Psalms 130 - Bible Ni Thothup

Meybil ni yibe ning e ayuw

¹ U fithik’ e mathliyab rog mu gu piningem, SOMOL.

² Somol, mu rung’ag lamag, mmotoyil nga lamag ni gu be wenig ngom ni ngam ayuwegneg!

³ Fa’an mang e mu tay ngan’um e pi denen romad’, me mini’ e rayag rok ni nge thay ndab ni gechignag?

⁴ Machane ga be n’ag fan romad, ni fan e ngu’ug pired ni bay madgum u wun’mad.

⁵ Gu be son ni be oban’ug ko ayuw rok SOMOL, ma gu be par nib pagan’ug ko thin rok.

⁶ Gu be sonnag Somol ni be oban’ug nib gel ngak e pi matanag ni yad be sonnag e woch ni nge puf, ni ka ba gel feni be oban’ug ngak e pi matanag ni yad be sonnag e woch ni nge puf.

⁷ Israel, mu pagan’um ngak SOMOL, ni bochan e t’ufeg rok e dabimus, gubin ngiyal’ ni yugu be par ni ba’adag ni nge mat’aw nigem ngak.

⁸ Bayi chuweg e girdi’ rok ni piyu Israel u fithik’ urngin e denen rorad.