Psalms 30 - Bible Ni Thothup

Ba meybil ko Pongmagaer

¹ Gu be pining e sorok ngom, SOMOL, ya kam ayuwegneg ma da mu pag e to’ogor rog ngar giriggad ngog.

² SOMOL, ni Got rog, kug yornag e ayuw ngom, ma kam gol nigeg;

³ kam teg u orel ko low ko yam’. Kug waen i yan ko wo’ rog nga’ar, machane ma ga fulweg e yafos ngog.

⁴ Ngan tangnag e sorok ngak SOMOL, gimed gubin e girdi’ rog nib yul’yul’ ngak! Mu ted u wan’med e n’en ke rin’ e En nib Thothup, migimed pining e magaer ngak!

⁵ Ya damumuw rok e ta’boch ngiyal’, ma feni gol e nap’an e yafos. Ra map e lu’ nnep’, me yib e felelan’ ni kadbul.

⁶ I pagan’ug me lungug u wun’ug, “Ri dakuriy bi’id ni gu ra waer.”

⁷ SOMOL, gur e um gol ngog; um yororiyeg ni bod bburey ni kan yororiy ni fan ko mael. Ma nap’an e mu mithag owchem rog, mu gu rus.

⁸ Mug piningem, SOMOL; mu gu wenignag e ayuw rom ni lungug:

⁹ “Mang e rayag ngom ko yam’ ni gu ra tay? Mang e ra fel’ ngom ni fa’an gu ra yan nga low? Gur rayag ni nge pining e pi’in karm’ad e sorok ngom? Rayag nra weliyed fanam gol ni dar ma yoyowol?

¹⁰ SOMOL, mmotoyil ngog, ma ga runguyeg! SOMOL, mu ayuwegneg!”

¹¹ Ka mu pilyeg e kirban’ rog kemang ba churu’ ni felfelan; ka mu chuweg e gafgow’an rog, ma ka mu longbiyeg ko felfelan’.

¹² Ere dab gu th’ab gulungag; bay gu tangnag e sorok ngom. SOMOL, I gur e Got rog; Bay gu pining e magaer ngom ni manemus.