Psalms 92 - Bible Ni Thothup

Ba tang ko sorok

¹ SOMOL, rib manigil ni ngan pining e magaer ngom, mi ni tang ni yibe pi’ fithingam ngalang, gur Got nib Th’abi Tolang,

² gubin e kadbul mi ni weliy rogon e t’ufeg rom ni dabimus nge fanam yul’yul’ ni yibe weliy ni gubin e nep’,

³ ko talin e musik ni bay e seng riy nge harp ni yibe chubeg ni bfel’ lingan.

⁴ A SOMOL pi maruwel rom nib thum’ ngaru’ e gu ba felan’ ngay; ma bochan e n’en ni ka mu rin’, mu gu tangnag e felfelan’.

⁵ SOMOL, rib th’ab feni fel’ e ngongol rom! Ma rib to’ar e tafnay rom!

⁶ Irera’ ban’en ni dabi nang be’ nib balyang; be’ nib minan’ e dabi nangfan:

⁷ pi’in kireb e leam rorad e manga yad ra ilal ni bod e pan, ma pi’in yad ma ngongliy e kireb e manga yad ra man’og; machane bay ni thirifrad u but’,

⁸ ni bochan ni gur SOMOL, e th’abi tolang ni manemus.

⁹ Gamad manang ni pi to’ogor rom e bay ra m’ad, ma gubin e pi’in kireb ni bay ra waergad.

¹⁰ Ka mu gel nigeg kug bod feni gel ba garbaw ni malboch; ma ka mu tow’ath nigeg ko felfelan’.

¹¹ Kug guy e pi to’ogor rog ni kar waergad ma kug rung’ag e meyor ko pi’in kireb.

¹² Pi’in nib mat’aw e bay ra dommalgad ni bod e gek’iy ni palm; yad ra ilal ni bod e cedar nu Lebanon.

¹³ Yad bod e gek’iy nni yung ngalan e naun rok SOMOL, ni be dommal u lan e Tempel rok e Got rodad,

¹⁴ nike pilbithir ma ku ma k’uf ni ku be par ni kab galunglung ma ku ba gel.

¹⁵ Be dag ni SOMOL e bmat’aw, ma dariy ban’en nib kireb ko en ma yororiyeg.