फिलेमोन 1 - याक्खा1 येसु खिरिस्टका लागि का छेक्पा पावाल नुङ् आनुन्छा तिमोथिङा ना छेप्फा कानिङ्नुङ् काम चोक्खुबा आलुङ्मा तुक्नेन्ना फिलेमोन, 2 एङ्गा नुन्छा मामु आप्फिया, कानिङ्नुङ् सेवा चोक्खुबा एङ्गा काम्निभाक आर्खिप्पास नुङ् म्बाङ्बे छुम्खुबा छुम्वाङ्गा लागि छेप्ताङ्चुङ्ना ओम॥ 3 एङ्गा निङ्वाफुमा पा नुङ् हाङ्बा येसु खिरिस्टङा न्निङ्दा आनुगाराहा नुङ् हाङ्हाङ् पिइगानि॥ फिलेमोनगा लुङ्मा तुक्तायि नुङ् बिस्वास 4 आनुन्छा फिलेमोन, का पार्थाना चोङ्मेङ्निङ् साधाइ न्दा मिसाङ् निङ्वाफुमा नुनिङ्वा पिवाङ्ना॥ 5 इजाङ्बाङ्निङ् हाङ्बा येसुबेॽना ङ्गा बिस्वास नुङ् निङ्वाफुमागा सेवाकचि न्लुङ्मा तुक्तुचिघा चेॽयागा उतुम्बे का खेप्सुक्सुङ्॥ 6 ङ्गा बिस्वासका साङ्गातिङा खिरिस्टपेॽहा एङ्गा घाक उचुन्हा चेॽया आमाना निङ्वा पिक्कानिभोङ् का पार्थाना चोङ्मेङ्ना॥ 7 आलुङ्मा तुक्नेन्ना आनुन्छा, ङ्गा लुङ्मा तुक्तायिङा का प्याक आनान्दित नुङ् प्याक उत्साहित लेक्सामाङ्ना॥ इजाङ्बाङ्निङ् न्दा निङ्वाफुमागा सेवा चोक्खुबाचिगा निङ्वा आनान्दित लेङ्मेतुक्सुचिगा॥ ओनेसिमासका उतुम्बे 8 न्हाङामाङ् न्दा इहा चोक्मा पोर्ने ओम, ङ्खा चोगुभोङ् खिरिस्टपे वेचिहाङा लुॽमा यानेन्बि, 9 ङ्खाॽनिङ्गो न्दा कानिङ् लुङ्मा तुङ्मेकाहाङा का लुमेॽनेन– का पाहोबा नुङ् खिङ्बेला येसु खिरिस्टका छेक्पा लेक्साङ्ना पावालङा, 10 आच्या ओनेसिमासका लागि का न्दानुङ् आमुक फाक्त्वाङ्चिङ्हा॥ का छेक्पाङ्बे वायाङ्निङ् उङ् खिरिस्टपे तिक्तुङ्नाङा का उप्पा लेक्सामाङ्॥ 11 ओन्दाङ् उङ् ङ्गा लागि काम लामेन्जोक्खुबा याॽमि साया, ङ्खाॽनिङ्गो हाकु कान्चिङ् हिपापाङ्गा लागि काम लाचोक्खुबा लेक्सामाना॥ 12 का उङ् फेरि ङ्गाबे पाङ्मासिमेङ्, उङ् च्हेन आका आलुङ्मागा टुक्रा ओम॥ 13 का नुसाला खेम्मेतुङ्चिङ्होङ् छेक्पाङ्बे आयामासाङ्निङ् ङ्गा साटो उङ्माङ् का सोसे युङ्मा यासुङ्बि, 14 ङ्खाॽनिङ्गो न्दा मेन्छिम्ले खाॽला चोक्मा उचुन ङ्येताङान॥ इजाङ्बाङ्निङ् का दाया चोक्मा न्दा कारबे ङ्ङागान्नि, ङ्खाॽनिङ्गो ङ्गा न्निङ्वाङा चोगुगानि बाङ्ना का मिमेङ्ना॥ 15 उङ् साधाइगा लागि न्दानुङ् वामा यानिभोङ् लोप्पि एहिलेनगा लागि न्दाभाङ् माङ्दु लेक्सामासा॥ 16 हाकु उङ् न्दा इनुगाना नोकोर मेन्ना, ङ्खाॽनिङ्गो लुङ्मातुक्मा पोर्ने बिस्वासि नुन्छा ओम॥ उङ् आका लागि इखिङ् लुङ्मा तुक्तुक्ना॥ उङ् सालुङ्बे से मेन्ना हाङ्बाबे झान ङ्गा लागि इखिङ् प्याक लुङ्मा तुक्तुक्ना लोप्पि॥ 17 ङ्खोङ्माङ् न्दा का ङ्गाम्निभाक लोॽवा एमेङ्गानाभोङ् का गाराहान चोङ्मेङ्गाना लोॽवा उङ् चा गाराहान चोगु॥ 18 उङा न्दा इसिॽनुङ् चोगामागानाभोङ्चा, ङ्गा हुङ्माहा वेॽयाहा भोङ्चा ङ्खा घाक आनिङ्बे युक्साब्याङ्॥ 19 का पावालङा आका आमुकङा खा चेॽया छेप्मासिमेङ्, ङ्खा का हुङ्वाङ्हा॥ न्दा चा ना हिङ्लुङ् काभाङ् तोक्तुगाना ओम, खा चेॽया न्दा लुन्नुङ्मा पोरान्जोङ्मेकान्ना लोप्पि॥ 20 न्हाङामाङ् आनुन्छा, हाङ्बाबे आका लागि चा खा चोक्ताब्याङ्॥ न्हाङ् खिरिस्टपे आनिङ्वा चोन्सिॽनि॥ 21 का लुॽनेन्हा खा चेॽया न्दा जेप्पा चोग्वाघाभोङ् का बिस्वास चोग्वाङ्हा॥ खिङ्से मेन्ना ङ्खा हाक्निङ्चा न्दा प्याक चोङ्बिमेङ्घा मिताङ्होङ् का छेप्मासिमेङ्ना॥ 22 न्हाङ् हेकोना चेॽया, आका लागि चा वामाना ठोङ् तोक्साब्या, इजाङ्बाङ्निङ् न्निङ्गा पार्थानाङा का चा न्निङ्गाबे तामा तोक्त्वाङ्नाम बाङ्ना आस वान्नेॽना॥ 23 येसु खिरिस्टका लागि कानुङ् छेक्पा लेक्साना इपाफारासङा चा न्निङ्दा सेवायो लुइमिघा॥ 24 कानुङ् काम चोक्खुबा मार्कुस न्हाङ् आरिस्तार्खास, डेमास नुङ् लुकाङा चा सेवायो लुइमिघा॥ 25 हाङ्बा येसु खिरिस्टका आनुगाराहा न्निङ्दा घाकनुङ् वान्नुङ्नि॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.