Kolossa 1 - Yakan

¹ Sulat inin amban aku, si Paul duk amban pungtinaꞌiten bi Timoteo. Amban kabayaꞌan Tuhan kawakilan ku weꞌ Isa Almasi dinaꞌak magmahalayak lapalnen.

² Pasampay kami sulat inin piyu si kaꞌam meꞌ aꞌa Tuhan maluꞌu si lahat Kolossahin, si kaꞌam meꞌ pungtinaꞌi kami mamatuyuꞌ masandel pu si Isa Almasihin. Karayaw kaꞌam luwal ipat Samate bi Tuhanin. Karayaw isab weꞌ urunganne kaꞌam kasanyangan dem ateybi.

Magsukul si Paul si Tuhan

³ Kahabaꞌ kami ngampun-ngampun para si kaꞌam, luwal kami magsukul si Tuhan, Sama Panuhutanten bi Isa Almasi.

⁴ Hangkan kami magsukul si Tuhan, peggeꞌ takale kami weꞌ sandel ne kaꞌam pu si Isa Almasi duk malasa koꞌ kaꞌam si meꞌ masandel pu si Isa Almasihin kēmon.

⁵ Matuꞌuhin, sakaliꞌ takalebi lapal mabennalin, iye aka-aka mahāp sabab Isa Almasihin, asal ngase-ngase ne kaꞌam weꞌ niyaꞌ ennaꞌ Tuhanin para si kaꞌam laꞌi si surgaꞌ. Duk iye miyaꞌan puꞌunnen hangkan kaꞌam sandel pu si Isa Almasi duk malasa kaꞌam si meꞌ pagkasibin.

⁶ Duk aka-aka mahāp bakas takalebi sabab Isa Almasi inin, palatag ne si kēmon kalahatan tuꞌu si dunya duk ekka ne makahagadin. Duk sasuku makahagadin pinda kawul-piꞌilden kuweꞌ kaꞌamin du isab pinda kawul-piꞌilbin sakaliꞌ takalebi sabab lasa duk aseꞌ Tuhan si kaꞌamin duk sakaliꞌ tasabutbi weꞌ asal toꞌo inin.

⁷ Takalebi aka-aka mahāp inin amban Epapras. Iye inin saweꞌ kami maghinang pu Isa Almasi duk matuyuꞌ iye magmahalayak si kaꞌam ngagantiꞌan kami.

⁸ Iye hep mangakahan kamihin weꞌ maglasa-ilasa kaꞌam. Lasa inin pinapī weꞌ Niyawa Tuhanin dem ateybi.

⁹ Iye inin sababnen hangkan kemuwe takale kami sabab sandelbin, luwal ne hadja kami ngampun-ngampun si Tuhan para si kaꞌam. Māku-māku kami si Tuhan karayaw du paꞌin kaꞌam urungan Niyawanen kataꞌu supaya kataꞌuhanbi duk asal tahātibi kēmon kabayaꞌan Tuhanin.

¹⁰ Manjari makajari ne kawul-piꞌilbin patut si meꞌ aꞌa masandel pu si Isa Almasihin duk makasulut Isa Almasi ne. Duk tahinangbi ne meꞌ hinangan mahāpin bisan ine, duk pasōng isab pangataꞌubi sabab Tuhanin.

¹¹ Karayaw kaꞌam urungan Tuhanin basag amban balakatne mahadjehin supaya kaꞌam makasandal bisan ine duk supaya basag imanbin duk kēgan pe kaꞌam.

¹² Duk asal magsukul teꞌed kaꞌam si Samate bi Tuhanin. Sabab hinangan Tuhan para si kaꞌamin, pataꞌ kaꞌam pinasakup inurungan meꞌ inennaꞌne para si meꞌ aꞌanen laꞌi si lahatne masahayahin.

¹³ Pinaluwas kite bi weꞌ Tuhanin amban dem lindem, hātinen amban antanan nakuraꞌ seyitanin duk ilinda kite bi weꞌ ne pī si antanan Anakne kinalasahannen, Isa Almasi.

¹⁴ Peggeꞌ sandel ne kite bi pu si Isa Almasi, ilekkat kite bi weꞌ ne amban antanan nakuraꞌ seyitanin duk luhaya ne kite bi, hātinen, taꞌampun ne kēmon duseten bi.

Bang sine Almasi duk bang ine hinangnen

¹⁵ Bang Tuhanin, gaꞌi takitete saguwaꞌ Isa Almasi saliꞌ du teꞌed duk Tuhanin duk bang takitete Almasi kataꞌuhante bang saꞌingge Tuhanin. Gaꞌ pe pinapanjari kēmon-kēmonin andang ne Almasi duk langkew iye amban kēmon bakas pinapanjarihin.

¹⁶ Kēmon bayuꞌ-bayuꞌan diyataꞌ langitin duk matuꞌu si dunyahin, kēmon meꞌ takite manusiyaꞌin duk meꞌ manggaꞌi takitehin, kēmon meꞌ magbayaꞌin sampay meꞌ malaꞌikatin, duk meꞌ bayuꞌ-bayuꞌan mananassatin, pinapanjari weꞌ Almasi amban pangandaꞌakan Tuhanin supaya pinahadje Almasi.

¹⁷ Gaꞌ pe niyaꞌ pinapanjari, andang ne Almasi duk kēmon bakas pinapanjarihin gaꞌ du usaꞌ peggeꞌ iye mangantanan siyehin.

¹⁸ Iye du isab magbayaꞌ si kēmon meꞌ masandel si iyehin. Kēmon siye dalil barannen duk iye kōkden. Iye poꞌon umul baꞌahuhin. Iye dehellu-dehellu pinakellum amban kamateynen supaya iye tamanan malangkewin duk mabangsahanin.

¹⁹ Peggeꞌ kabayaꞌan Tuhanin weꞌ Anaknen asal tattap kuweꞌ iyehin.

²⁰ Duk sabab Anakne inin kabayaꞌan Tuhanin weꞌ kēmon-kēmonin, hātinen kēmon meꞌ malaꞌi diyataꞌ langitin duk matuꞌu si dunyahin maghāp du balik duk iye. Duk sabab kamatey Anakne diyataꞌ olomin makajari siye pinaghāp duk iye.

²¹ Kaꞌam matuꞌuhin, tala kaꞌam amban Tuhanin. Duk meꞌ banta Tuhanin kaꞌam peggeꞌ meꞌ pikilanbin duk meꞌ hinanganbin laꞌat.

²² Saguwaꞌ kuweꞌitu maghāp ne kaꞌam duk Tuhanin sabab kamatey Isa Almasihin. Maglillaꞌ hep Isa Almasi pinapatey supaya hadja kaꞌam manjari meꞌ aꞌa sutsi pagateybin, gaꞌ niyaꞌ laꞌat-laꞌatbi, duk gaꞌ ne niyaꞌ panallaꞌan kaꞌam bang boꞌone kaꞌam si pasōngan laꞌi si harapan Tuhanin.

²³ Saguwaꞌ subey paꞌin kaꞌam pateteg pu si Isa Almasi. Daꞌa kaꞌam usaꞌ amban iye duk subey ase-asebi ne paꞌin kēmon pananggup Tuhan inaka dem aka-aka mahāp bakas takalebin. Aka-aka mahāp inin tamahalayak ne hep si kēmon aꞌa tuꞌu si dunya duk aku, si Paul, iye hinangkun magmahalayak inin.

Hinang si Paulin

²⁴ Manjari, kēgan pe ku magsandal kabinasahan peggeꞌ para si kahāpanbi du. Magsandal ku supaya ganap meꞌ sinandalan Isa Almasi meꞌ manggaꞌ pe maꞌubusin, hātinen supaya ganap meꞌ sinandalan barannen; hāti barannen meꞌ masandel si iyehin.

²⁵ Tahinang ku weꞌ Tuhanin daraꞌakan meꞌ masandel pu si Isa Almasihin supaya kaꞌam tatabanganku. Kawakilan ku weꞌ ne dinaꞌak minahalayak si kaꞌam lapalnen.

²⁶ Lapalne inin masa awwalley tinapukan weꞌ Tuhanin amban meꞌ manusiyaꞌin kēmon, saguwaꞌ kuweꞌitu pinakataꞌu ne weꞌ ne si kite bi meꞌ masandel si iyehin.

²⁷ Peggeꞌ kite bi hep tapeneꞌ weꞌ Tuhanin pangakahanne meꞌ tinapukannen, hātinen meꞌ mahāp tapikilne para si kēmon meꞌ aꞌa si dunyahin. Iye lapalne tinapukannen, weꞌ Isa Almasi asal patennaꞌ dem ateyte bi. Hangkan kabugtuꞌante bi ne weꞌ asal pahadjene du kite bi si surgaꞌ.

²⁸ Hangkan gaꞌ niyaꞌ seddili mahalayak kami luwal sabab si Isa Almasi. Sessaꞌan kami meꞌ aꞌahin duk usihatan kami siye kēmon meꞌ kinataꞌuhan kami sabab Isa Almasihin, supaya du siye dangan-dangan kahagad duk ngahaget ne teꞌed sandelde pu si Isa Almasihin.

²⁹ Iye inin inapaskun hangkan ku maghinang duk maggeꞌes ne paꞌin, duk inurungan du ku basag amban balakat Almasihin, iye manabangan akuhin.