Kolóos 1 - Nɛsɔ́g nɛ́ Nɛwa

Póol aáyaŋ agɛɛ́ʼkɛn kɛdɔ́ŋɔ́nɔ́n kiə́ŋ, aáság kuyə́əni na pisoyidiʼ

¹ Mɛ Póol nyɔ́ Táán əyínyiiyid lɛ́ nyɛ́ɛn mɔɔ́n o maʼtom o Yə́sus Kilíʼtus, na Timoʼtə́ə móŋŋí wəəs a kəə́liʼtiniʼ aa timə́budílən nufuuʼ nóonɛ.

² Timə́budílən pəŋi pá a Kolóos pá poágoob na Táán. Pəŋi pomóŋŋí pə́ə́s pá poágɛ́nɛ́ɛ́ oʼto na Kilíʼtus a kúfuʼ, pəŋi pá polɛɛ́ unuʼ úmmuʼ na nyɔ́lɛ́. Táán Sɛ wəəs áboyɛ́ʼkɛn mawɔʼ na wiiy aá!

Póol alɛ əgusoyidəni Táán a kidíídí kɛ́ pəə́liʼtiniʼ

³ Kɛnɛŋ kɛ́ tɛlɛ ɔgɔɔ́sɔ́gɔlɔn Táán a kidíídí kɛáŋan, tɛlɛ agomoyɛ́ʼkɛnan pisoyidiʼ pɛnɛŋ piim, nyɔ́lɛ́ Táán, Sɛ o Sə́dúk wəəs Yə́sus Kilíʼtus.

⁴ Tɛlɛ əgumuúsoyidəni lɛ́ tɛyóób wɔnɔ́ ná poágɛ́nɛ́ɛ́ oʼto na Yə́sus Kilíʼtus, na wɔnɔ́ ná polɛɛ́ tɛn na nnyɔ́ŋánán na ndɛg ɛ Táán ngim.

⁵ Polɛ agɛɛlɛ náan lɛ́ polɛ agomɛna pɛda na Táán a nkə kɛ́ aboyɛ́ngɛ́gɛ́nɛ́ɛ́ a mɔɛn. Nkə kɛ́go kɛ́ɛg kiim, poɛ́lɛ́ŋ kɛ́lɛ́ əgín kɔ a kɛnɛŋ kɛ́ poyóób Tɔsɔm Tólaŋ tó tólɛɛ́ əgusəə sáád

⁶ Tɔsɔm Tólaŋ tóod túyíím əgiig a pəŋi, túmíímin pɔɔd na mawɔʼ má Táán, toásambɛd a nsí ngim. Áágáan oʼto a tólɛ́, pódam əngis pɛnɛŋ piim na Táán. Nkə kɛ́ kɛ́lɛɛ́ agaásan a kɛgaágadɛ kɛáŋan kɛ́lɛ nkə kɛ́ kíyə́ʼtúmíí a wɔɔ́s ó na oʼto na oʼto wó poyóób tólɛ́, poáság kolɛŋ kɔŋɛʼ kɔŋɛʼ wɔnɔ́ ná Táán yɛɛ́dɛ́ɛ́lɛn pɔɔd ɔʼtɛ́m.

⁷ Sɔ́g wəəs wo ɔʼtɛ́m Ɛʼpafɛláas nyɔ́ alɛɛ́ əgugud pigólí pɛ́go pímuʼ wɔnɔ́ pəsi aa ayɛ́boyáʼkánánɛ pɛbán pɛ́ɛb. Alɛ mɔɔd nyɔ́ alɛɛ́ sáád a pigólí pɛ́ Yə́sus Kilíʼtus. Nkə kɛ́go kɛ́ pəsi tiígóodi lɛ́ tíɛlɛ tɛn a pəŋi aa kɛ́ɛg alɛɛ́ agɛɛlɛ.

⁸ Nyɔ́lɛ́ ogo aa ayɛ́bɛdɛánɛ wɔnɔ́ ná Uŋun wó ufúlúʼtú ómáboyɛ́ɛ́lɛ lɛ́ póɛn na nnyɔ́ŋánán na pɔsɔ́g.

Pɛɔ́sɔ́gɔ́lɔ́n pɛ́ Póol a kidíídí kɛ́ pəə́liʼtiniʼ

⁹ Kólɛ́ aa, Əgəə́bə́ə a wɔɔ́s wó tɛyóób náan, tɛlɛ ɔgɔɔ́sɔ́gɔlɔn Táán pɛnɛŋ piim a kidíídí kɛáŋan. Tɛlɛ amoyɔ́sɔ́gɔlɔn lɛ́ áboyɛ́ɛlɛ pólɛŋ kɔŋɛʼ kɔŋɛʼ nkə kɛ́ alɛɛ́ anyɔ́ŋɛn, Uŋun wó ufúlúʼtú óoboyɛ́ʼkɛn nsiŋ.

¹⁰ A niɛlɛ nɛ́ɛn, poalaa ɔlaa wó wə́əgə́mmi Sə́dúk, poágɛɛlɛ tɛn pɛnɛŋ piim nkə kɛ́ alɛɛ́ anyɔ́ŋɛn. Polɛ́ɛ́ kɛɛlanɛ mbod ɛ pisig pɛ́ pɛbán ngim, poágɛɛn əgín yuudi na kolɛŋ Táán kɔŋɛʼ kɔŋɛʼ.

^11-12 Tɛlɛ amoyɔ́sɔ́gɔlɔn náan lɛ́ ná áboyɛ́ʼkɛn toɛn tuə́ŋ tó túəgə́mən. Ə́yísíən, póɛn na ɔʼtɛ́m ó konóʼtan pɛnɛŋ piim. Ɛ́ʼkɛ́naan Táán Sɛ wəəs pisoyidiʼ na tɔnyɔ́g. Nyɔ́lɛ́ aa əmə́bubuə́nin ngə́ agɛɛlɛ lɛ́, a kɛnɔ kɛ́ kɛmoámoáŋ kɛ́lɛɛ́ agonom, póɔŋ tɛn ngab a nkə kɛ́ ayɛ́ngɛ́gɛn pá páagoob na nyɔ́lɛ́.

Mɔɔ́n alɛ a kɛŋwáŋánán kɛ́ Táán yɛ́ tɛdɛádálaá

¹³ Nyɔ́lɛ́ Táán aa ayɛ́bɛgábɛn a ɔmbɔg á Sáʼtan, amáyɛbɛɛ́yaagɛ a nɛlaamɛʼ nɛ́ Mɔɔ́n wəəŋ wo ɔʼtɛ́m.

¹⁴ A oʼto ó Mɔɔ́n wəəŋ nyóon aa Táán ayɛ́bɛyááŋɛn. Əgín tɛn a oʼto wə́ə́ŋ áa əyíbilísin mabɛ́ mə́ə́s

Kilíʼtus alɛ nkúm ɛ moom muim

¹⁵ Mɔɔd nyɔ́ aáʼkodálaá Táán na əngis yə́ə́ŋ ɔdɛɔ́gɔ. Əgín Yə́sus Kilíʼtus aa pɛ́ɛ́dála na əngis. Alɛ moááŋ a kɛŋwáŋánán kɛ́ Táán yɛ́ tɛdɛádálaá. Nyɔ́lɛ́ alɛ Mɔɔ́n o na oʼto na oʼto nyɔ́ alɛɛ́ alaamɛ yiim yɛ́ Táán ayɛ́ɛ́lɛ

¹⁶ Táán ayɛ́moyɛ́ʼkɛn toɛn lɛ́ yɛ́ɛlɛ a nsí na a mɔɛn, moom muim mó tɛlɛɛ́ agodɛ́ʼtɛg, na mó tɛdɛɔ́gɔ agodálaá. Ayɛ́moyɛ́ʼkɛn toɛn lɛ́ yɛ́ɛlɛ mbod ɛ moom ngim yɛ́ ɛlɛɛ́ na toɛn a nsí na a mɔɛn. Ayɛ́ɛ́lɛ lɛ́ Mɔɔ́n wəəŋ áa yɛ́ɛlɛɛ́ moom muim lɛ́ ná muóbanan əgín na nyɔ́lɛ́.

¹⁷ Əgín kɔ kalaʼ, ná yoom na yoom ɔmbɔ́ ímuʼ ɛ́dɛ́njáyɛ́ɛlɛ, nyɔ́lɛ́ ayɛ́ɛ aándɛ kɔ. Yiim ɛlɛ a oʼto wə́ə́ŋ, nyɔ́lɛ́ aa yiídə́nígi náan wɔnɔ́ ná mólɛɛ́.

¹⁸ Alɛ a oʼto ó Nɛágɔnyɛd nɛ́ pəə́liʼtiniʼ lɛ́ alɛ agoboólaamɛ wɔnɔ́ ná oʼto wáalaamɛ nkó. Nɛágɔnyɛd nɛ́ pəə́liʼtiniʼ nɛ́lɛ wɔnɔ́ nkó yəəŋ. Nyɔ́lɛ́ aa alɛɛ́ na oʼto na oʼto lɛ́ yíim álon a kəəniʼ agɛɛlɛ lɛ́ yɛ́ɛn na oʼto na oʼto a pɔɔd piim na a moom muim.

¹⁹ Kíígə́mmi Táán náan lɛ́ pɔ́lɛ́ na Mɔɔ́n pɛ́ɛn yoom ímuʼ a pɛbán piim.

²⁰ Náan aa kíyímugə́mmi tɛn lɛ́ yíim ádom Mɔɔ́n wəəŋ, pámoyóon a ɔmbásá agɛɛlɛ lɛ́, moom muim, na pɔɔd piim, píiʼkini kaálad na nyɔ́lɛ́ Táán, wiiy ɛ́yɛɛn a nsí na a mɔɛn.

²¹ Pəŋi tɛn podɛʼkɛ́ɛ kɔŋɛʼ na Táán kalaʼ. Poyɛ́ɛ pabɛnɛn pə́ə́ŋ lɛ́ puígóodoni tɛn mafɛgaʼ má mabɛ́, poágɛɛlanɛ pɛbán pɛ́ pɛbɛ́.

²² Kólɛ́ aa nɛ́gɔŋ yɛ́ɛnɛ aáʼkɛɛlɛɛ́ lɛ́ puósóbini na nyɔ́lɛ́, a oʼto ó kugu kó a pumog kó Mɔɔ́n nyɔ́ yiígú a ɔmbásá. Ayɛ́ɛ́lɛ náan lɛ́ ná pəŋi pólon Sálábádábádá, ɔsɛd fiɛ́d, ɛgom fiɛ́d na pəŋi a udi wə́ə́ŋ.

²³ Kíəguunə anɛ́ɛ́n na pəŋi lɛ́ pudindiógi ongoo a nɛag nɛ́ poágɛ́nɛ́ɛ́ oʼto na Yə́sus Kilíʼtus. Pómɛna pɛda a nkə kɛ́ páyɛ́bodɛánɛ a Tɔsɔm Tólaŋ. Tiɛ́lɔɛ́gɛ́nɛ tólɛ́ na ungim a nsí, kəə́bə́ə́ a wɔɔ́s wó pəŋi puyə́ʼtúmíí koob tólɛ́. Mɛ Póol, ndɛ uʼkudin o Táán. Oʼtom wó ayɛ́nyɛɛ́ʼkɛn aa wóow. Ólɛ lɛ́ nyíim ndɔɛgɛ tólɛ́.

Oʼtom wó Táán ayɛ́ʼkɛn Póol

²⁴ Nɛ́gɔŋ, ndɛ na tɔnyɔ́g a ntɔ́b yɛ́ɛnɛ yɛ́ ndɛɛ́ agonɛ a oʼto wááŋan. Ndɛ agaánɛ náan a oʼto wááŋan ó pəŋi pá polɛɛ́ yoog ɛ pɔɔd ɛ Kilíʼtus, wɔnɔ́ ná nyɔ́lɛ́nyɔ́amɔɛ́d yɛɛ́nɛ́ ntɔ́b kalaʼ a kidíídí kɛáŋan. Pəŋi nɛágɔnyɛd nɛ́ pəə́liʼtiniʼ, polɛ wɔnɔ́ nkó yəəŋ. Ndɛ agonɛ ntɔ́b yɛ́ɛy náan əguyə́əgi yɛ́ yɛɛ́lɔ́b a pigólí piə́ŋ.

²⁵ Ndɛ nɛ́gɔŋ yɛ́ɛnɛ uʼkudin wəəŋ a oʼto wááŋan. Táán ayɛ́nyáŋɛ́nɛ́nɛ oʼtom wóow lɛ́ ndɔɛgɛnɛ ungim tɔsɔm tuə́ŋ, póób tólɛ́, na nkə kiim kɛ́ kɛ́lɛɛ́ kɔ.

²⁶ Tɔgɛ́ɛ́ tóod tódɛʼkɛ́ɛ agaálɔɛgɛ kalaʼ a táyááŋ, pɔɔd pádɛʼkɛ́ɛ agolɛŋ tólɛ́.

²⁷ Kɛ́lɛ lɛ́ Táán ayɛ́ɛ anyɔ́ŋɛn kubuúloodi lɛ́ nkə kɛ́ nyɔ́lɛ́ alɛɛ́ anyɔ́ŋɛn, kɛ́lɛ́ kɛ́go aa kɛ́lɛɛ́ kɛbán kɛ́laŋ agaáyɛn pɛbán piim. Kɛbán kɛ́go kɛ́ɛg aa kɛ́lɛ́ɛ́ kɔyɛɛ́ pɔɔd pá a mɔnɔŋ miim. Nkə kɛ́ kɛ́yɛ́ɛ kɛɔsɛ́gáán áa kɛ́ɛnɛ kɛ́lɛɛ́ lɛ́: Kilíʼtus alɛ a ntɛ́m yaaŋan ɛ pəŋi pəʼkilíʼtɛn. Kólɛ́ aa polɛɛ́ agomɛna pɛda lɛ́ polɛ́ɛ́ kɔɔŋ ngab a nugəm nó Táán.

²⁸ Kɛbán kɛ́ Yə́sus Kilíʼtus nyóon aa tɛlɛɛ́ agosɔyɔ na ungim. Tɛlɛ agoboyááganan mbaŋ a nsiŋ yɛ́ Táán alɛɛ́ agɛbɛyɛ́ʼkɛnan lɛ́ tɛlɛ əguunə lɛ́ ungim nyɔ́ alɛɛ́ a uŋóón na Kilíʼtus, yɛ́ɛn wɔnɔ́ ná Táán alɛɛ́ anyɔ́ŋɛn lɛ́ yɛ́ɛn.

²⁹ Agɛɛlɛ lɛ́ nyɛ́ɛn agaádɛ pigólí pɛ́ɛb, njáyɛ́ʼkɛ́nɛ́ɛ́ a pɛ́lɛ́ mɛ ungim, a toɛn tó Kilíʼtus ayɛ́nyɛɛ́ʼkɛn.