तितास 1 - याक्खा1 निङ्वाफुमागा काम चोक्खुबा नुङ् खिरिस्ट येसुगा सेगुम्पाक का पावालङा ना छेप्फा छेप्मासिमेङ्॥ निङ्वाफुमाङा सेगुचिहा उका याॽमिचि बिस्वासपे चात्तु चोक्मागा नुङ् निङ्वाफुमागा उनिङ्वा लोॽवा जेप्पाहा चेॽयागा ग्यान पोटि तिक्मागा का उङा सेगाङ्होङ् पाक्सामाङ्॥ 2 ना बिस्वास नुङ् ग्यान च्हेन हेॽनिङ्चा मेन्सिमाना हिङ्लुङ्गा आसपे वान्नुङ्मे॥ हेॽनिङ्चा मेलेम्चाखुबा निङ्वाफुमाङा प्याक ओन्दाङ्माङ् कानिङ् ना हेॽनिङ्चा मेन्सिमाना हिङ्लुङ् पिमेॽनेनिन्हाभोङ् बाचा पियामासा॥ 3 न्हाङा उङा ठिक बेलाबेॽमाङ् उका चेॽया पार्काट चोगु॥ खा खेम्मेॽमाहा जिम्मा कानिङ् फोङ्खुबा निङ्वाफुमाभाङ् का तोक्तुक्सुङ्हा॥ 4 निङ्वाफुमाबे का लोॽवा बिस्वास चोक्खुबा जेप्पागा आच्या तितास, ङ्गा लागि ना छेप्फा छेप्मासिमेङ्॥ निङ्वाफुमा पा नुङ् कानिङ् मुक्ति पिखुबा खिरिस्ट येसुङा आनुगाराहा नुङ् हाङ्हाङ् पिक्कानि॥ केरेट्पे तितासङा चोक्माहा काम 5 न्नाबे बाकि वायाहा काम पुरा चोगुगानिभोङ् का न्दा केरेट्पे नाॽनानेन्ना ओम॥ ङ्खोङ्माङ् का लुॽनेन्हा लोॽवा घाक साहारचिबे एल्डारचि सेगुचि॥ 6 एल्डार ङ्खाॽलाना याॽमि सानि, उङ्बे आप्दिक एम्माहा इहाचा खोट् म्मानिन्नि॥ उका एको से उहिङ्खुमा सानि, उका उच्याचि उचुन्हा काम चोक्खुबा बिस्वासि न्सानि॥ न्हाङ् हेकोहा याॽमिङा लुयाहा चेॽया मेयेन्खुबा न्सानिन्नि॥ 7 इजाङ्बाङ्निङ् उङ्बेॽमाङ् निङ्वाफुमागा कामगा जिम्मा वामे॥ ङ्खोङ्माङ् उङ्बे आप्दिक एम्माहा चेॽया इहाचा मानिन्नि॥ उङ् उनिङ्वाताता चोक्खुबा, मिना चेॽयाबे लोक खोखुबा, सिङ्घोखुबा, खिङ्घोखुबा, तुङ्घोखुबा नुङ् याङ् लुङ्मा किप्खुबा न्सानिन्नि॥ 8 ङ्खाॽनिङ्गो उङ् खोलोङ्बाचि उचुन तुखुबा, उचुन्हा चेॽया से साप थाक्खुबा, प्याक मिॽमाहोङ् से काम चोक्खुबा, इसा चा तो-मो मेन्सोखुबा, पाबित्तारा नुङ् उङ् आफाइ तायेनबे वामा याखुबा सानि॥ 9 उङ् चिन्दाहा निङ्वाफुमागा जेप्पाहा चेॽयाबे लाचोङ्नुङ्खुबा सानि॥ कानिङ् चिन्दुम्ना लोॽवा उङा हेकोहा याॽमिचि चा निङ्वाफुमागा उतुम्बे जेप्पाहा चेॽया चिन्मा यासुचिनि, न्हाङ् ङ्खा चेॽयागा बिरोध चोक्खुबाचिगा गाल्ति सोॽमेॽमा यासुचिनि॥ 10 इजाङ्बाङ्निङ् प्याक याॽमिचि हेकोहा याॽमिगा तायेनबे मेवाखुबा, मेन्हा चेॽया चेक्खुबा नुङ् लेम्चाखुबा ङ्वान्नेहा॥ ङ्खाॽलाहाचि प्याक लोॽवा गो खाताना चोक्माहा काखुबाचि ङ्वान्ने॥ 11 ङ्खाचि चेक्मायि मेम्बिॽमाहाचि, इजाङ्बाङ्निङ् ङ्खाचिङा गो चिन्मायि मेलेङ्माहा इसिॽहा चेॽया चिन्साङ् पाङ्-पाङ्बे भाड्भाइलो माच्चा न्जोक्मासिम्मेहा॥ ङ्खाचिङा याङ्सा उप्मागा लागि से खा घाक न्जोगुहा ओम॥ 12 केरेट् पेॽना एको उङ्चिगा निङ्वाफुमाभाङ् चेक्खुबा याॽमिङा खाॽला कायामा, “केरेट्पेॽहा याॽमिचि साधाइ लेम्चाखुबा, इसिॽहा पोसु लोॽवा ब्याभार चोक्खुबा नुङ् पोम्हा खाइदेउ ओम्चि॥” 13 खा चेॽया जेप्पा ओम॥ न्हाङामाङ् ङ्खाचि तुक्नुङ् थिन्दुचि, न्हाङ् ङ्खाचि बिस्वासपे पाक्का न्लेङ्नि॥ 14 न्हाङा याहुदिचिगा केङ्ताप्लिक नुङ् जेप्पाहा चेॽया साप मेन्थाक्खुबा याॽमिचिगा आग्गे खेम्मायि ङ्खेप्सुनिन्नि॥ 15 उङ्चि निङ्वा सुद्दा वाखुबाचिगा लागि घाक थोक सुद्दाहा, ङ्खाॽनिङ्गो निङ्वा इसिॽहा नुङ् बिस्वास मेन्जोक्खुबाचिगा लागि इहाचा सुद्दा मेन्हा॥ इजाङ्बाङ्निङ् ङ्खाचिगा बिबेक नुङ् निङ्वामाङ् सुद्दा न्सामेन॥ 16 ङ्खाचिङा निङ्वाफुमा चिनातोक्तुक्सुम्ङाना गो ङ्गाम्मे, ङ्खाॽनिङ्गो ङ्खाचिगा कामङा च्हेन निङ्वाफुमा इन्कार न्जोग्वा॥ ङ्खाचि गो छिप्पाकेकेॽहा काम चोक्खुबाचि नुङ् आङ्धिङ्हाचि, न्हाङ् हेखाचा उचुन्हा काम चोक्मा न्थेन्दिसिॽवान्चिन्हा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.