रोमि 1 - याक्खासेवायो 1 का पावाल खिरिस्ट येसुगा सेवाकङा ना छेप्फा छेप्मासिमेङ्ना॥ निङ्वाफुमाङा का सेगुम्पाक लेङ्मागा कायाङ् न्हाङ् उका नुसाला खेम्मेॽमाहा कामगा लागि का फोक्साङ्॥ 2 न्ना नुसाला प्याक फिम्बिलिङ् ओन्दाङ् निङ्वाफुमाङा पिमेॽनेनिन्हाभोङ् बाचा पियामासा॥ खा चेॽयागा उतुम्बे निङ्वाफुमाभाङ् चेक्खुबाचिङा पाबित्तारा धार्मासाप्लाबे न्छेप्तुक्सा॥ 3 ना नुसाला च्हेन निङ्वाफुमागा उच्या हाङ्बा येसु खिरिस्टका उतुम्बे ओम॥ उङ् याॽमि लेक्साराया, उका वाम एङ्गा हाङ् दाउदका छोङ्भाङ् लेक्सा॥ 4 न्हाङ् पाबित्तारा आत्माङा उङ् निङ्वाफुमागा उच्या ओमभोङ् सोॽमेता, इजाङ्बाङ्निङ् आत्मागा साक्तिङा उङ् स्यानाभाङ् फेरि हिङ्गिलिक लेक्सा॥ 5 एङ्गा हाङ्बा येसु खिरिस्टभाङ् निङ्वाफुमाङा कानिङ् उका आनुगाराहा सोॽमेताहोङ् कानिङ् उका सेगुम्पाक चोगामा॥ घाक जातिगा याॽमिचिङा बिस्वास न्जोगुहोङ् उङा लुचिहा चेॽया ङ्येनुनिभोङ् कानिङ् उका उनिङ्बे पाक्साहा ओम॥ 6 न्हाङ् न्निङ्दा रोमबे वाखुबाचि चा ङ्खाचिनुङ् येसु खिरिस्टका याॽमि लेङ्मागा काइमिघा॥ 7 न्हाङामाङ् निङ्वाफुमाङा उलुङ्मा तुक्तिघोङ् उका याॽमि लेङ्मागा काइघा रोम साहारबेॽहा घाक आफुआनुन्छा आनाआनुन्छाचि, एङ्गा निङ्वाफुमा पा नुङ् हाङ्बा येसु खिरिस्टङा न्निङ्दा आनुगाराहा नुङ् हाङ्हाङ् पिइगानि॥ पावाल रोम खेॽमा मिताना 8 घाक हाक्निङ् ओन्दाङ्, येसु खिरिस्टका उनिङ्बे का निङ्वाफुमा नुनिङ्वा पिवाङ्, इजाङ्बाङ्निङ् खिरिस्टपेॽना न्निङ्गा बिस्वासका उतुम्बे कायुङ्लेन घाकपे हिसामा॥ 9 का आनिङ्वाभाङ् निङ्वाफुमागा उच्यागा नुसाला खेम्मेत्वाङ्चिङ्होङ् उका सेवा चोग्वाङ्॥ का न्निङ्दा म्मुॽनिनुङ्नेनिन्हा, का न्निङ्गा लागि साधाइ पार्थाना चोक्मासिमेङ्ना, खा चेॽयागा साचि निङ्वाफुमा वान्नेॽना॥ 10 निङ्वाफुमागा उनिङ्वा लेक्साभोङ् आखेरिबे होङ्चा न्निङ्दानुङ् तुप्मा याङानिभोङ् का पार्थाना चोक्मासिमेङ्ना॥ 11 इजाङ्बाङ्निङ् पाबित्तारा आत्माङा का पियाङ्हा आसिक न्निङ्दानुङ् हाम्माहोङ् न्निङ्दा बिस्वासपे चात्तु चोक्मागा न्निङ्दानुङ् इब्बे-इब्बे तुप्मा मितामाङ्ना॥ 12 का न्नाबे तायाङ्भोङ् न्निङ्दा आका बिस्वास निस्वाम्गाहोङ् उत्साहा तोक्त्वाम्गा न्हाङ् न्निङ्गा बिस्वास निस्वाङ्होङ् का उत्साहा तोक्त्वाङ्॥ 13 आफुआनुन्छा आनाआनुन्छाचि, खा चेॽया न्निङ्दा था तोक्तुम्गानि बाङ्ना का मिमेङ्– का प्याक खेप न्निङ्दाबे तामागा चोगाङ् ङ्खाॽनिङ्गो एकोनाएको कारानङा तामा ङ्यासाङान॥ का हेकोहा जातिगा याॽमिचिगा उलुम्बे चोगुङ्हा लोॽवा न्निङ्दा चा बिस्वासपे चात्तु चोक्मा नुङ् हेकोहा याॽमिचि खिरिस्टपे ताॽमा मितुक्सुङ्चिङ्हा॥ 14 इजाङ्बाङ्निङ् गिरिक होङ्चा, पोढान्जोगानिन्हा हेकोहा जातिगा याॽमिचिहोङ्चा, बुद्दिमानि होङ्चा, बुद्दिमानि मेन्हाचि होङ्चा ङ्खा घाक याॽमिचि का नुसाला खेम्मेॽमामाङ् पोर्ने ओम॥ 15 न्हाङामाङ् न्निङ्दा रोम साहारबे वाखुबाचि चा खा नुसाला खेम्मेॽमाना आका माडा आनिङ्वा वेॽना॥ 16 का खा नुसाला खेम्मेॽमा ङ्ङोन्सिमेङान्ना, इजाङ्बाङ्निङ् खा नुसालाभाङ् माङ् याहुदिचि हिङ्मेता॥ न्हाङा हाकु खा नुसालामाङ् हेकोहा जातिगा याॽमिचि हिङ्मेॽमाहा निङ्वाफुमागा साक्ति ओम॥ 17 इजाङ्बाङ्निङ् नुसालाभाङ् याॽमिचि निङ्वाफुमाङा उका उयुम्बे इमिन धार्मोति ठारेचोग्वाचिहा बाङ्ना सोॽमेमे॥ खा चेॽया बिस्वासभाङ् सुरु लेङ्मे, न्हाङ् बिस्वासभाङ् पुरा चा लेङ्मेहा॥ धार्मासाप्लाबे खाॽला छेप्तामा, “धार्मोति याॽमि च्हेन बिस्वासङामाङ् हिङ्मेॽना॥” पापका बिरुद्दाबे निङ्वाफुमागा निरिक 18 याॽमिचिगा पाप नुङ् इसिॽहा कामगा बिरुद्दाबे निङ्वाफुमागा इखिङ् प्याक ओलोक खोतामाना बाङ्ना चेॽया वालोकपाहाङ् सोॽमेतुक्सुचिहा॥ ङ्खाचिगा आधार्माङा हेकोहा याॽमिचि सात्या चेॽया मेआखुबा न्जोगुक्सुचि॥ 19 निङ्वाफुमाङा ङ्खाचि दान्डा पिवाचिहा, इजाङ्बाङ्निङ् निङ्वाफुमागा उतुम्बे आमायामाहा चेॽया निङ्वाफुमा आफाइङा ङ्खाचि उचुन सोॽमेतुक्सुचिहा॥ 20 खा चेॽया जेप्पा ओम, निङ्वाफुमागा साधाइ वान्नुङ्खुबा साक्ति नुङ् उङ् इमिन्नाभोङ् कानिङ् एङ्गा मिकङा निमा ङ्यास्वाम्निन, ङ्खाॽनिङ्गो कायुङ्लेनगा सुरु नाहाङ्तोमाङ् उङा चोगुहा चेॽयाभाङ् याॽमिचिङा निङ्वाफुमा उचुन चिनाचोक्मा ङ्यास्वा॥ ङ्खोङ्माङ् ङ्खाचिङा इनाचा बाहाना चोक्मा न्दोत्वानिन्ना॥ 21 ङ्खाचिङा निङ्वाफुमा चिना न्जोगुहोङ्चा निङ्वाफुमा पिॽमाहा माहिमा म्बिनिन, नुनिङ्वा चा म्बिनिन॥ इजाङ्बाङ्निङ् निङ्वाफुमाङा उसाप थाक्माहा चेॽया च्हेन उङ्चिङा मुर्खा चेॽया म्मितु, न्हाङ् उङ्चिगा मुर्खा निङ्वा झान कुइम लेक्सा॥ 22 ङ्खाचिङा कानिङ् बुद्दिमानिसिङान ङ्गाया, ङ्खोङ्चा मुर्खा न्लेक्सा॥ 23 न्हाङा ङ्खाचिङा हेॽनिङ्चा मेन्सिखुबा निङ्वाफुमा आदार चोक्मागा साटो नास लेङ्खेखुबा याॽमिचि, पोसुचि, न्वाकुच्याकचि नुङ् उङ्चि फोक सोसाङ् खामबे लाम्खुबा जिवातचिगा मुर्ति न्जोगुचिहोङ् पुजा न्जोगुचि॥ 24 न्हाङामाङ् ङ्खाचिगा निङ्वाङा योगुहा छिप्पाकेकेक्हा चेॽया लोॽवा चोक्मागा निङ्वाफुमाङा ङ्खाचि लेहाक्सुचि॥ न्हाङ् ङ्खाचिङा उङ्चि-उङ्चिबे ङोन्सिॽमाचेक्चेक्हा काम न्जोगु॥ 25 ङ्खाचिङा निङ्वाफुमागा सात्याता बिस्वास चोक्मागा साटो मेन्हा चेॽयाबे बिस्वास न्जोगु॥ न्हाङा घाक थोक चोक्खुबा निङ्वाफुमागा आराधाना चोक्मागा साटो उङा चोगुहा थोक्का पुजा न्जोगु, न्हाङ् ङ्खाचिगा सेवा न्जोगु॥ 26 न्हाङामाङ् निङ्वाफुमाङा ङ्खाचि उङ्चिगा निङ्वाङा योगुहा छिप्पाकेकेक्हा काम न्जोगुनिभोङ् लेहाक्सुचि॥ ङ्खाचिगा मामुचिङा उङ्चि हिङ्खुबाचिनुङ् इम्मा न्लेप्तिहोङ् मामु-मामु इम्साङ् इसिॽहा छिप्पाकेकेक्हा काम चोक्मा न्दारोक्तु॥ 27 ङ्खाॽलामाङ् बाबुचिङा चा उङ्चि हिङ्खुमाचिनुङ् उचुन्हा बेभार न्जोगुनिन, ङ्खाॽनिङ्गो एकोङा हेकोनाबे उमिक एन्दुहोङ् बाबुङा बाबुनुङ् इसिॽहा काम न्जोगु॥ न्हाङा ङ्खाचिङा न्जोगुहा इसिॽहा कामगा दान्डा न्दोक्तु॥ 28 ङ्खाचिङा निङ्वाफुमा पिॽमा पोर्ने निङ्ला पिॽमा न्लेप्ति॥ न्हाङामाङ् ङ्खाचिङा म्मितुहा लोॽवा इसिॽहा काम न्जोगुनिभोङ् उङा लेहाक्सुचि, न्हाङ् चोक्मा मेलेङ्माहा काम चोक्मा न्दारोक्तु॥ 29 ङ्खाचि घाक खाल्गा इसिॽहा चेॽया नुङ् दुस्टाताङा इप्तुक्सुचि॥ ङ्खाचि पोहोङ् लेङ्माहा, याॽमि इसिॽमाहा, नाहेम्माहा, याॽमि सिमाहा, खिमा-तुमाहा, लेम्चामाहा, मेनाहा चेॽया चेक्माहा नुङ् छुल पिॽमाहा चेॽयाङा इप्तुक्सुचिहा॥ 30 ङ्खाचिङा याॽमिचिगा आब्रुक लेम्नाहाङ्माहा काम न्जोग्वा, ङ्खाचिङा निङ्वाफुमा चा ङ्ङिसित्वा, इसा चा आदार न्जोग्वान्चिनिन, आफाइ काङान ङ्गामे, माम्माहा चेॽया न्जेक्त्वा न्हाङ् इसिॽहा चेॽया से ङ्योगुभोक्स्वा॥ ङ्खाचिङा पा-मागा चेॽया ङ्येन्वानिन॥ 31 ङ्खाचि मुर्खाहाचि न्हाङ् चोग्वाम्ङाहा ङ्गायाहा चेॽया न्जोग्वानिन॥ ङ्खाचि इसा चा लुङ्मा मेन्दुक्खुबा नुङ् दाया मेॽनिङ्हाचि॥ 32 खाॽलाहा काम चोक्खुबाचिङा सिमाना दान्डा न्दोक्त्वाना बाङ्ना चेॽया निङ्वाफुमागा धार्मिक नियामबे न्निस्वाहोङ्चा खाॽलाहा काम न्जोग्वा॥ ङ्खिङ्से मेन्ना, ङ्खाचिङा खाॽलाहा काम चोक्खुबाचि थेन्माहा काम चा न्जोग्वा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.