फिलिप्पि 3 - याक्खाजेप्पागा धार्मिक्ता 1 आखेरिबे आफुआनुन्छा आनाआनुन्छाचि, हाङ्बाबे न्निङ्दा आनान्दित लेक्सानि॥ का ओन्दाङ् छेप्नेनिन्हा चेॽया दाफे-दाफे छेम्नुङ्मा झार्को ङ्येमेङान्ना, खा चेॽयाङा न्निङ्गा बिस्वास जोगाचोग्वाना॥ 2 न्निङ्दा कुचुमाचि लोॽवा खिखुबा, इसिॽहा काम चोक्खुबा नुङ् सालुङ्बे खाताना चोक्खुबाचिभाङ् थाङ्थाङ् वायानि॥ 3 इजाङ्बाङ्निङ् निङ्वाफुमागा जेप्पागा खाताना चोक्खुबा याॽमिचि गो कानिङ् ले सिइन, कानिङ् आत्माङा निङ्वाफुमा आराधाना चोग्वाम न्हाङ् खिरिस्ट येसुगा उनिङ् थेन्द्वाम॥ कानिङ् गो याॽमिङा न्जोगुहा ओॽमाहा कामबे भोरोसा युङ्खुबा मेतिसिन्हा॥ 4 ङ्खोङ्चा काबे च्हेन ओॽमाहा कामबे भोरोसा युङ्माहा कारान वेॽहा॥ कोइ याॽमिङा ङ्खाॽलाहा चेॽयाबे भोरोसा युङ्माना कारान वेॽना मिमेॽनाभोङ्, कानुङ् को झान प्याक कारान वान्नेहा॥ 5 इजाङ्बाङ्निङ् आका वाम लेक्साना ता लेनबे आका खाताना लेक्साना ओम॥ का बेन्यामिन छोङ्गा इजिरेलि जातिङान, न्हाङ् जेप्पागा हिब्रु याॽमिङान॥ ब्यावास्थागा उतुम्बे कामामाङ्भोङ् फारिसि सायाङ्॥ 6 याहुदि धार्मागा लागि जोसका उतुम्बे कामाहाभोङ् खिरिस्टका छुम्वाङ् इब्बे-इब्बे तुखि पिखुबा, धार्मिक्तागा उतुम्बे ओमभोङ् निङ्वाफुमागा उनिङ्वा लोॽवा घाक धार्माकार्मा चोक्खुबा सायाङ्॥ 7 ङ्खाॽनिङ्गो ङ्खिङ्बेला का आका लागि उचुन एतुङ्हा घाक चेॽया हाकु खिरिस्टका लागि गो ब्यार्था एत्वाङ्हा॥ 8 खिङ्से मेन्ना, येसु खिरिस्ट आका हाङ्बा चिनाचोक्मा तोक्तुङ्होङ् हेकोहा घाक चेॽया ब्यार्था एतुक्सुङ्हा॥ उका लागिमाङ् का घाक चेॽया नासिक्सुङ्, न्हाङ् का उङ् उचुन चिनातोक्मा यासुङ्निभोङ् खा घाक चेॽया कासिङ्गार लोॽवा एत्वाङ्हा॥ 9 का उका लेङ्मायाङानिभोङ् का ङ्खाॽला चोङ्मेङ्ना॥ का ब्यावास्था पालाना चोग्वाङ्होङ् निङ्वाफुमागा ओन्दाङ् ठिक ठारेचोक्मा ङ्यामेङान्ना॥ ङ्खाॽनिङ्गो का खिरिस्टपे बिस्वास चोगुङ्नाङा हाकु निङ्वाफुमाङामाङ् का धार्मोति ठारेचोगामाङ्ना॥ ना धार्मिक्ता बिस्वासपाहाङ् तामेॽना॥ 10 का उङ् चिनातोक्मा न्हाङ् उङ् हेॽना साक्तिङा हिङ्गिलिक लेक्सा न्ना साक्ति माहासुस चोगुङ्नि, न्हाङा उङा तुखि आङ्दुहा लोॽवा का चा तुखि आङ्दुङ्होङ् स्याङ्भोङ्चा उङ् लोॽवा लेङ्मा तोक्तुङ्नि मितामाङ्ना॥ 11 न्हाङ् इमिन्होङ्चा स्यानाभाङ् का चा वान्दिक हिङ्गिलिक लेङ्मा याङानि॥ लाक्छ्या पोटि लुक्माहा 12 का घाक चेॽया ओन्दाङ् चोगिक्सुङ् न्हाङ् सिद्दा लेक्साब्यामाङ्ना भोङ् का ङ्गामेङान्ना, ङ्खाॽनिङ्गो ङ्खा चेॽया तुम्मागा लागि का लुक्मासिमेङ्ना॥ न्नागा लागि खिरिस्ट येसुङा का ओन्दाङ्माङ् उका चोगिॽयामाङ्ना॥ 13 आफुआनुन्छा आनाआनुन्छाचि, का खा घाक चेॽया तोक्तिक्सुङ्हा लोॽवा गो ङ्ङेमेङान, ङ्खाॽनिङ्गो का एको काम च्हेन चोग्वाङ्, न्ना च्हेन लेक्साब्याहा चेॽया मुॽनिसाङ् हाकु आका ओन्दाङ् तायेॽहा चेॽया तोक्मा कोसिस चोङ्मेङ्ना॥ 14 ङ्खोङ्माङ् वालोक्का इनाम तोक्माना हिसापङा का लाक्छ्या पोटि लुक्मासिमेङ्ना॥ निङ्वाफुमाङा नागा लागिमाङ् खिरिस्ट येसुभाङ् मेन्सिमाना हिङ्लुङ् तोक्मागा का कायामाङ्ना ओम॥ 15 कानिङ् आत्माबे पुसिहोङ् चात्तु लेक्सिहा घाकङा च्हेन आका चेॽया सुइकार चोक्माहोङ् खाॽलामाङ् मिॽमाहा॥ कोइ कोइबे हेकोहा निङ्वा ङ्वेॽहाभोङ् चा निङ्वाफुमाङामाङ् न्निङ्दा सोॽमेतिइवाघा॥ 16 ङ्खाॽनिङ्गो कानिङ् इहा तोक्तिक्सुम ङ्खाबे चात्तु लेक्सिहोङ् वाइ॥ 17 आफुआनुन्छा आनाआनुन्छाचि, न्निङ्दा चा का लोॽवा चोगानि॥ कानिङ् न्निङ्गा लागि एको उचुन्ना साङ्खालाम लेक्सिमिङ्, कानिङ् लोॽवा चोक्खुबाचिभाङ् चिन्दानि॥ 18 का प्याक खेप न्निङ्दा लुॽनेनिन्हा याॽमिचिगा उतुम्बे का फेरि चा हाप्साङ् लुमेॽनेनिन, ङ्खाचि खिरिस्टङा कुरुसपे चोगुहा कामगा विरोध चोक्साङ् न्लाम्घोमे॥ 19 ङ्खाचि नाराकपे नास न्लेङ्मेहा, इजाङ्बाङ्निङ् ङ्खाचिगा फोक माङ् ङ्खाचिगा निङ्वाफुमा ओम॥ ङ्खाचि ङोन्सिॽमा पोर्ने चेॽयाबे झान घामान्डा न्जोङ्मे॥ न्हाङ् ङ्खाचिगा निङ्वा चा ना कायुङ्लेनबेॽहा चेॽयाबे से वान्नेॽना॥ 20 ङ्खाॽनिङ्गो कानिङ् वालोकपेॽहा याॽमिसिन॥ न्हाङ् कानिङ् मुक्ति पिखुबा एङ्गा हाङ्बा येसु खिरिस्ट वालोकपाहाङ् तामेॽनाभोङ् कानिङ् लाम्बु सोॽमासिइवा॥ 21 उङा घाक थोक उका तायेनबे ताॽमा यास्वाहा॥ उका न्ना साक्तिङामाङ् एङ्गा काम्जोर सालुङ् उका लोॽवा माहिमानुङ्ना चोग्वाना॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.