हिब्रु 1 - याक्खा1 उइले निङ्वाफुमा एङ्गा पुर्खाचिनुङ् निङ्वाफुमाभाङ् चेक्खुबाचिगा याभाङ् प्याक खेप न्हाङ् प्याक तारिकाङा चेक्तामासा॥ 2 ङ्खाॽनिङ्गो खा आखेरिहा लेनचिबे उका उच्याभाङ् कानिङ्नुङ् चेक्तामा॥ निङ्वाफुमाङा उका उच्याभाङ् घाक थोक चोगु, न्हाङ् उङ्माङ् घाक थोक्का उत्ताराधिकारि चोगु॥ 3 निङ्वाफुमागा माडा माहिमा उच्याबे चाम्काचोङ्मे, न्हाङ् निङ्वाफुमा इमिन्ना बाङ्ना कानिङ् उङ्बे निस्वाम॥ उका साक्तिसालि चेॽयाभाङ्माङ् उङा वालोक नुङ् ताङ्खेङ्बेॽहा घाक चेॽया साम्हाले चोग्वाहा॥ उङा पाप पाहाङ् छेमा पिॽमाहा काम याइहोङ् घाक हाक्निङ् तो वाखुबा निङ्वाफुमागा छुप्ताङ् पोटि युङामाना॥ वालोक्दुतचि हाक्निङ् खिरिस्ट माहान्ना 4 निङ्वाफुमाङा वालोक्दुतचि हाक्निङ्चा उच्या माहान चोगु, इजाङ्बाङ्निङ् निङ्वाफुमाङा “आच्या” भोङ् पिना उनिङ् च्हेन ङ्खाचिगा हाक्निङ् माहान निङ् ओम॥ 5 इजाङ्बाङ्निङ् निङ्वाफुमाङा, “न्दा आका आच्यागान, हेन का न्दा तोङ्नुङ्नेन्ना” भोङ् हेॽना वालोक्दुत हेॽनिङ् लुना? न्हाङ् फेरि हेॽना वालोक्दुत हेॽनिङ् खाॽला लुना? “का न्नागा उप्पा लेङ्मेङ्, न्ना च्हेन आच्या लेङ्मेॽना॥” 6 निङ्वाफुमाङा उका तुम्ना उच्या कायुङ्लेनबे पाक्सुनिङ् खाॽला काया, “घाक वालोक्दुतचिङा उङ्माङ् आराधाना न्जोगुनि॥” 7 निङ्वाफुमाङा वालोक्दुतचिगा उतुम्बे खाॽला कामे, “आका वालोक्दुतचि हिॽवा लोॽवा, न्हाङ् आका काम चोक्खुबाचि मिलेप लोॽवा चोग्वाङ्चिङाहा॥” 8 ङ्खाॽनिङ्गो उच्यागा उतुम्बे च्हेन निङ्वाफुमा खाॽला कामे, “ओ निङ्वाफुमा, ङ्गा राज्या साधाइभोरि वान्नुङ्मेॽना॥ न्दा उचुन निरिक चोग्वाघोङ् राज्या चोग्वागा॥ 9 न्दा जेप्पाहा चेॽया न्साप थाक्त्वागा, न्हाङ् मेन्हा चेॽया इसित्वागा॥ न्हाङामाङ् निङ्वाफुमा, ङ्गा निङ्वाफुमाङा चोन्दास्याहोङ् न्दा किवाङा आभिसेक चोगामागा, न्हाङा ङ्गाम्निभाकचि हाक्निङ् तो युक्सामागा॥” 10 उङा फेरि खाॽला काया, “हाङ्बा, उथुकपे न्दामाङ् ताम्दाङ्फुमागा जाग युक्सुगा, ङ्गा म्मुकङा ताङ्खेङ् चोगुगा॥ 11 ङ्खा घाक नास न्लेङ्खेमे, ङ्खाॽनिङ्गो न्दा गो साधाइ वान्नुङ्मेका॥ ङ्खा घाक उलिप्पा तेक लोॽवा नाङ्खेमे॥ 12 न्दा ङ्खाचि तेक लोॽवा कित्वाचिगा न्हाङ् ङ्खाचि तेक लोॽवा ङ्गिमे॥ ङ्खाॽनिङ्गो न्दा गो एकाम्मे वान्नुङ्मेका, ङ्गा युग हेॽनिङ्चा म्मेम्मेन्ना॥” 13 न्हाङा उङा हेॽनाचा वालोक्दुत खाॽला न्लुन, “ङ्गा सात्तुरचि न्लाङ्बे फोप मेम्फोप्मेले सोम्मा न्दा आका छुप्ताङ् पोटि युङा॥” 14 वालोक्दुतचि इहा ओम्चि? ङ्खाचि निङ्वाफुमाङा उङा मुक्ति पिचिहा याॽमिचि फासे पाक्सुचिहा आत्मा से ओम्चि॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.