Psalms 143 - Bible Ni Thothup

Ba meybil ni fan ko Ayuw

¹ SOMOL, mmotoyil ko meybil rog! Mmotoyil ko wenig rog ni bochan e gab mat’aw; mu fulweg lungug u fithik’ e yul’yul’ rom!

² I gag e tapigpig rom, dab mu pufthin nigeg; dariy be’ nib machalbog u p’eowchem.

³ Pi to’ogor rog e yad be tulfeg; kar parsiyedgag nga fithik’ e but’. Kug par u fithik’ e rumug, ni bod be’ ni kem’ kakrom.

⁴ Ke chuwan’ug ko gubin; kari math e liyab ngog.

⁵ Be yib ngan’ug fapi rran nike thumur; Gu be leamnag murung’agen gubin e tin kam rin’, gu be pugoran ngan’ug gubin e ngongol rom.

⁶ Gu be meybil ngom ni kug tining pa’ag ngalang; lanin’ug e ke balel ni be fineyem ni bod e but’ nike mlik’.

⁷ SOMOL, mu non ngog e chiney! Ka ri mulan’ug. Dab mmithagem rog, ya rug un u fithik’ e pi’in nge yan nga’ar ko fayleng ko yam’.

⁸ Mu tay ngan’ug ni gubin e kakadbul e t’ufeg rom ni dabimus, ya kug tay e pagan’ rog ngom. Meybil rog e be yib ngom ngalang; mu dag ngog e kanawo’ ni nggu wan riy.

⁹ SOMOL, gu be yib ngom ni ngam yororiyeg; mu ayuwegneg u pa’ e pi to’ogor rog.

¹⁰ I gur e Got rog; mu fil ngog rogon ni nggu rin’ e tin nib m’agan’um ngay. Mu gol ngog, ma ga pow’iyeg ko kanawo’ nib pach.

¹¹ SOMOL, mu ayuweg e pogofan rog, ni bod ni kam micheg; fanam ma’taw e ngam ayuwegneg ngay ko pi oloboch rog!

¹² Mu thang e pogofan rok e pi to’ogor rog ni bochan e gub t’uf rom, mag thang owchen urngin e pi’in yad ma gafgow nigeg, ya gag e tapigpig rom.