पार्कास 1 - याक्खाछेप्तापका उतुम्बे युहान्ना कामे 1 ना छेप्तापपे येसु खिरिस्टङा सोॽमेतुहा चेॽया छेप्तामा॥ ङ्खा चेॽया हानि लेक्सेहेक्साहा॥ ङ्खा चेॽयामाङ् निङ्वाफुमाङा उका याॽमिचि सोॽमेमागा येसु खिरिस्ट पि॥ येसु खिरिस्टङा खा चेॽया उका सेवाक युहान्नाङा आसुनिभोङ् वालोक्दुत युहान्नागाबे पाक्सु॥ 2 न्हाङा युहान्नाङा निसुहा घाक चेॽया नाबे छेप्तुक्सु, खा चेॽया च्हेन निङ्वाफुमागा चेॽया नुङ् येसु खिरिस्टका गाबाहि ओम॥ 3 इसाङा ना छेप्तापपे छेप्ताहा निङ्वाफुमागा चेॽया माडा सेम्लाङा पोढा चोग्वा, नाबेॽहा आगाम्बानिगा चेॽया खेप्स्वा न्हाङ् पालाना चोग्वा, न्ना याॽमि आसिक तोक्खुबा ओम॥ इजाङ्बाङ्निङ् खा घाक चेॽया पुरा लेङ्माना बेला तायाब्यामाना॥ ला छुम्वाङ्चि युहान्नाभाङ् सेवायो 4 का युहान्नाङा एसिया लिङ्खामबेॽहा ला ओटा छुम्वाङ्चि छेप्मासिमेॽनेनिन: खिङ्बेला वान्नेॽना, ओन्दाङ् नाहाङ्तो वायाना, न्हाङ् वान्दिक सोम्मा वान्नुङ्खुबा निङ्वाफुमाभाङ् नुङ् उका हाङ्युक्थामगा ओन्दाङ् वाखुबा ला ओटा आत्माचिभाङ् न्निङ्दा आनुगाराहा नुङ् हाङ्हाङ् लेक्सिगानि॥ 5-6 न्हाङ् बिस्वास योग्या साचि नुङ् न्स्याहोङ् हिङ्गिलिक न्लेक्साहा माध्येबे घाक हाक्निङ् तुम्ना, कायुङ्लेनबेॽहा हाङ्चिगा हाङ् येसु खिरिस्ट भाङ्चा न्निङ्दा आनुगाराहा नुङ् हाङ्हाङ् लेक्सिगानि॥ उङा कानिङ् उलुङ्मा तुक्ता, न्हाङ् उका बोलिदानगा हेलिङा कानिङ् पाप पाहाङ् फोक्सामा॥ उङा कानिङ् उका निङ्वाफुमा नुङ् पागा सेवा चोक्मागा हाङ्खुबागा चोक्तोक पियामा॥ उका माहिमा नुङ् आदार साधाइ-साधाइ लेङ्नुङ्नि॥ आमेन॥ 7 सोयानुम, उङ् खिम्फुरुम्माबे तामे, न्हाङ् घाक याॽमिचिङा उङ् न्निस्वाना॥ छोम्लाम्फिङा होखुबाचिङा चा उङ् न्निस्वाना, न्हाङ् उका कारानङा कायुङ्लेनबेॽहा घाक जातिगा याॽमिचि सोक न्जोङ्मेहा॥ जेप्पा, खाॽलामाङ् लेङ्नि आमेन॥ 8 घाक हाक्निङ् साक्तिसालि हाङ्बा निङ्वाफुमा खाॽला कामे, “आल्फा नुङ् ओमेगा कामाङ् ओम्ङान”उङ् खिङ्बेलाक वान्ने, ओन्दाङ् चा वाया, न्हाङ् वान्दिक तामेॽना॥ याॽमिगा उच्यागा सेन्चि 9 का युहान्ना, न्निङ् फुङान॥ खिरिस्ट येसुबे बिस्वास चोगुङ्नाङा का चा न्निङ्दानुङ् प्याक तुखि आङ्मासिमेङ्, ङ्खा तुखि च्हेन उका राज्याबे वाखुबाचिबे आमेहा॥ का निङ्वाफुमागा चेॽया नुङ् येसु खिरिस्टका गाबाहि पिङ्चिङ्हाङा एको छेक्पा लेक्साङ्होङ् पात्मोस बाङ्ना टापुबे वायाङ्॥ 10 हाङ्बागा लेनबे का आत्माबे वायाङ्, ङ्खिङ्बेला तुराहिगा लोॽवाना एको माडा सेम्लाङा आहेक्साङ्बे खाॽला कामास्याना का खेप्सुङ्, 11 “न्दा इहा निस्वागा, ङ्खा एको ह्वारिक्का छेप्तापपे छेप्तु, न्हाङ् ला ओटा छुम्वाङ्चि एफिसास, स्मुर्ना, पार्गामाम, थिआटिरा, सार्डिस, फिलाडेल्फिया नुङ् लाउडिकियाबे हाक्तुचि॥” 12 कानुङ् चेक्खुबा इसा ओमभोङ् हिक्साङ्होङ् सोङ्निङ् ला ओटा साम्मेङ्गा साम्दान निसुङ्चिङ्॥ 13 न्हाङ् साम्दानचिगा उलुम्बे उलाङ् सोम्मा तेक वाखुबा, छातिबे साम्मेङ्गा पेटि थुन्खुबा याॽमिगा उच्या लोॽवाना एको निसुङ्॥ 14 उका उताम्फोक रुवा नुङ् नाङ् लोॽवा फु साया न्हाङ् उमिकचि च्हेन मिलेप लोॽवा हान्दुक्साचि॥ 15 उलाङ्चि माडा मिबे खारेचोगाहोङ् छेम लेक्साना कास लोॽवा चाम्का न्जोगामासा, न्हाङ् ओसेम्ला च्हेन माडा होङ्मा कायाना लोॽवा खेप्सा॥ 16 उका छुप्ताङ् उमुकङा ला ओटा चोक्चोकिचि लाबुक्साचि, न्हाङ् उका उयाभाङ् हिच पोटि धारनुङ्ना धारिलोना साम्बेक लोन्दामासा॥ उका उनाचिक लेॽनि इब्बे-इब्बे चाम्काचोगाना नाम लोॽवाना साया॥ 17 का उङ् निसुङ्होङ् स्याङ्ना लोॽवा लेक्साङ्होङ् उलाङ्बे फोप फोप्ताङ्॥ ङ्खाॽनिङ्गो उङा छुप्ताङ् उमुक का छोङ्बे युक्सुहोङ् खाॽला लुयाङ्, “ङ्गिसितान, उथुक नुङ् आखेरि कामाङ् ओम्ङान॥ 18 हिङ्गिलिक लेङ्खुबा कामाङ् ओम्ङान॥ का स्यामासाङ्, ङ्खाॽनिङ्गो हाकु साधाइगा लागि हिङ्गिलिक लेक्सामाङ्ना॥ सिमाहा चेॽया नुङ् पातालगा साचोचि आका आमुकपे ङ्वान्नेहा॥ 19 न्हाङामाङ् न्दा इहा निस्वागा, इहा लेङ्मासिमे न्हाङा इहा वान्दिक लेङ्मे ङ्खा घाक चेॽया छेप्तु॥ 20 आका छुप्ताङ् आमुकपे निसुचिघा खा ला ओटा चोक्चोकिचि नुङ् ला ओटा साम्मेङ्गा साम्दानगा इसाङा चा था न्दोक्तुनिन्हा तुम्बिला च्हेन खा ओम, ला चोक्चोकिचि ला छुम्वाङ्गा वालोक्दुत ओम्चि, न्हाङ् ला ओटा साम्दान च्हेन ला ओटा छुम्वाङ् ओम्चि॥” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.