Behébelée 1 - Nogálɔ ná mammana ya GɛɔyɔAsaŋa a mba có gálágáláa gá Moɔnɔ́ bɛhɛ́ 1 Cóá cóá, Asaŋa a mba gálágáláa biisée bá biisée kɔ́nɔ́ɔ bɛ́cɔ́, ɛŋɛndɔ gɛca, mbɔ́dɔ mbɔ́dɔ gá mbúsí sɛ́hɛ́. 2 Kanɛ́ godɔ́ɔdɔ, naá medúgú má mesúgidinye máama, Asaŋa a có gálagala gá Moɔnɔ́ bɛhɛ́. Tɔ́nɔ, gá Moɔnɔ́ bɛhɛ́, a báá gedíe moóma muimée, a báá mo dílímínyée ugíndéginde ba buimée. 3 Bugúmigumi bá Asaŋa bó bonya naá mɔ́ɔ, a lɛ́ mammana púényí yɛhɛ́, gɛgaaga gɛ́hɛ́ gá Nogálɔ gɛ́ nona boóma buimée. Naá nnyimé ya go soga batɔ bɛlɔgɔ bábɔ́, gɔ́ɔ a mbɛɛ́ ɛ́dá lukumene naá mmoɛná, naá boayá bá ombɔ́gɔ onɔ́mɛ yá Asaŋa mɔ́ɔnyɔ a gúmemú naá buimée. Moɔnɔ́ a dómbana bɛɛ́ŋgɛlɛsɛ 4 Moɔnɔ́ a mbɛ ɛ́yá gɛantáanta a báá dómbá bɛɛ́ŋgɛlɛsɛ. Gɔ́ɔ Asaŋa a mbaá mo fáá ufíno yɔ́ɔyɔ yó dómbanamɔ́ yábɔ́ ufíno. 5 Asaŋa a gá báasa a dɛ oyáná akɛ́ ɛ́ŋgɛlɛsɛ ummue a amɔ́: «O lɛ́ Moɔnɔ́ bamɛ, ínoni yɛ́ɛyɛ ŋgɛɛ́ ɛ́yá tɛ́ɔ.» Gó gunde a gá báasa a dɛ gálɛ́dá go ɛ́ŋgɛlɛsɛ ummue a amɔ́: «Ka ŋgɛ ɛ́yá Isée, mɔ́ɔ ɛ ɛ́ya Moɔnɔ́ bamɛ.» 6 Kanɛ́ naá gɛcamɛna gɛ́ɛgɛ Asaŋa a mbaá dómá Moɔnɔ́ bɛhɛ́ ba busío naá cí, a mba gálɛ́dá a amɔ́: «Bɛɛ́ŋgɛlɛsɛ bá Asaŋa biimée bá háanana go mo búlugenye.» 7 Naá boayá bá bɛɛ́ŋgɛlɛsɛ a báá gálɛ́dá a amɔ́: «Asaŋa i íyenye bɛɛ́ŋgɛlɛsɛ bɛ́hɛ́ ifufu, boyogóní bɛ́hɛ́ bɛlɛ́mbɛ bá íyuke.» 8 Kanɛ́ go busío bá Moɔnɔ́, a báá gálɛ́dá a amɔ́: «Asaŋa, Oŋgɛ́yɔ́ yáhɔ yá bufuŋe yó lɛ́ dábɛ́gáalú kanɛ mmanɛ́náa. Go indenye gɛdɔŋɔ gáhɔ naá botɛ́nɛ́ɛ na gidímbo gá bufuŋe. 9 O maamana bɔ́ɔbɔ bó lɔ́mɔ́ tɛ́nɛ́ɛ, o bɛlabɛla bobɛ́; boóma moánɛ bɔ́ Asaŋa oóo, Asaŋa bahɔ a mbaá go iyídé, a báá go fúé megúdé má bɛyaŋa go odóɛ, a báá go búlúgíe gó dómba báaba bóncodío.» 10 Asaŋa go gɔnɔ gálɛda a amɔ́: «Maamɔ́ɔ mɔ́ɔ Daadáa, naá mabayɛga, o mbaá gedíe cí, mmoɛná ɛ lɔ́mɔ́ buelí bá ɛmbɔ́gɔ yahɔ. 11 Muimée mɔ́ɔmɔ mó ná yíme, kanɛ́ maamɔ́ɔ o lɛ́ hɔ́ɔ. Muimée mɔ́ɔmɔ mó ná lune aŋa gɛla. 12 O ná mó máŋa, mó núgie aŋa gɛla. Kanɛ́ maamɔ́ɔ o lɛ́ gɔgɔ́ caŋa mmue, gɛɔyɔ gáhɔ kanɛ mmanɛ́náa.» 13 Asaŋa a gá báasa a dɛ oyáná akɛ́ ɛ́ŋgɛlɛsɛ ummue a amɔ́: «Ncó lukumene boayá bá ombɔ́gɔ onɔ́mɛ yámɛ, gó ɛ́da go éme aŋa nná ŋamɔ́ goŋaá babɛlɔ́bɛlɔ báhɔ bɛ́ ɛ́ya gɛdálɛ́ná bɛgɔ́ndɔ́ báhɔ.» 14 Bɛɛ́ŋgɛlɛsɛ bá lɔ́mɔ́ biliíli bɛ́ɛbɛ bɛ́ yɔgɔnɛnɔmɔ́ Asaŋa; a bɛ́ dómana go go óhigonyo báaba bá háananamɔ́ go dáŋaba gisódio. |
2017