Kolossa 4 - Yakan

¹ Kaꞌam meꞌ amuhin, subey hāp pangahatulbi meꞌ banyagaꞌbin. Pangurungun bi si siye mapatut si siyehin. Essebun bi weꞌ niyaꞌ isab amubi laꞌi si surgaꞌ.

Meꞌ panessaꞌ

² Manjari, pasal ngampun si Tuhan, subey teꞌed kaꞌam matuyuꞌ ngampun-ngampun, duk subey pikilanbin dambūs-būs hadja sābubi mangampunin. Subey isab kaꞌam magsukul si Tuhan bang kaꞌam ngampun.

³ Duk māku-māku kaꞌam si Tuhan isab para si kami, karayaw weꞌ urungan Tuhanin kami lān supaya kami kapagmahalayak sabab meꞌ pinakataꞌu Tuhan sabab Almasihin. Puꞌunku hep inin kinalabusu peggeꞌ magmahalayak ku sabab inin.

⁴ Hangkan māku-māku kaꞌam si Tuhan weꞌ tabanganne ku supaya tapapastiꞌku teꞌed pagusihatku sabab Almasihin, supaya tahāti teꞌed weꞌ meꞌ mapakalehin.

⁵ Pahāpun bi addatbin si meꞌ aꞌa manggaꞌi masandel pu si Isa Almasihin. Kahabaꞌ niyaꞌ lugalbi, maghinang hāp kaꞌam si siye.

⁶ Missā kaꞌam pahāp-hāp si siye duk siye kahāpan si meꞌ bissābin. Subey isab kaꞌam taꞌu nambungan siye dangan-dangan bang niyaꞌ tilewde si kaꞌam.

Meꞌ bissā si panambusan

⁷ Akahan si Tikikus saꞌ kaꞌam sabab meꞌ bakas talabeykun. Si Tikikus inin pungtinaꞌite bi kinalasahanten bi duk kapangandelan iye. Saliꞌ-saliꞌ kami maghinang pu si Isa Almasi, Panuhutanten bi.

⁸ Dinaꞌak iye weꞌ ku piyu si kaꞌam duk kaꞌam kaꞌakahanne sabab kami tuꞌu supaya taꞌasigne ateybin.

⁹ Pinatuhut isab weꞌ ku si iye si Onesimus, dambuwaꞌ du isab pungtinaꞌite bi kinalasahan duk kapangandelan du isab iye. Iye inin amban lahatbi du. Na, akahande du kaꞌam iyan sabab kēmon meꞌ bakas lumabey matuꞌuhin.

¹⁰ Si Aristarkus, saweꞌku tuꞌu dem kalabusuhin, maboꞌo bissā piyu si kaꞌam weꞌ essebne kaꞌam. Damikkiyan si Markus, danganakan Barnabasin, maboꞌo bissā du isab sa miyaꞌan. Bakas ne hep kaꞌam akahanku sabab iye, weꞌ bang iye tekka piyu subey iye addatanbi.

¹¹ Si Yussaꞌ, inēnan isab si Justus, maboꞌo bissā isab weꞌ essebne kaꞌam. Siye du hadja tellungan inin meꞌ Yahudihin si meꞌ saweꞌku magmahalayak sabab pagbayaꞌan Tuhanin, duk hadje teꞌed panabangde akuhin.

¹² Si Epapras maboꞌo bissā du isab weꞌ essebne kaꞌam. Iye inin amban lahatbi du, duk maghinang iye pu si Isa Almasi. Luwal iye ngampun-ngampun teꞌed si Tuhan para si kaꞌam weꞌ karayaw koꞌ ngabasag sandelbi pu si Isa Almasihin duk pateteg du kaꞌam si iye duk asal hinangbi teꞌed dambūs-būs meꞌ kinabayaꞌan Tuhanin.

¹³ Kapanaksiꞌ ku teꞌed weꞌ asal maghinang iye pabasag para si kahāpanbi duk para si kahāpan meꞌ masandel pu si Isa laꞌi si lahat Laodikeahin duk si lahat Hirapolisin.

¹⁴ Si Lukas, doktol kinalasahanten bi, duk sampay si Demas maboꞌo du isab bissā weꞌ essebde kaꞌam.

¹⁵ Akahanun bi aku meꞌ pungtinaꞌite bi laꞌi si lahat Laodikeahin weꞌ essebku siye. Akahanun bi aku isab si Nimpa duk meꞌ masandel pu si Isa magtipun si lumaꞌnen weꞌ essebku siye.

¹⁶ Bang ubus batsabi sulat inin, paboꞌohanun bi pī si puweblo Laodikea, si meꞌ masandel pu si Isa malaꞌihin duk isab tabatsade. Pākuhun bi isab sulatku si siyehin duk isab tabatsabi.

¹⁷ Akahanun bi isab Arkippus weꞌ subey teꞌed luwal hinangne meꞌ dinaꞌak hininang si iye weꞌ Panuhutanten bi Isa Almasi.

¹⁸ Aku, si Paul manulat bissā inin. Essebte kaꞌam kēmon maluꞌuhin. Daꞌa kayipatanun bi weꞌ tiyaꞌ ku dem kalabusu. Karayaw kaꞌam luwal ipat Tuhanin. Wassalam