याकुब 1 - याक्खा1 निङ्वाफुमा नुङ् हाङ्बा येसु खिरिस्टका सेवाक का याकुबङा ना छेप्फा ठोङ्-ठोङ्बे हिसिनेसिघा एहिच छोङ्चि छेप्मासिमेॽनेनिन्हा, न्निङ्दा घाक आका सेवायो॥ बिस्वास नुङ् निङ्वा 2 आफुआनुन्छा आनाआनुन्छाचि, न्निङ्दा छोङ्बे इमिन्हा तुखि आन्दारामेॽनिङ् चा ङ्खा चोन्सिॽमाहा चेॽया ओम मितानुम॥ 3 इजाङ्बाङ्निङ् न्निङ्दा था वान्ने, न्निङ्गा बिस्वासका जाच लेङ्मेॽनिङ्, न्निङ्गा आङ्मा यामाना साक्ति पुमेॽना॥ 4 न्हाङामाङ् इहाचा काम मेङ्खोक्निले घाक चेॽया निखुबा आखुबा लेङ्मागा न्निङ्दाबे तायाहा जाच साहाचोक्साङ् वायानि॥ 5 न्निङ्दाबे बुद्दिगा खाचो आखुबाङा झार्को मेएॽले उचुन्ना निङ्वाङा पिखुबा निङ्वाफुमानुङ् नाक्तुनि, न्हाङा न्नाङा तोक्त्वाहा॥ 6 ङ्खाॽनिङ्गो न्नाङा मिॽयाङ् चा साङ्का मेन्जोक्ले बिस्वास चोगुहोङ् नाक्तुनि॥ साङ्का चोक्खुबा याॽमि गो हिॽवाङा थेन्साङ् युङ्साङ् चोगुना सामुन्दारागा छाल लोॽवाना ओम॥ 7 ङ्खाॽलाना याॽमिङा हाङ्बाभाङ् इहाचा तोक्त्वाङ्हाभोङ् म्मिॽनिन्नि॥ 8 ङ्खाॽलाना हिच्चि निङ्वा वाखुबा याॽमि उका इहाचा चेॽयाबे डिगो न्सामेन्ना॥ थुङ्दुहाचि नुङ् तुखिसुम्बाचि 9 तुखिसुम्बा बिस्वासिचि न्निङ्गा लेन उचुन लेङ्मेॽनिङ् चोन्दास्यानि॥ 10 ङ्खाॽलामाङ् थुङ्दुहाचि चा तुखिसुम्बा लेङ्मा पोराचोक्निङ् न्जोन्सिॽनि, इजाङ्बाङ्निङ् थुङ्दुना याॽमि गो इलेन पुङ्दाबेॽना फुङ् लोॽवा चोम्दिङ्खेमेॽना॥ 11 इजाङ्बाङ्निङ् खाडेरि खेमेॽनिङ् फुङ्गा उथाप नामङा फोसिॽवा न्हाङ् फुङ् आङ्खेमे, न्हाङा न्नागा सोभा चा नास लेङ्खेमे॥ ङ्खाॽलामाङ् थुङ्दुना याॽमि चा उका काम चोघेक्स्वानुङ् नास लेङ्खेमेॽना॥ 12 जाचका बेला डिगो वामा याखुबा याॽमि निङ्वाफुमाङा आसिक पिवाहा, इजाङ्बाङ्निङ् न्नाङा तुखि आङ्दिॽवाहोङ्, निङ्वाफुमाङा उङ् लुङ्मा तुक्खुबाचि पिमेॽनेनिन्हाभोङ् बाचा पियाहा हिङ्लुङ्गा मुकुट् तोक्त्वाना॥ 13 खाॽलाहा जाचपे आइवागानिङ् इसाङा चा का निङ्वाफुमाङा जाच चोगाङ्नाभोङ् ङ्गानिन्नि॥ इजाङ्बाङ्निङ् इसिॽहा चेॽयाभाङ् निङ्वाफुमागा जाच न्लेङ्मेन्ना, न्हाङ् उङ् आफाइङा इसा चा जाच न्जोङ्मेन्हा॥ 14 ङ्खाॽनिङ्गो इसिॽहा चेॽयाबे निङ्वा पिॽमाङा याॽमिचि आफाइ जाचपे ङ्ङामेहा॥ 15 न्हाङामाङ् खाॽलाहा इसिॽहा निङ्वाङा याॽमिगा निङ्वा इप्त्वाहोङ् पापका वाम लेङ्मे, न्हाङ् न्ना पाप पुमेहोङ् नास लेङ्माना आवास्था तावाना॥ 16 आलुङ्मा तुक्नेनिन्हा आफुआनुन्छा आनाआनुन्छाचि, न्निङ्दा आफाइ धोका न्जायानिन॥ 17 घाक उचुन्हा नुङ् सिद्दा पिनिक्ला ताङ्खेङ्बेॽहा घाक जोतिचि चोक्खुबा एङ्गा निङ्वाफुमा पाभाङ् तामेहा॥ उङ् हेॽनिङ्चा फेरान्जोङ्मेन्ना, उङ् फेराचोङ्नुङ्खुबा लालामे लोॽवाना मेन्ना॥ 18 उङा चोगुहा थोकपे कानिङ् घाक हाक्निङ् ओन्दाङ् केक्साहा उसा लोॽवा लेङ्मा यासिनिभोङ् सात्या चेॽयाभाङ् कानिङ् उका उनिङ्वाङा उका सान्तान चोगामा॥ खेम्मा नुङ् चोक्मा 19 आलुङ्मा तुक्नेनिन्हा आफुआनुन्छा आनाआनुन्छाचि, खा चेॽया न्निङ्दा मितामासानुम॥ न्निङ्दा खेम्माबे छिटो, चेक्माबे हात्तार मेन्जोक्खुबा न्हाङ् हातपात लोक मेङ्खोन्दिखुबा लेक्सानि॥ 20 इजाङ्बाङ्निङ् याॽमिगा लोक खोॽमाङा निङ्वाफुमागा उसाप थाक्माहा कामबे बाधा लेङ्मेहा॥ 21 न्हाङामाङ् खाॽलाहा घाक इसिॽहा चेॽया नुङ् छिप्पाकेकेक्हा बानिबेहोरा भाङ् लाॽला वायानि॥ न्हाङा मि लेक्सिघोङ् न्निङ्गा निङ्वाबेॽहा निङ्वाफुमागा चेॽया लोॽवा चोगानि, इजाङ्बाङ्निङ् ङ्खाङामाङ् न्निङ्गा आत्मा हिङ्मेत्वाना॥ 22 निङ्वाफुमागा चेॽया खेम्खुबा से लेक्सिगाहोङ् आफाइ धोका पिखुबा न्लेक्सानिन, ङ्खाॽनिङ्गो निङ्वाफुमागा चेॽया लोॽवा चोक्खुबा लेक्सानि॥ 23 निङ्वाफुमागा चेॽया खेप्स्वाहोङ् ङ्खाॽला मेन्जोक्खुबा याॽमि च्हेन, आइनाबे उनाचिक सोखुबा याॽमि लोॽवाना ओम॥ 24 इजाङ्बाङ्निङ् न्नाङा आइनाबे उनाचिक स्वाहोङ् खेन्दिमे, न्हाङा उङ् आफाइ इमिन्ना सायाना बाङ्ना चेॽया सोलोक मुन्दिॽवा॥ 25 ङ्खाॽनिङ्गो इसाङा याॽमिचि फोङ्खुबा सुद्दा ब्यावास्था खेप्स्वाहोङ् मेमुॽनिले ङ्खाबे उचुन निङ्वा पिवा, न्नाङा च्हेन उङा चोगुहा कामबे आसिक तोक्त्वाहा॥ 26 इसाङा का धार्मोतिङान मिमे, ङ्खाॽनिङ्गो उका उया तायेनबे ङ्युक्स्वान्नाभोङ्, न्नाङा उङ् आफाइ धोका पिॽमासिमेॽना, न्हाङ् उङा चोगुहा धार्मोति काम चा ब्यार्था लेङ्मेहा॥ 27 निङ्वाफुमा पाङा उसाप थाक्माहा काम च्हेन तुखिबे ङ्ङायाहा लाङ्निमाचि, उप्पा-उमा मेॽनिङ्हा पिछाचि सोॽमाचि, न्हाङा कानिङ् आसुद्दा चोक्खुबा कायुङ्लेनबेॽहा इसिॽहा चेॽयाभाङ् लाॽला वामा ओम॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.