फिलिप्पि 1 - याक्खा1 ना छेप्फा कान्चिङ् येसु खिरिस्टका काम चोक्खुबा पावाल नुङ् तिमोथिङा फिलिप्पि साहारबेॽहा येसु खिरिस्टपे बिस्वास चोक्खुबा एल्डारचि नुङ् छुम्वाङ्बे काम फाखुबाचि न्हाङ् निङ्वाफुमागा घाक याॽमिचिगा लागि छेप्मासिमेङ्चिङ्हा॥ 2 एङ्गा निङ्वाफुमा पा नुङ् हाङ्बा येसु खिरिस्टङा न्निङ्दा आनुगाराहा नुङ् हाङ्हाङ् पिइगानि॥ पावालगा पार्थाना 3 न्निङ्दा मिमेॽनेनिन्निङ् का साधाइ आका निङ्वाफुमा नुनिङ्वा पिवाङ्॥ 4 न्हाङ् न्निङ्दा घाक्का लागि का पार्थाना चोङ्मेङ्निङ् साधाइ चोन्सिसाङ् पार्थाना चोङ्मेङ्ना॥ 5 इजाङ्बाङ्निङ् न्निङ्दा बिस्वास चोगुम्गाना नाहाङ्तो खिङ्बेला सोम्मा नुसालागा कामबे कानिङ् फाॽमासिमेका॥ 6 निङ्वाफुमाङा न्निङ्दाबे तारोक्तुहा उचुन्हा काम येसु खिरिस्ट तामाना लेन सोम्मा निङ्वाफुमाङामाङ् पुरा चोग्वाहा बाङ्ना का जेप्पा बिस्वास चोग्वाङ्॥ 7 न्निङ्दा साधाइ आका आनिङ्वाबे युङ्नुङ्नेनिन्हा॥ न्निङ्गा उतुम्बे खाॽला मिॽमामाङ् का उचुन एताङ्, इजाङ्बाङ्निङ् खिङ्बेला का छेक्पाङ्बे वेॽङानिङ् नुङ् पाखा वायाङ्निङ्चा नुसाला जोगाचोक्माहा नुङ् खा जेप्पागा ओमभोङ् पार्मान पिॽमाहा कामबे निङ्वाफुमाङा कानिङ् पियाहा खा घाक आनुगाराहाबे न्निङ्दा घाक कानुङ् सोरि वेॽनेतिगा॥ 8 का न्निङ्दा खिरिस्ट येसुङा लोॽवा जेप्पा आलुङ्मा तुङ्मेॽनेनिन, न्हाङ् का न्निङ्दानुङ् इब्बे-इब्बे तुप्मा मिमेङ्ना बाङ्ना चेॽयागा साचि निङ्वाफुमा वान्नेॽना॥ 9 आका पार्थाना ना वान्ने, न्निङ्दा ग्यान, बुद्दि नुङ् ङ्खा हाक्निङ्चा प्याक लुङ्मा तुक्खुसाचामाहा चेॽयाबे पुसाङ् ख्यानि॥ 10 ङ्खाॽला न्निङ्दा घाक हाक्निङ् उचुन्हा नुङ् इसिॽहा चेॽया खुटेचोक्मा यास्वाम्गा, न्हाङ् खिरिस्ट तामेॽनिङ् न्निङ्दा पाबित्तारा नुङ् आप्दिक मेॽनिङ्हा लेक्सिॽवाघा॥ 11 न्हाङा निङ्वाफुमागा माहिमा नुङ् पार्साम्सागा लागि येसु खिरिस्टपाहाङ् तायाहा उचुन्हा काम न्निङ्गा हिङ्लुङ्बे प्याक ओमेहा॥ पावालगा चोन्सिॽमाना चेॽया 12 आफुआनुन्छा आनाआनुन्छाचि, का छोङ्बे आयाराहा चेॽयाङा गो नुसाला हिमाहा काम लेक्सामाहाभोङ् था तोक्तुम्गानि बाङ्ना का मिमेङ्ना॥ 13 इजाङ्बाङ्निङ् का खिरिस्टका उतुम्बे पार्चार चोगुङ्होङ् छेक्पाङ्बे आयाङ्ना चेॽया हाङ्पाङ्बेॽहा घाक काङ्बाचि नुङ् घाक हेकोहा याॽमिचिङा चा था न्दोक्तुक्सु॥ 14 का छेक्पाङ्बे आयाङ्नाङा प्याक लोॽवा फुनुन्छा नानुन्छाचि हाङ्बाबे चात्तु न्लेक्सामा, न्हाङ् मेङ्गिसिॽले नुसाला खेम्मेॽमागा आटिलो न्लेक्सामाहा॥ 15 इखिङ् याॽमिचिङा गो उङ्चि नाहेम्माङा खिरिस्टका पार्चार न्जोग्वा, न्हाङ् इखिङ्ङा च्हेन उचुन्ना निङ्वाङामाङ् पार्चार न्जोग्वा॥ 16 ङ्खा उचुन्ना निङ्वाङा पार्चार चोक्खुबाचिङा का लुङ्मा तुङ्मेहोङ् पार्चार न्जोग्वा, इजाङ्बाङ्निङ् नुसालागा सात्याता जोगाचोक्मागा लागि निङ्वाफुमाङा का नाबे युक्सामाङ्ना ओम बाङ्ना चेॽया ङ्खाचिङा था वान्ने॥ 17 ङ्खाॽनिङ्गो नाहेन्चाचिङा च्हेन छेक्पाङ्बे का हाकुचा प्याक तुखि आङ्मा पोराचोक्निभोङ् इसिॽना निङ्वाङा खिरिस्टका पार्चार न्जोग्वा॥ 18 जेहोङ्चा, हाकु मुक्खे चेॽया च्हेन ना ओम– इमिन्ना किसिमङा होङ्चा, उचुन्ना निङ्वाङा होङ्चा इसिॽना निङ्वाङा होङ्चा खिरिस्टका पार्चार लेङ्नि, खा चेॽयाबेॽमाङ् का चोन्सिमेङ्ना॥ 19 इजाङ्बाङ्निङ् का खा चेॽया था वान्ने, न्निङ्गा पार्थाना नुङ् येसु खिरिस्टका आत्माङा फामेङ्होङ् नाभाङ् का लोम्मा यामेङ्ना॥ 20 का चोगुङ्हा कामबे का ङोन्सिॽमाबे ङ्ङामेङान्ना, ङ्खाॽनिङ्गो साधाइ साहासि याॽमि लेङ्माहोङ् सिमा पोराचोक्होङ्चा हिङ्मा पोराचोक्होङ्चा आका घाक हिङ्लुङ्भाङ् खिरिस्टका उनिङ् थेन्माहा काम लेङ्नि बाङ्ना आका माडा आनिङ्वा नुङ् आसा वान्नेॽना॥ 21 इजाङ्बाङ्निङ् का हिङाङ्भोङ् खिरिस्टका आदारगा लागि हिङ्मेङ्, ङ्खाॽनिङ्गो स्याङ्भोङ्चा आका लागि झान उचुन्ना चेॽया ओम॥ 22 ङ्खाॽनिङ्गो का हिङामासाङ्भोङ् हाकुचा उचुन्हा काम लेङ्मेहा॥ न्हाङामाङ् सिमा नुङ् हिङ्मा हेॽना सेक्मा पोर्ने ओम, न्ना का कामा ङ्यामेङान्ना॥ 23 का इना सेगुङ् इना सेगुङ् लेक्सामाङ्ना॥ का गो ना कायुङ्लेन नाॽनामाहोङ् खिरिस्टनुङ् वामा मितामाङ्ना, इजाङ्बाङ्निङ् ना च्हेन इब्बे-इब्बे उचुन्ना चेॽया ओम॥ 24 ङ्खाॽनिङ्गो न्निङ्गा लागि च्हेन का हिङ्नुङ्मामाङ् उचुन लेङ्मे॥ 25 खा चेॽया का जेप्पा था वान्ने, न्हाङामाङ् न्निङ्दा बिस्वासपे चात्तु चोक्मागा नुङ् न्निङ्गा आनान्दा हाकुचा पुमेॽमागा का हिङ्मेङ्ना॥ 26 न्हाङा का फेरि न्निङ्दाबे तामेङ्निङ् आका कारानङा खिरिस्ट येसुबे न्निङ्दा प्याक घामान्डा चोक्मा यासिॽवाघा॥ 27 घाक हाक्निङ् माडा चेॽया गो ना ओम, न्निङ्गा चाल्चालान खिरिस्टका नुसाला खेम्मेॽमा थेन्सिखुबा सानि॥ का न्निङ्दा तुम्नेनिन्होङ्चा न्दुम्नेनिन्होङ्चा न्निङ्दा घाक एको आत्मा नुङ् निङ्वाबे डिगो लेक्सिघोङ्, याॽमिचिङा नुसालाबे जेप्पागा बिस्वास न्जोगुनिभोङ् घाक तोङिघोङ् तुखि चोगिघा चेॽया का खेम्मा तोक्तुङ्नि॥ 28 न्निङ्गा बिरोधिचिनुङ् इहाचा चेॽयाबे ङ्गिसितानिन॥ खाॽला लेङ्माङा गो न्निङ्गा बिरोधिचि नास लेङ्माना न्हाङ् निङ्वाफुमा पाभाङ् न्निङ्दा उद्दार तोक्तुम्गाना बाङ्ना चेॽयागा पार्मान पिइवाघा॥ 29 इजाङ्बाङ्निङ् निङ्वाफुमाङा न्निङ्दा खिरिस्टपे बिस्वास चोक्मागा लागि से मेन्ना, ङ्खाॽनिङ्गो उका लागि तुखि आङ्साङ् उका सेवा चोक्माना उचुन्ना माउका चा पिइमिघा॥ 30 ओन्दाङ्हा लेनचिबे का आङ्दुङ्हा तुखि न्निङ्दा निसुक्साम्गा॥ ङ्खा तुखि खिङ्बेला चा का आङ्मासिमेङ्, न्हाङ् न्निङ्दा चा कानुङ् आङ्मासिइवागा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.