एफिसि 1 - याक्खापावालङा सेवायो लुचिहा 1 निङ्वाफुमागा उनिङ्वाङा खिरिस्ट येसुगा सेगुम्पाक लेक्साङ्ना का पावालङा खिरिस्ट येसुबे बिस्वास चोक्खुबा एफिसासपेॽहा निङ्वाफुमागा याॽमिचि ना छेप्फा छेप्मासिमेॽनेनिन॥ 2 एङ्गा निङ्वाफुमा पा नुङ् हाङ्बा येसु खिरिस्टङा न्निङ्दा आनुगाराहा नुङ् हाङ्हाङ् पिइगानि॥ आत्मिक आसिक 3 एङ्गा हाङ्बा येसु खिरिस्टका उप्पा निङ्वाफुमा नुनिङ्वा लेङ्नि॥ कानिङ् येसु खिरिस्टपे वेतिहाङा, उङा वालोक्का घाक आत्मिक आसिक कानिङ् पियामाहा॥ 4 कानिङ् उका उयुम्बे पाबित्तारा नुङ् इहाचा आप्दिक मेॽनिङ्हा लेक्सिनिभोङ् कायुङ्लेन चोक्मा हाक्निङ् ओन्दाङ्माङ् खिरिस्टपे उङा कानिङ् सेगामासा॥ 5 कानिङ् उलुङ्मा तुक्ताहोङ् उङा मिताना लोॽवा खिरिस्टपे उका सान्तान चोगिॽयामासा॥ 6 ङ्खोङ्माङ् खिङ् माडा आनुगाराहागा लागि निङ्वाफुमा नुनिङ्वा पिम, इजाङ्बाङ्निङ् उङा कानिङ् उलुङ्मा तुक्तुना उच्या ङ्खाॽला दान पिया॥ 7 खिरिस्ट स्या, न्हाङामाङ् उका हेलिङा एङ्गा पाप छेमा लेक्सामा॥ उङा एङ्गा पापका उमेन हुङ्दाब्याहोङ् कानिङ् फोक्सामा॥ जेप्पा निङ्वाफुमागा आनुगाराहा इखिङ् माडाना॥ 8 न्ना आनुगाराहानुङ् उङा कानिङ् प्याक ग्यान नुङ् बुद्दि पियामा॥ 9 निङ्वाफुमाङा खिरिस्टपाहाङ् पुरा चोक्मा मितुना, इसाङा चा था न्दोक्तुनिन्ना उका योजाना कानिङ् सोॽमेता॥ 10 निङ्वाफुमाङा उका काम ठिक बेलाबे पुरा चोग्वाहा॥ खा काम च्हेन वालोक नुङ् ताम्दाङ्फुमाबेॽहा घाक थोक खिरिस्टका उमुकपे ताॽमा ओम॥ 11 इजाङ्बाङ्निङ् घाक चेॽया निङ्वाफुमागा योजाना नुङ् उङा मितुहा लोॽवा लेक्सामाहा॥ कानिङ् निङ्वाफुमाङा उका योजाना आन्सार माङ् उका याॽमि लेङ्मागा सेगा॥ खा च्हेन उङा ओन्दाङ् नाहाङ्तोमाङ् चोक्मा मितुहा चेॽया साया॥ 12 खिरिस्टपे घाक हाक्निङ् ओन्दाङ् बिस्वास चोक्खुबा कानिङ् याहुदिचिङा उका माहिमा चोक्साङ्, पार्साम्सा चोक्साङ् हिङ्मा यासिनिभोङ् उङा कानिङ् सेगामा॥ 13 ङ्खाॽलामाङ् न्निङ्दा चा जेप्पाहा सालेन, मुक्ति पिखुबा नुसाला खेप्सुम्घोङ् उङ्बे बिस्वास चोगुम्गा॥ जोबो न्निङ्दा बिस्वास चोगुम्गा, निङ्वाफुमाङा बाचा पियाहा पाबित्तारा आत्मा न्निङ्दाबे पाक्सुहोङ् न्निङ्दा उका चोगिघा चेॽयागा पार्माना पिइमिघा॥ 14 निङ्वाफुमाङा उका याॽमिचि उद्दार नुङ् मुक्ति पिमेॽनेनिन्हाभोङ् बाचा पियामा॥ कानिङ् जेप्पागा उद्दार नुङ् मुक्ति मेन्दोक्ले सोम्मागा लागि बाइनागा रुप्पे उङा कानिङ् पाबित्तारा आत्मा पियामाहा॥ कानिङ् माहिमित निङ्वाफुमागा पार्साम्सा चोगुम्निभोङ् उङा खाॽला चोगु॥ पावालगा पार्थाना 15 न्हाङामाङ् हाङ्बा येसुबेॽना न्निङ्गा बिस्वास नुङ् खिरिस्टका याॽमिचि लुङ्मा तुक्तुम्चिम्घा चेॽया खेप्सुङ्होङ्माङ्, 16 का पार्थाना चोङ्मेङ्निङ् न्निङ्दा मिसाङ् न्निङ्गा लागि निङ्वाफुमा नुनिङ्वा पिनेस्वाङ्ना॥ 17 न्हाङा एङ्गा हाङ्बा येसु खिरिस्टका निङ्वाफुमा, माहिमित पाङा उका उतुम्बे आमाहा बुद्दि नुङ् पार्कासका आत्मा न्निङ्दा पिइगानिभोङ् का पार्थाना चोङ्नुङ्मेङ्ना॥ 18 का खा चेॽयागा लागि चा पार्थाना चोङ्मेङ्, न्निङ्गा निङ्वागा मिकचि ङ्होनि, न्हाङ् न्निङ्दा इखिङ् माडा आसागा लागि काइमिघा, निङ्वाफुमाङा उका याॽमिचि पिचिहा बाचा इखिङ् माडा नुङ् माहिमितना बाङ्ना चेॽया न्निङ्दा था तोक्मा यास्वाम्घा॥ 19 न्हाङा कानिङ् खिरिस्टपे बिस्वास चोक्खुबाचिगा लागि उका काम चोक्माना साक्ति खिङ् माडाना, न्ना कानिङ् आड्काल चोक्मामाङ् ङ्यामेन्ना, न्निङ्दा खा चेॽया चा था तोक्मा यासुम्गानिभोङ् का पार्थाना चोङ्मेङ्ना॥ 20 न्ना साक्तिमाङ् उङा येसु स्यानाभाङ् हिङ्गिलिक लेङ्मेतुनिङ् नुङ् वालोकपे उका छुप्ताङ् उमुक पोटि युक्सुनिङ् चालाचोगु॥ 21 खिरिस्टङा ताङ्खेङ्बेॽहा घाक माङ्चि छोङ्बे राज्या चोग्वा, घाक तायेन्राङ्बाचि तायेनबे युक्स्वाचि, घाक साक्तिचि छोङ्बे राज्या चोग्वा न्हाङ् घाक हाङ्बाचिगा हाङ्बा लेङ्मेॽना॥ उङ् ना युगका से मेन्ना, न्दायेॽहा युगका लागि चा घाक हाक्निङ् तो युक्सुक्सुना॥ 22 निङ्वाफुमाङा घाक चेॽया उलाङ्तापिगा मो युक्सुबि, न्हाङ् घाक छुम्वाङ्चिगा टुखुरुक उङ् चोगु॥ 23 छुम्वाङ् च्हेन खिरिस्टका सालुङ् ओम॥ न्हाङ् उङ्बे वान्नेहा घाक चेॽया बिस्वास चोक्खुबाचिनुङ् वान्ने, न्हाङा घाक थोक, घाकपोटि उङ् आफाइङा चालाचोग्वाहा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.