Ɛ́fɛsɛ 1 - Nogálɔ ná mammana ya Gɛɔyɔ

Mbédíígí

¹ Yɔmɔ́ɔ Póolo, Apótɛlɛ ba Yésu Kilítu aŋa Asaŋa a mbaá lɛ́gá, ŋgɔ́ŋɛnɔmɔ́ batɔ báaba bɔ́ ɔ́bɛnɔnɔmɔ́ nɛhɛ́, bá ágana odɛ́má naá Yésu Kilítu.

² Ŋgáa Asaŋa Isée bɛcɔ́ na Daadáa Yésu Kilítu bá nyó boogo, bá nyó fáa buumbénú.

Bonɔ́mɛ bá niibo ná Asaŋa

³ Ŋgáa Asaŋa, Isée ba Daadáa bɛcɔ́ Yésu Kilítu a bɛ́ɛmba fonáalú. A mba có fonáa na mbɔ́dɔ ya gɛfona iŋkimée yɛ́ɛyɛ Giliíli a fáananamɔ́ naá gobálada gɔ́ɔgɔ na Kilítusu naá mmoɛná.

⁴ Otóotoɛ yá go gedie cí, a mba có iyídé gá Kilítusu go goŋaá dɛ ɛ́ya bɛ́hɛ́, dɛ bɛ́ɛmba bimmúmpúu, kanɛ cigí naá oŋgíso yɛ́hɛ́, go gɛnɔ́ɔ́nɛ́nɔ́ gɛ́hɛ́.

⁵ Asaŋa a mba gedíe fueké goŋaá dɛ bɛ́ɛmba baaná bɛ́hɛ́ bá ɛsámá gá Yésu Kilítu; a mba lɛ́gá nɔ́ɔnɔ go gɛnɔ́gɔ́ gɛ́hɛ́ gá odɛ́má.

⁶ Ŋgáa dɛ gúmenye kanɛ́ Asaŋa go gɛantáanta gá niibo gɛ́ɛgɛ a mbaá có ŋaáa go Moɔnɔ́ bɛhɛ́ ba odɛ́má.

⁷ Ɛɛ́ɛŋ, go gɛbáágá gá Kilítusu gá manɔ́ŋɔ́, dɛ lɛ́ fáŋáalú, gɔnɔ́, a báá có hééhínyée bɛlɔgɔ bɛ́cɔ́; nɔ́ɔnɔ gɔ́ɔ Asaŋa a mbaá có dúfíe bonɔ́mɛ bá niibo nɛ́hɛ́.

⁸ Mammana, Asaŋa a mba có hóógío na besé sɛ́hɛ́ fundufundu go nciŋí iŋkimée gɔnɔ́ go pɛgɔ iŋkimée.

⁹ A mba có lincíe nnindíi ya ndɛ́ga yɛhɛ́, nɔ́ɔnɔ gó lɛ́ aá, nokɛsa nɔ́ɔnɔ a mbaá lɛ́gá go ŋa mɔ́ɔ moatɛ́ moatɛ gá Kilítusu fueké fueké.

¹⁰ Nokɛsa nɔ́ɔnɔ Asaŋa a ŋgaá yibé aŋa gɛcamɛna gɛ́ɛgɛ a mbaá sómbá gɛ́ ŋgaá háá nó lɔ́mɔ́ goŋaá: a bándɛgɛna naá busío bá ufuŋe táŋɛ́ yúmmue, Kilítusu, buimée bɔ́ɔbɔ bó lɔ́mɔ́ naá mmoɛná, na buimée bɔ́ɔbɔ bó lɔ́mɔ́ naá cí.

¹¹ Naá gobálada gɔ́ɔgɔ nɛhɛ́, Asaŋa a mba dóáná go có iyide, a báá có fáá bodáŋɔ bɔ́ɔbɔ a mbaá có dánɛ́ná go nokɛsa nɛ́hɛ́ na go golɛ́ga gɛ́hɛ́.

¹² Ŋgáa dɛ leebenye nɔnɔ kanɛ́ bugúmigumi bá Asaŋa! Bɛɛcɔ́ɔ báaba dɛ mbaá dóáná go ága odɛ́má yɛcɔ́ naá Kilítusu.

¹³ Bɛɛnyɔ́ɔ báaba no mbɔɔ́ ɔ́bɔ́ Gɛnɔ́gɔ́ gá Cɔ́mɔ gá mammana gɛ́ɛgɛ gɛ́ mbaá nyó úlénée na gisódio, no mba ágá odɛ́má yɛ́nyɔ́ naá Kilítusu; gɔ́ɔ, Asaŋa a mbaá nyó bélincígínyée na sɛtáma ya Gimmúmpúu gá Giliíli mɔ́ɔnyɔ a mbaá dáná.

¹⁴ Gimmúmpúu gá Giliíli a có dúfenye goŋaá mammana mammana dɛ ná bɛa moóma má besé mɔ́ɔmɔ Asaŋa a mbaá yáŋóná go busío bá boɛ́nɔ bɛ́hɛ́; dɛ ŋga mó bɛáa gɛcamɛna gɛ́ɛgɛ a ŋgaá có fáŋá go busío buimée. Ŋgáa dɛ leebenye nɔnɔ kanɛ́ bugúmigumi bá Asaŋa!

Póolo a bósógolonyo

¹⁵ Boóma moánɛ bɔ́, aŋa mmbɔɔ́ ɔ́bɔ́ bó oya goágana gɛ́nyɔ́ gá odɛ́má naá Daadáa Yésusu, na gɛnɔ́ɔ́nɛ́nɔ́ gɛ́ɛgɛ no lɔ́mɔ́ na gɛ́ na boolímínyí Asaŋa biimée,

¹⁶ gɔ́ɔ ndɔ́mɔ́ cɛ dɔmbɔ́nɔ́ɔ go béhiigi Asaŋa go busío bɛ́nyɔ́. Nnyó béeniŋenye naá mbósógólí sámɛ.

¹⁷ Ŋgɔŋɔnɔ Asaŋa ba Daadáa bɛcɔ́ Yésu Kilítu, Isée ba go gúme, goŋaá a nyó fáa giliíli gá nciŋí, gɛ́ɛgɛ gɛ́ ná nyó mo dúfiemú, gɛ́ gɔnɔ nyó mo lincie mammana.

¹⁸ Ŋgáa a buune odɛ́má yɛ́nyɔ́ naá gise gɛ́hɛ́, goŋaá no lɛnca kasɛ́á toodo odɛ́máa odɔ́ŋɛ́nɔ yɛ́hɛ́ yó nyó fáananamɔ́, kasɛ́á nigúmi ná bonɔ́mɛ nɛ́ɛnɛ a mbaá dánɛ́ná báaba bá lɔ́mɔ́ bɛ́hɛ́.

¹⁹ No gɔnɔ lɛnca kasɛ́á gɛantáanta gá magɛ́nda a mbaá dúfíe go busío bɛ́cɔ́ boolímínyí na bogaaga bɛ́hɛ́ buimée.

²⁰ Bó lɔ́mɔ́ go gɔ́ɔgɔ a mbaá fúfúné Kilítusu naá begúe, a báá mo lukúményée naá boayá bá ombɔ́gɔ onɔ́mɛ yɛ́hɛ́ naá mmoɛná.

²¹ Nɔ́ɔ gɔ́ɔ Kilítusu a lɔ́mɔ́ hɔ́ɔ dílímínyéelú naá odóɛ yá ufuŋe uŋkimée, nɛgaŋa niimée, bogaaga buimée, magɔ́nɔ́ɔ miimée. A lɛ́ tɔ́nɔ naá odóɛ yá ufíno uŋkimée yɔ́ɔyɔ bá lɔ́mɔ́ ba go fínidinye caá akɛ́ goana naá cí yɛ́ɛyɛ dɛ lɔ́mɔ́ kɔ́ɔ godɔ́ɔdɔ, kanɛ́ gɔnɔ́ naá cí yɛ́ɛyɛ yɛ úlenemú.

²² Ɛɛ́ɛŋ, Asaŋa a mba ágá buimée naá bɛgɔ́ndɔ́ bɛ́hɛ́ cí, a báá mo ágá naá odóɛ yá buimée, a báá mo dílímínyée ogɔ́nɔ́ɔ ba Giimbó gá boolímínyí.

²³ Giimbó gá boolímínyí gɛ́ lɔ́mɔ́ nnyɔ́dɔ yɛhɛ́; naá gɛ́ gɔ́ɔ Kilítusu a lɔ́mɔ́ dácɛ uŋkimée uŋkimée bɛhɛ́ kɔ́ɔ, a hóogonyo buimée naá muimée.