Epesus 1 - Yakan

¹ Sulat inin amban aku, si Paul, pinasampay piyu si kaꞌam meꞌ aꞌa Tuhan luꞌu si lahat Epesusin, meꞌ mapateteg pu si Isa Almasihin. Amban bayaꞌ Tuhan hangkan ku inin kawakilan weꞌ Isa Almasi magmahalayak aka-aka mahāp amban iyehin.

² Karayaw luwal kaꞌam ipat Samaten bi Tuhanin duk Panuhutanten bi Isa Almasi. Karayaw isab pasanyangde dem ateybin.

Pudjite bi Tuhanin sabab tahinangne si kitehin bi

³ Pudjite bi Tuhanin, Sama Isa Almasi, Panuhutanten bi. Peggeꞌ magdambuwaꞌ ne kite bi duk Isa Almasi, iledjikiꞌan kite bi weꞌ Tuhanin. Pinangurung weꞌ ne si kite bi kēmon bayuꞌ-bayuꞌan kahāpan amban surgaꞌ, kahāpan gaꞌi usaꞌ salama-lama.

⁴ Gaꞌ pe dunyahin pinapanjari, andang ne kite bi tapeneꞌ weꞌ ne hinangne meꞌ aꞌane sabab magdambuwaꞌ kite bi duk Isa Almasi. Hangkan kite bi peneꞌne, supaya kite bi sutsi duk gaꞌ ne niyaꞌ tamak-tamakte bi si pagmatahanne.

⁵ Hawal lasane si kitehin bi, andang ne tapikil weꞌ Tuhanin weꞌ hinangne kite bi meꞌ anakne sabab bakas tahinang Isa Almasihin. Inin asal kasinnahannen duk kinabayaꞌanne hininangin.

⁶ Pudjite bi Tuhanin sabab lasane duk aseꞌne manggaꞌi takila-kilahin, iye lasane duk aseꞌne pinangurungne si kitehin bi sabab tahinang Isa Almasi, Anakne kinalasahannen.

⁷ Sabab kamatey Almasihin pinaluwas ne kite bi, hātinen inampun ne weꞌ Tuhanin meꞌ duseten bi. Asal hadje hep teꞌed lasa duk aseꞌ Tuhanin si kite bi!

⁸ Pangurungne si kite bi kēmon kataꞌu duk pamikil duk

⁹ pinakitaꞌu ne weꞌ ne si kite bi ginaraꞌne andangin. Gaꞌ inin niyaꞌ ngataꞌuhanne matuꞌuhin. Duk andang tapikilne weꞌ Almasi manumanan kēmon kinabayaꞌanne hininangin.

¹⁰ Kabayaꞌan Tuhanin hep weꞌ bang taꞌabut waktu pangeddewnen pinagdambuwaꞌ ne kēmon pinapanjarinen, kēmon malaꞌi si surgaꞌin duk kēmon matuꞌu si dunyahin, duk Almasi magbayaꞌ si siyehin kēmon.

¹¹ Kēmon hininang Tuhanin hininang weꞌ ne peggeꞌ inin kinabayaꞌannen duk inin ginaraꞌnen. Ubus, peggeꞌ iye ginaraꞌnen, tapeneꞌ kami weꞌ ne manjari meꞌ aꞌane peggeꞌ magdambuwaꞌ ne kami duk Almasi. Inin ginaraꞌnen kemuwe tagnaꞌ awwalley pe.

¹² Kami madehellu-dehellu mangase-ngase pu Almasihin. Iye jānnen hangkan kami tapeneꞌ, supaya pudji kami lasa duk aseꞌ Tuhanin.

¹³ Duk kaꞌam manjari aꞌa Tuhanin isab sakaliꞌ takalebi lapal mabennalin, hātinen aka-aka mahāp sabab katimbulanbin. Sandel kaꞌam pu si Almasi duk pinapiyu isab weꞌ Tuhanin si kaꞌam Niyawa Sutsi pananggupnen, tandaꞌ weꞌ sukuꞌ si iye ne teꞌed kaꞌam.

¹⁴ Niyawa Sutsi pinangurungne si kitehin bi, tandaꞌ weꞌ asal tasangkate bi du si pasōngan kēmon pananggup Tuhan si meꞌ aꞌanen, duk kabugtuꞌante bi ne weꞌ kaꞌujudannen luhaya teꞌed kite bi. Pudjite bi lasa duk aseꞌ Tuhanin.

Pangampun si Paulin

¹⁵ Iye hep inin sababnen hangkan kemuwe takaleku weꞌ sandel ne kaꞌam si Panuhutan kamihin si Isa, duk weꞌ malasa kaꞌam si kēmon meꞌ aꞌa Tuhanin,

¹⁶ gaꞌi ku padeheng magsukul si Tuhan sababbi. Bang ku ngampun, luwal du isab kaꞌam tabangkilku.

¹⁷ Duk māku-māku ku si Tuhan, Sama Panuhutanten bi Isa Almasi, Tuhan mapataꞌ pinudjihin. Māku-māku ku karayaw pangurungne kaꞌam Niyawa Sutsihin, iye mangurungan kataꞌu si kaꞌamin duk pakataꞌune du si kaꞌam pasal Tuhanin supaya pasōng Tuhanin kataꞌuhanbi.

¹⁸ Duk pāku-pākuku isab karayaw pinakellum akkalbin supaya tahātibi teꞌed bang ine inase-asebi amban iyehin peggeꞌ tapeneꞌ kaꞌam weꞌ ne dinaꞌak nuhut iye. Duk supaya isab tahātibi bang saꞌingge kahāp meꞌ bayuꞌ-bayuꞌan pananggupne pinangurung si meꞌ aꞌanen,

¹⁹ duk supaya isab tahātibi bang saꞌingge hadje balakatnen si kite bi meꞌ masandel si iyehin. Iye du isab inin balakat ginunanen

²⁰ sakaliꞌ pinakellum weꞌ ne balik Isa Almasi amban kamateynen duk pinatingkoloꞌ iye weꞌ ne si kanawanne, lugal mabangsahanin laꞌi si surgaꞌ.

²¹ Pinalangkew Almasi weꞌ Tuhanin. Langkew pe iye amban kēmon magbayaꞌin duk sasuku taga kapatut duk balakatin. Langkew gellalnen amban kēmon bakas ginellalin, dumaꞌin hadja si dunya inin saguwaꞌ sampay si ahilat.

²² Dinaꞌak Almasi weꞌ Tuhanin magbayaꞌ si kēmon-kēmonin. Duk iye tapeneꞌ Tuhan magnakuraꞌ si kēmon meꞌ masandel si iyehin.

²³ Isa Almasi dalil kōkin duk kēmon meꞌ masandel si iyehin dalil barannen. Tipun laꞌi si siye kēmon addat duk pikilan Almasihin. Duk antag-antag si dunya duk si surgaꞌ laꞌi iye.