Psalms 105 - Bible Ni Thothup

Got nge girdi’ rok

¹ Mu pininged e magaer ngak SOMOL, moged u fithik’ e girdi’ feni sorok, mi gimed weliy ngak e pi nam e tin ke rin’!

² Mu tang niged e sorok ngak SOMOL; mu weliyed urngin e pin’en ni bfel’ nike rin’!

³ Mu felfelan’gad ni gadad girdi’en; gubin e pi’in yad be pigpig ngak SOMOL e ngar felfelan’gad!

⁴ Mman ngak SOMOL nge ayuwegnem; mu’um liyor ngak ni gubin ngiyal’.

⁵ Mu ted u wan’med feni manigil e pi maruwel rok nike ngongliy, pi maang’ang rok, nge pin’en nike tirigiliy keyog,

⁶ Gimed pifak Abraham ni tapigpig rok, pi pumo’on ni fak Jakob, ni ir e mel’eg!

⁷ I SOMOL e Got rodad; tin keyog e fan nga ga’ngin e fayleng.

⁸ M’ag rok e bayi tay u gil’ ndariy n’umngin nap’an, nike micheg nga bbiyu’ e mfen.

⁹ Ra tay u gil’ e thin rorow Abraham, nge n’en ni micheg ngak Isak.

¹⁰ I SOMOL e ngongliy ba m’ag u thilrow Jakob, nra par ni dariy n’umngin nap’an.

¹¹ I ga’ar, “Bay gu pi’ ngom e nam nu Kanaan; me par nike mil suwon ngom.”

¹² Girdi’ rok Got e ur moyed ni yad ba lich, ni yad e milekag u lan e nam nu Kanaan.

¹³ Ya uranod u reb e nam nga reb, u tan gil’ilungun reb e pilung nge reb,

¹⁴ machane de pag Got be’ nge gafgow nagrad, ma i puwan’ ngak e pi pilung ni bochrad.

¹⁵ I ga’ar, “Dabi math pa’med ngak e pi tapigpig rog ni gu mel’egrad; dab mu rin’ed ban’en ngak e pi profet rog!”

¹⁶ I SOMOL e pi’ e uyongol nge yib ko nam rorad, me chuweg urngin e ggan rorad.

¹⁷ Machane pi’ be’ nib mo’on nge m’on rorad, Josef, nni pi’ nchuway’ ni nge mang ba sib.

¹⁸ Ruw raba’ i ay ni kan chennag, ma kan the’ ba wasey nga belel’ugun,

¹⁹ nge yan i mada’ ko ngiyal’ ni yib i m’ug nib riyul’ e tin ni yi’iynag. Thin rok SOMOL e micheg nib riyul’ e tin ni yog Josef.

²⁰ Ma aram me chuweg fare pilung nu Egypt Josef u kalbus; en ni pilung ko pi nam e chuweg u kalbus.

²¹ Me tay e pilung nu Egypt Josef ni ir e nge gagiyegnag e nam nu Egypt, nge yog e thin ko re nam nem ni ga’ngin,

²² urngin e pi tolang ni yad bay u tan pa’ e en ni pilung nranod nga tan pa’ Josef, me yib mat’wun ni ngi i fonownag e pi’in yad ma puruy e en ni pilung.

²³ Me yan Jakob nga Egypt, me par ko re nam nem.

²⁴ I SOMOL e gagiyegnag e tirok e girdi’ nge yib pifakrad ni pire’, me gagiyeg nagrad ngu’ur gelgad ngak e pi to’ogor rorad.

²⁵ I gagiyegnag piyu Egypt ngar fanenikayed e tirok e girdi’, ngu’ur ban niged e pi tapigpig rok.

²⁶ Me l’oeg Moses ni tapigpig rok, nge Aron ni ir e turguy.

²⁷ Ra ngongliyew bogi ban’en ni Got e be ngongliy u pa’row, ur ngongliyew e maang’ang u lan yu Egypt.

²⁸ I gagiyegnag Got yu Egypt nge nep’ riy, machane de fol yu Egypt ko tin keyog.

²⁹ Me pingeg e ran u lan e pi lul’ rorad nge ngal’ ni racha’, me yim’ e nig ni bay riy ni gubin.

³⁰ Me sugnag e kayru lan e nam rorad, ni mus nga tafen e en ni pilung me sugnag e kayru.

³¹ Me non Got me sugnag e lal nge yinuk lan e nam ni ga’ngin.

³² Ma ayis nike el e aw nn’uw u daken fare nam ma be mat e uluch u fithik’;

³³ me kirebnag yungi woldug ni grapes nge gek’iy ni fig ni fi’irad, me t’et’ar urngin e gek’iy nga but’.

³⁴ Me non me yib e asmen’ing nga daken e nam, ni bo’or e million ndabiyag i the’eg;

³⁵ miyad longuy urngin e woldug ni bay u lan e nam; ra longuy wom’ngin e woldug ni urngin.

³⁶ Me li’ urngin e tin nganni’ e bitir ni pumo’on ko tabinaw nu Egypt ni gubin.

³⁷ Me pow’iy yu Israel nga wuru’ e nam nu Egypt; ni yad be fek e silber nge gol, yad gubin ni yad ba gel ni dariy e m’ar rorad.

³⁸ Fa’anra chuwgad ngranod me felan’ yu Egypt, ya ke tamdag yu Egypt ngorad.

³⁹ Me tay Got bangi manileng u puluwon e tirok e girdi’ ngalang, nge ba nifiy ni nge tamilangnag owcherad nnep’.

⁴⁰ Ra weniggad ngak, me pi’ e arche’ ni quail nge yib ngorad, me pi’ e ggan ngorad u tharmiy ngar gaman gad riy.

⁴¹ Me bing ba war, me po’ e ran riy nga but’ nge yan u daken e ted ni bod ba lul’.

⁴² Thin rok nib thothup ni micheg ngak Abraham ni tapigpig rok e de pag talin.

⁴³ Me fek e girdi’ rok ngranod nga wuru’ e nam ni yad be tang, ni girdi’ rok ni ir e mel’eg ngranod ni yad be tolulnag e felfelan’.

⁴⁴ Me pi’ boch e nam ngar tafned, ni tafen yugu boch e girdi’, me gagiyeg nagrad ngar fi’iyed e woldug rorad,

⁴⁵ ni fan e nge fol e girdi’ rok ko pi motochiyel rok, mu’ur rin’ed gubin e tin ke ta’chiylen. Mu pining e sorok ngak SOMOL!