गालाति 1 - याक्खा1 का सेगुम्पाक पावालङा गालातियाबेॽहा छुम्वाङ्चि ना छेप्फा छेप्मासिमेङ्ना॥ का सेगुम्पाक लेक्साङ्ना याॽमिचिभाङ् मेन्ना, याॽमिचिगा चोक्तोक पाहाङ् चा मेन्ना, ङ्खाॽनिङ्गो येसु खिरिस्ट नुङ् उङ् स्यानाभाङ् हिङ्गिलिक लेङ्मेखुबा निङ्वाफुमा पाङा सेगाङ्ना ओम॥ 2 नाबे कानुङ् ङ्वान्नेहा घाक फुनुन्छा नानुन्छाचिभाङ् गालातियाबेॽहा छुम्वाङ्चि ना छेप्फा छेप्मासिमेॽनेनिन्हा॥ 3 एङ्गा निङ्वाफुमा पा नुङ् हाङ्बा येसु खिरिस्टङा न्निङ्दा आनुगाराहा नुङ् हाङ्हाङ् पिइगानि॥ 4 कानिङ् ना दुस्टा युग पाहाङ् हिङिनिभोङ् निङ्वाफुमा पागा उनिङ्वा लोॽवा उङ् आफाइ एङ्गा पापका साटोबे बोलि लेक्सा॥ 5 निङ्वाफुमागा माहिमा साधाइ लेङ्नुङ्नि॥ आमेन! हेकोना हेॽनाचा नुसाला मान्ना 6 न्निङ्दा खिरिस्टका आनुगाराहाबे काखुबा खिङ्छिटो मुन्दिम्गाहोङ् हेकोहा नुसाला पोटि लाचोगिघा चेॽया खेप्सुङ्निङ् का आच्चाम्मा एतामाङ्ना॥ 7 जेप्पा कामाभोङ् हेकोहा नुसाला गो मान्हा, ङ्खाॽनिङ्गो कोइ-कोइ खाॽलाहा याॽमि ङ्वान्ने, ङ्खाचिङा न्निङ्दा तोम्सिमेॽमाहोङ् खिरिस्टका नुसाला खोक्निमा ङ्योक्मासिमेहा॥ 8 कानिङ् पार्चार चोक्नेनिन्हा नुसाला हाक्निङ् हेकोहा नुसाला वान्नेहाभोङ् पार्चार चोक्खुबा च्हेन कानिङ् होङ्चा, वालोकपाहाङ् न्दायाहा वालोक्दुत होङ्चा न्ना सारापित लेङ्मेॽना॥ 9 खा चेॽया कानिङ् ओन्दाङ् चा लुन्नुङ्नेन्सानिन, न्हाङ् लोप चा लुॽमासिमेॽनेनिन्हा, इसाङा न्निङ्दा खेप्सुम्घा नुसाला हाक्निङ् हेकोहा नुसाला खेम्मेतिइवागा न्ना याॽमि सारापित लेङ्मेॽना॥ 10 का याॽमि चोन्सिमेॽमागा मेन्ना, ङ्खाॽनिङ्गो निङ्वाफुमा चोन्सिमेॽमा पोटि लाचोक्मासिमेङ्ना॥ का याॽमि चोन्सिमेॽमा योग्वाङ्चिङ्हाभोङ् गो का खिरिस्टका सेवाक न्लेक्साङान्बि॥ पावाल निङ्वाफुमाङा काना 11 आफुआनुन्छा आनाआनुन्छाचि, का खेम्मेॽनेनिन्हा नुसाला याॽमिचिभाङ् तायाहा नुसाला मेन्हा बाङ्ना चेॽया न्निङ्दा आसुम्गानि बाङ्ना का मिमेङ्ना॥ 12 इजाङ्बाङ्निङ् का खा याॽमिभाङ् तोक्तुङ्हा मेन्हा, न्हाङा याॽमिङा चिन्दाहा चा मेन्हा॥ ङ्खाॽनिङ्गो येसु खिरिस्ट आफाइङा सोॽमेताङ् न्हाङ् का खा तोक्तुङ्हा ओम॥ 13-14 का याहुदि धार्मागा सेवाक सायाङ्निङ् इमिन्ना सायाङ्ना बाङ्ना चेॽया न्निङ्दा था वान्ने॥ ङ्खिङ्बेला याहुदि धार्मा मानाचोक्खुबाचिबे आकाम्निभाकचिगा का हाङ्गुम्बा सायाङ्॥ का आनिङ्गा पुर्खाचिङा ङ्ङेनुक्तुहा, न्जोगुक्तुहा चेॽयाबे सिमापेन्खुबा याॽमि सायाङ्॥ ङ्खिङ्बेला का लुङ्माइ मेन्दुक्ले निङ्वाफुमागा छुम्वाङ् तुखि पिङ्चिङ्, न्हाङ् यासुङ्नुङ् सोम्मा नास चोक्मा योगुङ्चिङ्॥ 15 ङ्खाॽनिङ्गो आका वाम लेङ्मा हाक्निङ् ओन्दाङ्माङ् निङ्वाफुमाङा का सेगाङ्, न्हाङ् उका आनुगाराहाभाङ् का कायाङ्, 16 न्हाङा हेकोहा जाति याॽमिचिगा उलुम्बे का नुसाला खेम्मेॽमा यासुङ्चिङ्निभोङ् उङा उका उच्या काबे पार्काट चोक्मा उचुन एता, न्हाङा का इसा चा याॽमिचि न्छिम्दुन्चिङान॥ 17 का हाक्निङ् ओन्दाङ्हा सेगुम्पाकचि छिम्से यारुसालेमबे चा ङ्ख्याङान, ङ्खाॽनिङ्गो का सोलोक आराप खाम्युकपे ख्याङ्, न्हाङ् दामास्कासपे लासारायाङ्॥ 18 न्हाङा सुम फिम्बिलिङ् हेक्साङ् का पात्तुरुस तुप्से यारुसालेमबे ख्याङ्, न्हाङ् न्नाबे एपा लेन सोरि वायाङ्चिङ्॥ 19 न्नाबे हेकोहा इसा चा सेगुम्पाकचि न्दुप्सुन्चिङान, ङ्खाॽनिङ्गो हाङ्बागा उनुन्छा याकुब से तुप्सुङ्॥ 20 का निङ्वाफुमागा ओन्दाङ् खा चेॽया लुॽमासिमेॽनेनिन, का छेप्तुङ्हा खा चेॽया जेप्पाहा ओम॥ 21 न्हाङ् हेक्साङ् का सिरिया नुङ् किलिकियाबेॽहा लिङ्खामचिबे ख्याङ्॥ 22 ङ्खिङ्बेला सोम्मा याहुदियाबेॽहा खिरिस्टका छुम्वाङ्चिङा का न्निसामासान॥ 23 ङ्खाचिङा आका उतुम्बे खिङ्से ङ्खेप्सुक्सा, “ओन्दाङ् कानिङ् सोॽमायि मेयाखुबा याॽमिङा हेॽना बिस्वास नास चोक्मा योगुक्सा, खिङ्बेला न्ना बिस्वासका उतुम्बे पार्चार चोक्मासिमेॽनाबु॥” 24 न्हाङा का खाॽला पार्चार चोक्खुबा लेक्साङ्ना चेॽयागा लागि उङ्चिङा निङ्वाफुमा माहिमा म्बि॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.