Fɛlɛmɔ́ŋɔ 1 - Nogálɔ ná mammana ya Gɛɔyɔ

Mbédíígí

¹ Yɔmɔ́ɔ Póolo mɔ́ɔnyɔ naá ncíbo ya gɛaŋɔ́ go busío bá Yésu Kilítu, na Timotée, ondimóní bɛcɔ́, dɛ á go ɔ́ŋɛ́nɔ́ kálata yɛ́ɛyɛ. Maamɔ́ɔ Fɛlɛmɔ́ŋɔ, ondimóní bɛcɔ́ ba buelí mɔ́ɔnyɔ dɛ maamanamɔ́ makɔ́nɔ́,

² na Apɛa, ondimóní bɛcɔ́ ba okɔ́dɔ, na Elesípe, ondimóní bɛcɔ́ ba nɛnoa, na giimbó gá boolímínyí gɛ́ɛgɛ gɛ́ bábándamɔ́ naá mamɔ́ nnyaŋá,

³ Ŋgáa Asaŋa Isée bɛcɔ́ na Daadáa Yésu Kilítu bá nyó boogo, bá nyó fáa buumbénú.

Gɛnɔ́ɔ́nɛ́nɔ́ na gioliminyo gá Fɛlɛmɔ́ŋɔ

⁴ Bɛcamɛna biimée bɛ́ɛbɛ mbósógolonyomú, ko béeniŋenye kunde páanana Asaŋa bamɛ bibéhiigí,

⁵ ŋgɔ́bɔnɔ bó oya bá amɔ́ o maamana boolímínyí biimée, o gɔnɔ go olimonyo Daadáa Yésu Kilítu.

⁶ Mbósógolonyo Asaŋa goŋaá gibénebiginye gɛ́ɛgɛ gɛ́ có ladamɔ́ naá gioliminyo nahɔ gɛ́ bíenye golɛnca gá besé iŋkimée yɛ́ɛyɛ dɛ bɛananamɔ́ naá gɛɔyɔ gɛ́cɔ́ naá boayá bá Kilítusu.

⁷ Ondimóní bamɛ Fɛlɛmɔ́ŋɔ, mbɔ́dɔ yɛ́ɛyɛ o maamanamɔ́ boolímínyí ɛ lɛ́ páalú bɛyaŋa makɔ́nɔ́ na magɛ́nda, goakɛ́ go á bó gúlúmínyée naá gioliminyo.

Fɛlɛmɔ́ŋɔ a háanana go héehinye Onésime

⁸ Boóma moánɛ bɔ́, akɛ́ aŋa ndɔ́mɔ́ na bufilíi buimée bá Kilítusu go páa, ko gaŋa goŋaá o ŋa boóma bɔ́ɔbɔ bó sɛmɛgananamɔ́,

⁹ kanɛ́ cɛ gaá ŋaáa nɔ́ɔnɔ, tómbamɔ́ go lɛ́galɛga go go bósógolonyo go busío bá gɛnɔ́ɔ́nɛ́nɔ́. Naá mbɔ́dɔ yɛ́ɛyɛ ndɔ́mɔ́, yɔmɔ́ɔ Póolo, gilunú gá mɔtɔ, yɔmɔ́ɔ gɔnɔ́ naá ncíbo ya gɛaŋɔ́ go busío bá Yésu Kilítu,

¹⁰ ko bósógolonyo go busío bá Onésime, moɔnɔ́ bamɛ ba gioliminyo mɔ́ɔnyɔ ndɔ́mɔ́ mo bíénéelú naá ncíbo ya gɛaŋɔ́.

¹¹ Cóá, Onésime a dɛ á gá lɛ a go óhigonyo, kanɛ́ godɔ́ɔdɔ, a ná lɛ́ mɔ́ɔnyɔ a gaá ná go ohígínyóo, a ŋgóhiginyo tɔ́nɔ yɔmɔ́ɔ.

¹² Ŋgaá go mo gundínyée, akɛ́ aŋa a lɔ́mɔ́ gigísi gámɛ gá odɛ́má.

¹³ Bó á lɛ bó nnɔ́ɔnɔnɔ goŋaá ndɔbɛnɔ nɛhɛ́ háalá gɛcamɛna gɛ́ɛgɛ ká lɔ́mɔ́ naá ncíbo ya gɛaŋɔ́ go busío bá Gɛnɔ́gɔ́ gá Cɔ́mɔ, a ŋgoyoyo naá undukí yáhɔ.

¹⁴ Kanɛ́, cɛ á gá maamánáa go ŋa boóma bá nɔ́ɔnɔ kanɛ goŋaá dɛ á húmé ukelú. Cɛ lɛ́gálɛ́gáa goŋaá o ŋa besé naá gɛgaŋa; goana naá golɛ́galɛga gáhɔ.

¹⁵ Gódaga, Onésime a lɔ́mɔ́ go úlúkínyéelú go moɔnɔ́ ba gɛcamɛna goŋaá a gɔnɔ nco gunde no bɛ́ɛmba nɛhɛ́ go busío buimée.

¹⁶ Godɔ́ɔdɔ, a dɛ báá gɔnɔ́ goana gɛɔlɛ́, kanɛ́ bese makɔ́nɔ́ a dómba gɛɔlɛ́. A lɛ́ ondimóní bɛcɔ́ ba odɛ́má naá Kilítusu, dómbáa dómbáa go busío bámɛ, kanɛ́ cɛ ncó gɔnɔ go oya go busío báhɔ, mɔ́ɔ mɔtɔ, mɔ́ɔ gɔnɔ́ uŋgoolímínyí ba Kilítusu.

¹⁷ Kanɛ́ aáŋa go íyimene goŋaá ndɛ́ ugúle bahɔ, mo gɔ́lɔ́ɔmɔ́ aŋa o lɔ́mɔ́ ba go kɔ́lɔ yɔmɔ́ɔ.

¹⁸ Aáŋa a lɛ́ go ŋaáalú gɛbɛ́ gá boóma, ɛ́na lí, a go bɛananɛna boóma, o ŋgúhene yɔmɔ́ɔ.

¹⁹ Na ombɔ́gɔ yámɛ moatɛ́ moatɛ gɔ́ɔ ko ɔ́ŋɛnɔmɔ́ caá: Yɔmɔ́ɔ Póolo, nná go bó gundinye. Kanɛ́ maamɔ́ɔ o do bófoolío goŋaá o mbɛananɛna tɔ́nɔ ufínó, ufínó moánɛ yó lɔ́mɔ́ maamɔ́ɔ moatɛ́.

²⁰ Ɛɛ́ɛŋ, ondimóní bamɛ, ŋgaá go bósógólídío, ŋŋɛɛnáamɔ́ boóma bɔ́ɔbɔ ko úhenemú bɔ́ɔbɔ go gɛnɔ́ɔ́nɛ́nɔ́ gɛ́ɛgɛ naá Daadáa, o puugie odɛ́má naá Kilítusu.

²¹ Naá gɛcamɛna gɛ́ɛgɛ ko ɔ́ŋɔnɔmɔ́, ŋgíyimene caá o gaá ŋaáa bɔ́ɔbɔ ko úhenemú. Kɔnɔ go íyimene caá o gaá ŋaáa bó dómba nɔ́ɔnɔ.

²² Naá gɛcamɛna gímmue eé gímmue, kedínyéemú nɛgɛlɛ́, goakɛ́ mbéeniŋenye goŋaá Asaŋa a nɔ́ ɔ́bɔ mbósógólí sɛ́nyɔ́ a ŋa goŋaá nco nyó huenye.

Mbédíígí sá gosúgudinye

²³ Ɛpafalásɛ, mɔ́ɔnyɔ dɛ lɔ́mɔ́ nɛhɛ́ naá ncíbo ya gɛaŋɔ́ go busío bá Yésu Kilítu, a á go bédíígényée.

²⁴ Mélékusu, Alɛsɛtálakɛ, Dɛ́masɛ, na Lókasɛ, basɔ́gɔ́ɔ bámɛ bá buelí, bá á go bédíígényée tɔ́nɔ.

²⁵ Ŋgáa niibo ná Daadáa Yésu Kilítu nɛ́ bɛ́ɛmba nɛnyɔ́.