कालास्सि 1 - याक्खा1 निङ्वाफुमागा उनिङ्वाभाङ् खिरिस्ट येसुगा सेगुम्पाक लेक्साङ्ना का पावाल नुङ् एङ्गा नुन्छा तिमोथिङा, 2 ना छेप्फा कालास्सेबे वेतिघा निङ्वाफुमागा याॽमिचि नुङ् बिस्वासि आफुआनुन्छा आनाआनुन्छाचि छेप्मासिमेॽनेनिन॥ एङ्गा निङ्वाफुमा पाङा न्निङ्दा आनुगाराहा नुङ् हाङ्हाङ् पिइगानि॥ नुनिङ्वागा पार्थाना 3 कानिङ् न्निङ्गा लागि पार्थाना चोगिॽवाङ्निङ् एङ्गा हाङ्बा येसु खिरिस्टका उप्पा निङ्वाफुमा साधाइ नुनिङ्वा पिवाम्ङाना॥ 4 इजाङ्बाङ्निङ् खिरिस्ट येसुबेॽना न्निङ्गा बिस्वास नुङ् उका घाक याॽमिचि न्निङ्दा लुङ्मा तुक्तुम्चिम्घा चेॽयागा उतुम्बे कानिङ् खेप्सुक्सुम्ङा॥ 5 न्निङ्गा लागि वालोकपे आसा उचुन युक्सामा, ङ्खोङ्माङ् न्निङ्दा खिरिस्टपे खाॽलाहा काम चोग्वाम्गा॥ खा चेॽयागा उतुम्बे न्निङ्दा ओन्दाङ्माङ् जेप्पाहा नुसाला खेप्सुक्सुम्गा॥ 6 न्निङ्दाबे तायाहा खा नुसाला घाक कायुङ्लेनबेॽहा याॽमिचिङा ङ्खेप्सुहोङ् बिस्वास न्जोक्मासिम्मेहा॥ न्निङ्दा निङ्वाफुमागा आनुगाराहागा उतुम्बे जेप्पाहा चेॽया खेप्सुम्गाना, आसुम्गाना लेन नाहाङ्तो नुसालाङा न्निङ्लुम्बे चा ङ्खाॽलामाङ् काम चोक्मासिम्मेहा॥ 7 खा चेॽया न्निङ्दा कानिङ्नुङ् काम चोक्खुबा इपाफारासभाङ् चिन्दिगा॥ उङ् च्हेन आनिङ्गा साटोबे न्निङ्गा लुम्बे काम चोक्खुबा बिस्वासिलोना नुन्छा ओम॥ 8 न्निङ्दा पाबित्तारा आत्माङा पिइघा लुङ्मा तुक्खुसाचामाना चेॽयागा उतुम्बे उङामाङ् कानिङ् खेम्मेताहा ओम॥ 9 न्हाङामाङ् कानिङ् खा चेॽया खेप्सुम्ङाना नाहाङ्तो न्निङ्गा लागि न्निङ्दा निङ्वाफुमागा उनिङ्वा नुङ् आत्मिक चेॽया आमायामाना निङ्वाङा इप्तिगानिभोङ् साधाइ पार्थाना चोक्मासिइवाङ्हा॥ 10 न्हाङा न्निङ्दा हाङ्बागा उसाप थाक्माहा हिङ्लुङ् हिङिॽवागाहोङ् उङ् चोन्सिमेॽमा यास्वाम्गा न्हाङ् घाक कामबे उचुन चोक्साङ् निङ्वाफुमाङा पिइघा ग्यानबे पुसाङ् खेइवाघा॥ 11 न्निङ्दा निङ्वाफुमागा माडा साक्तिभाङ् तोक्तुम्घा साक्तिङा आफाइ चात्तु लेङ्साङ् खेइगानि बाङ्ना आनिङ्गा पार्थाना वान्ने॥ ङ्खाॽला लेक्साभोङ् से न्निङ्दाबे तुखि तामेॽनिङ् चात्तु लेक्सिॽवाघोङ् आङ्मा यास्वाम्घा, न्हाङ् ङ्खिङ्बेला न्निङ्दा चोन्दिसिइवाघा॥ 12 निङ्वाफुमा पा साधाइ नुनिङ्वा पियानुम॥ उङा जोतिगा राज्याबे उका याॽमिचिङा तोक्माहा चेॽया न्निङ्दा चा तोक्मा योग्याहा चोगिमिघा॥ 13 उङामाङ् कानिङ् कुइम्नागा साक्तिभाङ् फोक्सा, न्हाङ् उलुङ्मा तुक्तुना उच्यागा राज्याबे खेतामा॥ 14 उका उच्याङा कानिङ् पाप पाहाङ् फोक्सामा न्हाङ् एङ्गा पाप छेमा चोक्ताब्यामा॥ खिरिस्टका रुप नुङ् काम 15 निङ्वाफुमा कानिङ् निमा ङ्यास्वाम्निन, ङ्खाॽनिङ्गो न्निसान्ना निङ्वाफुमागा रुप माङ् खिरिस्ट ओम॥ उङ् निङ्वाफुमाङा घाक थोक चोक्मा हाक्निङ् ओन्दाङ्माङ् वाया, उङ् घाक हाक्निङ् तुम्ना॥ 16 इजाङ्बाङ्निङ् वालोक नुङ् ताम्दाङ्फुमाबेॽहा घाक थोक उङ्भाङ् लेक्सा॥ मिकङा निसाहा नुङ् न्निसानाहा चेॽया, हाङ्युक्थामचि, मालिकचि, तायेन्राङ्बाचि नुङ् चोक्तोक तोक्खुबाचि, खा घाक उङ्भाङ् उका लागिमाङ् न्लेक्साहा ओम॥ 17 उङ्माङ् घाक थोक हाक्निङ् ओन्दाङ् वाया, न्हाङ् घाक चेॽया उङ्बेॽमाङ् वान्नेहा॥ 18 छुम्वाङ् च्हेन उका सालुङ् ओम, न्हाङ् उङ् च्हेन न्नागा टुखुरुक ओम॥ घाक चेॽयागा सुरु उङ्माङ् ओम॥ उङ् घाक चेॽया छोङ्बे चोक्तोक चोक्खुबा लेङ्निभोङ्माङ् न्स्याहाचि हिङ्गिलिक लेङ्खुबाचिबे निङ्वाफुमाङा घाक हाक्निङ् ओन्दाङ् हिङ्गिलिक लेङ्मेतुना ओम॥ 19 इजाङ्बाङ्निङ् निङ्वाफुमाङा उका घाक सोभाब खिरिस्टपे युङ्मा उसाप थाक्तु॥ 20 न्हाङा निङ्वाफुमाङा कुरुसपे बोलि लेक्साना उका उच्यागा हेलिङा वालोक नुङ् ताम्दाङ्फुमाबेॽहा घाक थोक फेरि उका चोगुक्सु॥ 21 इमा न्निङ्दा निङ्वाफुमाभाङ् माङ्दु लेक्सिमिसिगा॥ ङ्खिङ्बेला न्निङ्दा इसिॽहा चेॽया मितुम्गा, इसिॽहा काम चोगुम्गाहोङ् निङ्वाफुमागा सात्तुर लेक्सिमिसिगा॥ 22 ङ्खाॽनिङ्गो हाकु उका उच्यागा सालुङ्गा बोलिदानङा न्निङ्दा निङ्वाफुमाङा फेरि उका काम्निभाक चोगिमिघा॥ न्हाङामाङ् न्निङ्दा निङ्वाफुमागा उयुम्बे येबिॽवागानिङ् पाबित्तारा, खोट् मेॽनिङ्हा नुङ् आप्दिक मेॽनिङ्हा चोगिॽवाघा॥ 23 ङ्खाॽनिङ्गो खा जेप्पाहा चेॽयाबे बिस्वास चोगामासानुम न्हाङ् खा चेॽयाबे चात्तु लेक्सामासानि॥ न्निङ्दा खेप्सुम्घा नुसालाभाङ् तोक्तुम्गाना आसाबे निङ्वा पियामासानुम॥ खा नुसालामाङ् कायुङ्लेनबेॽहा घाक याॽमिचि ङ्खेम्मेतामा॥ न्हाङा का पावाल खा नुसाला खेम्मेॽमागा लागिमाङ् निङ्वाफुमागा सेवाक लेक्सामाङ्ना॥ छुम्वाङ्बे पावालगा सेवा 24 हाकु का न्निङ्गा लागि तुखि आङ्मा आनान्दा एमेङ्ना, इजाङ्बाङ्निङ् खिरिस्टका सालुङ् छुम्वाङ्गा लागि उङा आङ्मा बाकिहा तुखि का आका सालुङ्बे आङ्द्वाङ्होङ् पुरा चोग्वाङ्हा॥ 25 निङ्वाफुमाङामाङ् का छुम्वाङ्गा सेवा चोक्खुबा चोगाङ् न्हाङ् न्निङ्गा उचुन्गा लागि उका चेॽया घाक खेम्मेॽमाहा कामगा जिम्मा पियाङ्॥ 26 युग-युग नुङ् पुस्ता-पुस्ता ओन्दाङ् नाहाङ्तो चुमिॽयामासाना ना आच्चाम्माना चेॽया हाकु उका याॽमिचि उचुन योक्मेतामा॥ 27 न्ना आच्चाम्माना माहिमित चेॽया हेकोहा जातिचिगा लागि इखिङ् खाचोनाभोङ् सोॽमेमागा उङा कानिङ् सेगा॥ न्ना आच्चाम्माना चेॽया च्हेन खिरिस्ट न्निङ्दानुङ् वामा ओम, नागा तुम्बिला न्निङ्दा उका माहिमागा भाक तोक्त्वाम्घा बाङ्ना ओम॥ 28 न्हाङ्माङ् कानिङ् घाक याॽमिचि खिरिस्टका उतुम्बे खेम्मेत्वाम्चिम्ङा॥ घाक याॽमिचि खिरिस्टपे पारिपाक्का चोक्साङ् निङ्वाफुमागाबे ताॽमागा कानिङ् ग्यान नुङ् बुद्दिङा याॽमिचि चेतावानि पिसाङ् चिन्द्वाम्चिम्ङा॥ 29 खिरिस्टङा पियाङ्ना का होङ्बेॽना काम चोक्माना माडा साक्तिङामाङ् खा काम निङ्वा पिवाङ्होङ् चोग्वाङ्हा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.