Əbələ́ə 1 - Nɛsɔ́g nɛ́ Nɛwa

Táán yɛɛ́sɔ́yɔ na pəsi, yɛɛ́sɔ́yɔ a unuʼ ó Mɔɔ́n wəəŋ

¹ A kɛnɛŋ kɛ́ kalaʼ, Táán yɛɛ́sɔ́yɔ na pɛmbáa pə́ə́s, yɛɛ́sɔ́yɔ na pɔ́lɛ́ pɛnɛŋ piíŋ na a pungə́ puíŋ. A unuʼ ó palɔɛgɛʼ pɛbán pə́ə́ŋ áa yɛɛ́sɔ́yɔ na pɔ́lɛ́.

² Náa, a mədúg móonɛ má málɛɛ́ mədúg má a nɛman, tɔgɛ́ɛ́ tuə́ŋ, a unuʼ ó Mɔɔ́n áa tɛlɛɛ́ agoob tólɛ́. Yiim yɛ́ ayɛ́ɛ́lɛ a nsí yɛ́ɛnɛ na a mɔɛn, a nyɔ́lɛ́ aa móyáyɛ́lɛ́ɛ́ Muim, nyɔ́lɛ́ aa Táán əyímuyííyid lɛ́ móagoóbanan na nyɔ́lɛ́.

³ Kisəə kɛ́ nugəm nó Táán, na nyɔ́lɛ́ aa tɛlɛɛ́ agodála kɛ́lɛ́. Nyɔ́lɛ́ aa alɛɛ́ kifílí kɛmɔɛ́d kɛ́ Táán, nyɔ́lɛ́ aa anyáŋɛ́nɛ́nɛ́ɛ́ yiim yɛ́ a nsí yɛ́ɛnɛ a toɛn tó a nɔgɛ́ɛ́ nó a unuʼ wə́ə́ŋ. Ná ayɛ́ɛ aáʼkoman kɔsɔgɛn pɔɔd mabɛ́ mɔ́ɔ́bɔn, yɛɛ́bág a mɔɛn, alɛ undəndínə́ə́n kɔ a ombɔg ó nɛnom ó Táán nyɔ́ alɛɛ́ alaamɛ na toɛn tuim.

Mɔɔ́n o Táán amáábɛ́gɛn məŋun má maʼtom ombɔg a oʼto

⁴ Táán ayɛ́ɛ́lɛ lɛ́ Mɔɔ́n wəəŋ álaŋ məŋun má maʼtom, əgín tɛn wɔnɔ́ ná niiŋ nɛ́ ayɛ́moyɛ́ʼkɛn nɛ́mááyɛn á məŋun má maʼtom.

⁵ Kɛ́lɛ lɛ́, Táán adɛ́ʼtɛ́anɛ na uŋun ó maʼtom mə́ə́ŋ úmmuʼ lɛ́: «Wɛ, olɛ mɔɔ́n waam, Əgəə́bə́ə naánɛ́ yɛ́ɛnɛ, mɛ ndɛ Sɛ waaŋ.» Adɛ́ʼtɛ́anɛ tɛn ɔmbɔ́ na úmmuʼ lɛ́: «Ndɛ́ɛ́ kɛɛn sɛ waaŋ, wɛ olɛ́ɛ́ kɛɛn mɔɔ́n waam»

⁶ Kɔmɔɛ́d lɛ́ ná nyɔ́lɛ́ Táán ayɛ́ɛ əə́ndəgiim ádom Mɔɔ́n wəəŋ o na oʼto na oʼto a nsí yɛ́ɛnɛ, yiísə́ə́ ɔnɔ́: «Məŋun má maʼtom máam miim, púmudúmin əndu a udi.»

⁷ Nkə kɛ́ Táán yiísə́ə́ a noá na məŋun má maʼtom aa kɛ́ɛnɛ, ɔnɔ́: «Mbɛ́ɛ́lɛ lɛ́ məŋun má maʼtom máam mɛ́ɛn wɔnɔ́ ɔfɛfɛm; mbɛ́ɛ́lɛ tɛn lɛ́, mɔ́lɛ́ má málɛɛ́ pəgudin páam, mɛ́ɛn wɔnɔ́ toloo tó yug»

⁸ Náa, a Mɔɔ́n, yiísə́ə́ ɔnɔ́: «Wɛ Táán, oʼkɔɔ wááŋ ó nɛlaamɛʼ ólɛ a pəliə́g! Olɛ́ɛ́ kolaamɛ ndɛg yaaŋ a pasáád.

⁹ Nkə kɛ́ kɛ́lɛɛ́ sáád áa wɛɛ́nyɔ́ŋɛn, omáabɛnɛn kɛ́ kɛ́lɛɛ́ kɛbɛ́. Kólɛ́ aa mɛ Táán yaaŋ mbə́guyííyid a məgúd má tɔnyɔ́g móonɛ má mbə́guuwú a oʼto. Mbóloodi náan lɛ́ wɛ áa mbágonyáádɛ, adɛ́njaŋ pɔsɔ́g pá olɛɛ́ na pɔ́lɛ́»

¹⁰ Táán yiísə́ə́ tɛn kə́mmú ɔnɔ́: «A niə́bə́ə, wɛ Sə́dúk áa oyɛ́ɛ́lɛ nsí, ɔmbɔ́ tɛn mbálámɔɛn, wɛ áa oyɛ́ɛ́lɛ yɛ́lɛ́ na ɔmbɔg yááŋ.

¹¹ Moom móom muim mólɛ́ɛ́ kuwu, náa wɛ, olɛ a pəliə́g. Ɛɛ́ɛ, muim móom mólɛ́ɛ́ kulun wɔnɔ́ piʼtug pɛ́ pilə́ə́.

¹² Wɔnɔ́ ná ándɛ pə́əmúsə pilə́ə́, náan tɛn aa wɛ, olɛ́ɛ́ kumúsə moom móom. Mólɛ́ɛ́ kocɛ́ndɛ wɔnɔ́ ná ándɛ kilə́ə́ kɛ́acɛ́ndɛ. Náa wɛ, olɛ́ɛ́ kolɔb əgín yoom ímuʼ, ɔlaa wááŋ ódɛndɛ́ɛ́ kɛɛn na nɛman»

¹³ Táán adɛ́ʼtɛ́anɛ tɛn wɔɔ́s na uŋun ó maʼtom wúmmú ɔnɔ́: Agɛɛn əgiig əgín wɔnɔ́ ná nyɔ́lɛ́ alɛ́ɛ́ komoyɛ́ɛlɛɛ́ lɛ́ ə́gíʼtən pabɛnɛn pə́ə́ŋ na ambaan «Wɛ, ləndin áanɛ a ombɔg wáam ó nɛnom, agɛɛn əgiig əgín wɔnɔ́ ná ndɛ́ɛ́ kɛɛlɛɛ́ lɛ́ úgíʼtən pabɛnɛn pááŋ na ambaan»

¹⁴ Məŋun má maʼtom mɔ́lɛ́ málɛ əgín məŋun má mə́əgudin Táán. Alɛ aboodóman lɛ́ mɛ́ɛn agɛɛ́bɛ pá pógódíí lɛ́ pɔ́ɔy.