Filíib 1 - Nɛsɔ́g nɛ́ Nɛwa

Póol əmə́ʼtúmíí nufuuʼ nuə́ŋ na pisoyidiʼ

¹ Na mɛ Póol, na Timoʼtə́ə nyɔ́ tɛlɛɛ́ pəsi piim pəgudin pá Yə́sus Kilíʼtus aa timə́budílən nufuuʼ nóonɛ. Timə́budílən pəŋi pəə́liʼtiniʼ Yə́sus Kilíʼtus piim pá polɛɛ́ a pálɛ́ɛg ɛ Filíib Nufuuʼ nóonɛ nóadɛ́ʼtɛg tɛn padɛ́lɛm yuudi pááŋan na padɛáʼkɛlɛ.

² Táán Sɛ wəəs na Yə́sus Kilíʼtus Sə́dúk wəəs páboyɛ́ɛlɛ kɔŋɛʼ á! Páboyɛ́ʼkɛn tɛn kiwiiyiʼ á!

Póol alɛ ɔgɔɔ́sɔ́gɔlɔn Táán a kidíídí kɛ́ pəə́liʼtiniʼ pá a Filíib

³ Ndɛanɛ lɛ́: Kɛnɛŋ kiim kɛ́ mbáboyáyóŋɛ́ɛ́, ndosoyidəni Táán a niiŋ nɛáŋan.

⁴ Ndɛanɛ tɛn na tɔnyɔ́g a ɔʼtɛ́m síɛ́ɛ́d kɛnɛŋ kiim kɛ́ ndɛɛ́ ɔgɔɔ́sɔ́gɔlɔn Táán a kidíídí kɛáŋan.

⁵ Tɔnyɔ́g tóod, ndɛanɛ na tólɛ́ náan a nɛnjaábɛgɛn nɛ́ poyɛ́njaábɛ́gɛn ombɔg agɛɛlɛ lɛ́ Tɔsɔm Tólaŋ tósambɛd, kəə́bə́ə́ əgín kɔ a wɔɔ́s ó na oʼto na oʼto, əgiim əgiig nɛ́gɔŋ.

⁶ Mɛ, mbálɛŋ əgín náanɛ tíʼtiib lɛ́, Táán nyɔ́ əyə́ʼtúmíí kɛɛlɛ kisig kɛ́ pigólí pɛ́ɛb náan a ntɛ́m yaaŋan, agɛɛn yuudi na pɛ́lɛ́ súʼtə́ə́ a wɔɔ́s wó Yə́sus Kilíʼtus alɛ́ɛ́ kimbuúlinií

⁷ Kɛ́lɛ kɔŋɛʼ wɔnɔ́ ná mɛ ndɛɛ́ na mafɛgaʼ málaŋ móom náan pɛnɛŋ piim na pəŋi lɛ́, polɛ a ɔʼtɛ́m wáam. Kɛ́lɛ tɛn náan wɔnɔ́ ná puísiə́d tɛn pəŋi piim ngab a mawɔʼ má Táán ayɛ́nyɛɛlɛ́nɛ. Polɛ agɛɛlɛ náan nɛ́gɔŋ wɔnɔ́ ná ndɛɛ́ a yoog yɛ njaan Poyɛ́ɛ agɛɛlɛ tɛn náan ɔmbɔ́ ná njɛ́ɛ nkə́ligi a táán, ndáanɔna Tɔsɔm Tólaŋ na toɛn, ndáagɛɛlɛ lɛ́ pɔɔd páág oʼto a tólɛ́.

⁸ Nnyɔ́ŋánán yɛ́ɛy yɛ́ ndɛɛ́ na yɛ́lɛ́ na pəŋi, Yə́sus Kilíʼtus aa amɛ́njaág yɛ́lɛ́ a ɔʼtɛ́m. Táán aálɛŋ náan lɛ́ kɛ́lɛ fɔ́lɔ́b.

⁹ Nkə kɛ́ ndɛɛ́ ɔgɔɔ́sɔ́gɔlɔn Táán a kidíídí kɛáŋan aa kɛ́ɛnɛ kɛ́lɛɛ́ lɛ́: Áboyɛ́ɛlɛ, nnyɔ́ŋánán yaaŋan yɛ́ɛn əgín yuudi, póolɛŋ pafɔ́lɔ́b pə́ə́ŋ agaáyɛn, áyɛɛlɛ tɛn lɛ́ pólɛŋ kosálɛna pɛbán,

¹⁰ agɛɛlɛ lɛ́ pólɛŋ kiiyid nkə kɛ́ kɛ́lɛɛ́ kɛŋɛʼ. Áay ná pólon pamoáŋáán, podiɛn na nsɔ́ɔ́, agɛɛn əgiig əgín a wɔɔ́s wó Kilíʼtus alɛ́ɛ́ kimbuúlinií.

¹¹ A toɛn tó Yə́sus Kilíʼtus, polɛ́ɛ́ kɛɛlanɛ pɛbán piíŋ a ɔlaa wááŋan pɛ́ pɛ́lɛɛ́ sáád, agonyáadɛ Táán, poámoyɛ́ʼkɛn nugəm.

Kɛ́lɛ kɔŋɛʼ lɛ́ mɔɔd ánɛ ntɔ́b a niiŋ nɛ́ Kilíʼtus

¹² Pomóŋŋí, ndɛ anyɔ́ŋɛn lɛ́ pólɛŋ poɔʼkɔ́ ntɔ́b yɛ́ɛnɛ yɛ́ ndɛɛ́ agonɛ, ɛlɛ agɛɛlɛ lɛ́ Tɔsɔm Tólaŋ tóɛn yuudi.

¹³ Yɛ́lɛ́ ɛgo aa yaágɛɛlɛ lɛ́, na pasɔ́njaa piim pá pálɛɛ́ a kinuŋ kɛ́am áanɛ a nó nkúm, na ungim nyɔ́ alɛɛ́ áanɛ, álɛŋ lɛ́ yoog yɛ njaan yɛ́ɛnɛ yɛ́ ndɛɛ́ a yɛ́lɛ́, ɛlɛ a oʼto wóonɛ lɛ́ ndɛ alɔɛgɛ Tɔsɔm Tólaŋ tó tóadɛ́ʼtɛg Kilíʼtus.

¹⁴ A oʼto ó yoog yɛ njaan yɛ́ɛnɛ yɛ́ ndɛɛ́ agonɛ, ɛ́fɔlɛ́ ɛ́ pomóŋŋí pə́ə́s pəə́liʼtiniʼ, a toɛn tó Sə́dúk, pə́ndigi agodammana yoog yɛ njaan. Pə́ndigi tɛn kə́mmú na wɛɛ́y agolɔɛgɛ Tɔsɔm tó Táán, pálɛ əgiiʼkini kaábaya agá.

¹⁵ Kɛ́lɛ fɔ́lɔ́b lɛ́, ngab yimmú ɛlɛ kɔ yɛ́ ɛlɛɛ́ alɔɛgɛ niiŋ nɛ́ Kilíʼtus a yaág yɛ́ əngis, agobɔgɔnɔn oʼkɔɔ na mɛ. Kɛbán kímuʼ, pə́mmú tɛn pálɛ kɔ pá pálɛɛ́ alɔɛgɛ tólɛ́ fiɛ́d na mafɛgaʼ móom má mabɛ́.

¹⁶ Pɔsɔ́g póob náan pálɛ alɔɛgɛ tólɛ́ a nnyɔ́ŋánán yɛ́ pálɛɛ́ na yɛ́lɛ́ na mɛ, lɛ́ páálɛŋ lɛ́ Táán áa əyíʼtə́nígi lɛ́ nnɔna Tɔsɔm Tólaŋ.

¹⁷ Kɔmɔɛ́d lɛ́ pɔsɔ́g pə́mmú póʼkáag, ɔmbɔ́ wɔnɔ́ ná pɔ́lɛ́ pálɛɛ́ alɔɛgɛ tɛn niiŋ nɛ́ Kilíʼtus, mafɛgaʼ mɔ́ɔ́bɔn a ɔʼtɛ́m mɔ́dɛɔ́gɔ maŋɛʼ. Pɔ́lɛ́ pálɛ agá agɛnnɔɛyɛ mɛ pɛdá. Pálɛɛ́ agofɛg lɛ́ a niɛlɛ nɛɔ́bɔn nɛ́ɛn ndagɛɛn na ɔʼtɛ́m kogany agaáyɛn wóonɛ wó ndɛɛ́ na wólɛ́ nɛ́gɔŋ a yoog yɛ njaan yɛ́ɛnɛ yɛ́ ndɛɛ́ a yɛ́lɛ́.

¹⁸ A mɛ, kɛ́dɛágɛʼkɔmɛd ɔsab. Kɛ́lɛ əgiiʼkini kɛnyɛɛ́ʼkɛn agá tɔnyɔ́g kə́mmú lɛ́ kɛ́yɛɛn ɔmbɔ́ lɛ́ mafɛgaʼ má fɔ́lɔ́b pógódíí oo, ɔmbɔ́ má mabɛ́ oo, əgín niiŋ nɛ́ Kilíʼtus aa nɛ́lɛɛ́ agaálɔɛgɛ, mɛ ndɛ agá na tɔnyɔ́g, ndágɛɛn əgín na tólɛ́ yuudi

¹⁹ lɛ́ mɛ, mbálɛŋ lɛ́ nkə kɛ́ɛg kiim kɛ́lɛ́ɛ́ kaágasɛnɛ wɔɔ́s, mɛ ndɛ nyɔɔy a pɛɔ́sɔ́gɔ́lɔ́n pɛáŋan pɛ́ polɛɛ́ ɔgɔɔ́sɔ́gɔlɔn Táán a kidíídí kɛ́am, na a toɛn tó Uŋun ó Yə́sus Kilíʼtus wáagɛnyɛɛ́ʼkɛn.

²⁰ Nkə kɛ́ ndɛɛ́ agaáboŋ a ɔʼtɛ́m wáam, kɛ́ ndɛɛ́ agolaŋ komɛna pɛda a kɛ́lɛ́ kɛ́lɛ lɛ́ ntɛndɛ́ɛ́ kɛɛn na oʼto kono. Ndóo, nkə kɛ́ mbálɛŋ, isuŋ tɛn ɛ́dɛɔ́gɔ, kɛ́lɛ lɛ́ nɛ́gɔŋ na a pɛnɛŋ piim, nyɛɛn ɔmbɔ́ a ɔlaa óo, nyɛɛn uʼkuə́n óo, niə́siəd nɛ́am nɛ́agɛɛlɛ lɛ́ pɔɔd pányáadɛ Kilíʼtus.

²¹ A mɛ kɛ́lɛ lɛ́, ɔlaa áa wóow Kilíʼtus. Ɔmbɔ́ kugu aa mbə́gú, kɛ́lɛ kɔŋɛʼ agaáyɛn.

²² Náa, ɔmbɔ́ pə́míʼtí a ɔlaa óo, kɔŋɛʼ lɛ́ náan ndɛ ogɛɛlɛ kə́mmú nkə kɛ́ kɛ́alon na kɛsom. Ntɛálɛŋ nkə aa nyíiyidií anɛ́ɛ́n áay kímuʼ.

²³ Ndɛ anyóon a kɛgaágadɛ lɛ́, mɛ ogo úmmuʼ ndáanyɔ́ŋɛn lɛ́ ná mbə́gú, agɛɛn alaa na Kilíʼtus lɛ́, kɔ́gɔ́ɔg aa nkə kɛ́ ndɛɛ́ anyɔ́ŋɛn agaáyɛn kɛ́lɛɛ́.

²⁴ Əgín tɛn mɛ ogo úmmuʼ nyɔʼkɔ́, nkóódi lɛ́ ndɔb a ɔlaa a kidíídí kɛáŋan.

²⁵ A kɛ́ɛg, isuŋ tɛn ɛ́dɛɔ́gɔ. Mbálɛŋ lɛ́ ntɛ́njɛ́ɛ əgu, ndaalaa na pəŋi piim agoboɛ́bɛ lɛ́ póɛn yuudi na tɔnyɔ́g, a Kilíʼtus nyɔ́ poágɛ́nɛ́ɛ́ oʼto na nyɔ́lɛ́.

²⁶ Ná ndáalon a yoog yɛ njaan yɛ́ɛnɛ yɛ́ ndɛɛ́ a yɛ́lɛ́, ndəgiiʼkini kiim káag ná polɛɛ́. Náan, kɛ́agɛɛlɛ lɛ́ poɛ́ʼkɛn Yə́sus Kilíʼtus nugəm kə́mmú na toɛn.

Ndə́b ɛ Póol

²⁷ Kɛbán kímuʼ, ə́siə́díən a nɛ́ pɔɔd pá pálɛɛ́ agoóbɛn Tɔsɔm Tólaŋ tó Kilíʼtus. Áay, ɔmbɔ́ nyiim, ɔmbɔ́ ntiimin, nyóób lɛ́ pálɛ agosɔyɔ pɔ́nɔ́ puə́yíísin, polɛ unuʼ wááŋan úmmuʼ, poágaábáam ɔʼtɛ́m wááŋan úmmuʼ a nɛag nɛ́ poágɛ́nɛ́ɛ́ oʼto na Kilíʼtus wɔnɔ́ ná Tɔsɔm Tólaŋ tólɛɛ́ agaaʼkananɛ.

²⁸ Pudiyə́díí lɛ́ pɔɔd pá pálɛɛ́ agoboónɔɛyɛ páboyáág wɛɛ́y a ɔʼtɛ́m. Náan kíəbuúloodi lɛ́ Táán alɛ a ngim yaaŋan, pɔ́lɛ́ pálɛ pənímə́ə́n, kɔmɔɛ́d lɛ́ pəŋi polɛ pɔɔyɔ́ɔ́n. Táán áa alɛ́ɛ́ kɛɛlɛɛ́ náan.

²⁹ Pəŋi, polɛ na mawɔʼ wɔnɔ́ ná Táán amáboyɛ́ɛ́lɛ lɛ́ póag oʼto na Kilíʼtus. Adɛ́njaŋ əgín lɛ́ póag oʼto, ndóo, amɛ́ɛ́lɛ tɛn lɛ́ pónɛ ntɔ́b a kidíídí kiə́ŋ.

³⁰ Nɛ́gɔŋ yɛ́ɛnɛ, poándɛ ondáŋ na mɛ a kiʼtuuli kɛ́ɛnɛ kɛ́ poyɛ́ʼtála ndáanɔɛyɛ əgín kɔ kalaʼ Ndigi tɛn a kɛ́lɛ́ kɔnɔɛyɛ, poálɛŋ náan.