Psalms 118 - Bible Ni Thothup

Ba meybil ni yibe pining e magaer ko gel ni kan tay

¹ Mu pininged e magaer ngak SOMOL, ya SOMOL e bfel’, ma t’ufeg rok e ba manemus.

² Girdi’ nu Israel e nge lungurad, “T’ufeg rok e ba manemus.”

³ Pi prist rok Got e nge lungurad, “T’ufeg rok e ba manemus.”

⁴ Urngin e pi’in bay madgun SOMOL u wun’rad e nge lungurad, “T’ufeg rok e ba manemus.”

⁵ U fithik’ e ngochngochan’ rog mu gu pining SOMOL, me fulweg lungug nge chuwegeg u fithik’.

⁶ I SOMOL e bay rog, ere dab gu rus; mang e rayag ni rin’ be’ ngog?

⁷ I SOMOL e be ayuwegneg, ma bay gguy e pi to’ogor rog ni kar waergad.

⁸ Kabfel’ ni nge pagan’uy ngak SOMOL ko bin ngan toer ko girdi’.

⁹ Kabfel’ ni nge pagan’uy ngak SOMOL ko bin ngan toer ngak e pi girdi’ ni tagagiyeg.

¹⁰ Pi to’ogor rog ni pire’ e ron’edgag nga longob; machane mu gu li’rad nga gelngin SOMOL!

¹¹ Rabad ra longobiyedgag; machane gu li’rad nga gelngin SOMOL!

¹² Ra mu’ulunggad ngog ni bod e ngul, machane ra gak’gad ni bod feni pay e pan ni gak’; gelngin SOMOL e gu li’rad ngay!

¹³ Ni cham ngog nib elmerin mu gu waer, machane SOMOL e ayuwegneg.

¹⁴ I SOMOL e be pi’ gelngig gu be par ni gub gel; I ir e gu bay u pa’ ni be ayuwegneg.

¹⁵ Mu telmed nga lunguy ni yibe garusnag ni kan gel u lan e pi tent ko tirok Got e girdi’ ni be lungurad, “Gelngin SOMOL nib gel e ke yodoroynag!

¹⁶ Gelngin e ke gel nagdad ko mael, ni fare gelngin nma gel ko mael!”

¹⁷ Dab gum’, ya bay gu par ni gubfos nggu weliy murung’agen e tin ke rin’ SOMOL.

¹⁸ Ke gechig nigeg nib elmerin, machane dawori pageg ni nggum’.

¹⁹ Mu binged e pi garog ko Tempel ngog; ya nggu wan nga langgin nggu pining e magaer ngak SOMOL!

²⁰ Irera’ e garog rok SOMOL; kemus ni pi’in bmat’aw e rayag ni ngranod riy!

²¹ SOMOL, gu be pining e magaer ngom, ya kam rung’ag e meybil rog, ma kam gel nigeg!

²² Fare malang ni dabuy e pi’in yad ma toy e naun ya ra fineyed ndariy fan, e yan i aw ni aram e re malang ni ir e ba th’abi ga’fan.

²³ Ren’ey e SOMOL e yodoromnag; rib gamog u owchey!

²⁴ Re rran nem e reb e rran nrib fel’ nike ngongliy SOMOL; ere ngad felfelan’gad ma gadad ngongliy e madnom!

²⁵ Mu ayuwegmad, SOMOL, mu ayuweg e pogofan romad! SOMOL, mu aywegmad nge yan i aw ni bfel’ e tin ni nggu rin’ed!

²⁶ Mang e yigi fal’eg Got wa’athan e en ke yib u fithingan SOMOL! U Tempel rok SOMOL e nggu fal’eged wa’atham riy.

²⁷ I SOMOL e ir Got; rib fel’ e tin ke rin’ ngodad. Ngam tababgad ko madnom ni bay yu pa’ i gek’iy u pa’med mi gimed thelap ngam liyeged e altar.

²⁸ I gur e Got rog, ere gu be pining e magaer ngom; bay gu weliy murung’agem nga feni sorom.

²⁹ Mu pininged e magaer ngak SOMOL, ya bfel’, ma t’ufeg rok e ba manemus.