pɛ́ pɛ́dɛɔ́gɔ lɛ́ mɔɔd yɛ́ɛlɛ.

²⁹ Sáád ɛdɛɔ́gɔ a ntɛ́m yɔɔbɔn ɔmbɔ́ sɔɔŋ, əgín mbod ɛ pɛbán pɛ́ pɛfaa áa iyə́gíníí na pɔ́lɛ́. Pə́əguunə kugúmi pɔ́lɛ́bə́əsíŋ. Pálɛ pɛbán pɛ́ pɛbɛ́ kɛɛlɛ, pánnyɔ́ŋɛn lɛ́ ná páádála sɔ́g na yoom, pɔ́nɔ́ əgín pɔ́lɛ́ aa pɛ́ɛnɛɛ́ na yɛ́lɛ́. Pálɛ əgín ngoónanan, masáŋ, pɛnyaʼ, ntɛ́m yɛ́ mbɛ́ yɛ́lɛ́ na yɛ́lɛ́, kongosá.

³⁰ Pálɛ ɔsɔyɔn pɔsɔ́g kɔbɛ́. Páabɛnɛn Táán, əgín pɛdog pɔ́lɛ́ na pɔ́lɛ́, páagaábágɛdanɛ, páagaányáadanɛ, páalónanɛ muyən mó mowa muim mó kɛɛlɛ kɔbɛ́, pádɛágoóbɛn pasɛ pɔ́ɔ́bɔn na pa ŋŋí pɔ́ɔ́bɔn.

³¹ Nsiŋ fiɛ́d, nkə kɛ́ páágagɛn mɔɔd, pádɛ́agɛɛlɛ kɛ́lɛ́. Pálɛ na ntɛ́m yɛ́ nnasáŋ, pə́diə́siəd maan na mɔɔd.

³² Náan aa páálɛŋ kɔŋɛʼ kɔŋɛʼ lɛ́ a pɛyɔm pɛ́ Táán, ungim nyɔ́ alɛɛ́ agɛɛlanɛ pɛbán pɛ́ pɛbɛ́ wɔnɔ́ pɛ́ɛb, koman kuə́ŋ kólɛ lɛ́ əəgu. Pɔ́lɛ́báamɔɛ́d pálɛ palɛŋáán náan. Náa, pálɛ lɛ́, kudi pə́ʼtí, páagɛɛn agá yuudi na kɛɛlɛ pɛ́lɛ́. Na náan kɔmɔɛ́d, pálɛ agogany agá kə́mmú pá páagɛɛlanɛ pɛ́lɛ́.