सेगुम्पाक 1 - याक्खानिङ्वाफुमाङा बाचा चोगुना पाबित्तारा आत्मा 1 सेवायो खाङ्खाङ्बा थियोफिलास, आका ओन्दाङ्ना छेप्तापपे येसुङा काम तारोक्तुहोङ् वालोक मेङ्खेॽले सोम्मा उङा चोगुहा काम नुङ् चिन्दुचिहा चेॽयागा उतुम्बे छेम्नुङ्नेन॥ 2 येसु वालोक मेङ्खेॽले सोम्मा, उङा सेगुचिहा सेगुम्पाकचि उङ् खेन्दिमेहोङ् इ चोक्माहाभोङ् पाबित्तारा आत्मागा साक्तिभाङ् घाक चेॽया योक्मेतुक्साचि॥ 3 येसुङा तुखि आङ्दुहोङ् स्या, न्हाङा स्यानाभाङ् हिङ्गिलिक लेक्सा॥ उङ् स्यानाभाङ् हिङ्गिलिक लेक्साना सोॽमेमागा नाखेङ् लेन सोम्मा चेलाचिगाबे दाफे-दाफे ओता, न्हाङा निङ्वाफुमागा राज्यागा उतुम्बे खेम्मेतुचि॥ 4 इमा येसु ङ्खाचिनुङ् चासाङ् युङामासानिङ् उङा ङ्खाचि खाॽला लुचि, “न्निङ्दा यारुसालेम नाओम्घोङ् हेॽने चा ङ्ख्यानिन, ङ्खाॽनिङ्गो वालोकपेॽना आप्पाङा पाबित्तारा आत्मा पिमेॽनेनिन्हाभोङ् पिइघा बाचा न्निङ्दा कुसानुम॥ खा चेॽया गो ओन्दाङ्माङ् न्निङ्दा काभाङ् खेप्सिक्सुम्गा॥ 5 इजाङ्बाङ्निङ् युहान्नाङा गो न्निङ्दा माङ्च्वाङा बाप्तिस्मा पिइगा, ङ्खाॽनिङ्गो एहिलेन हेक्साङ् पाबित्तारा आत्माङा न्निङ्दा बाप्तिस्मा लेक्सिॽवाघा॥” येसु वालोकपे ख्याना ( मार्कुस १६:१९-२० ; लुका २४:५०-५३ ) 6 इलेन सेगुम्पाकचि न्छुप्साहोङ् येसु खाॽला न्छिम्दु, “हाङ्बा, खिङ्बेलाक माङ् एङ्गा इजिरेल खाम्युक फोक्स्वागानायि?” 7 येसुङा ङ्खाचि लुचि, “हेॽनिङ् खा चेॽया लेङ्मेहा बाङ्ना निमाना, आमाना न्निङ्गा काम मेन्ना॥ खा चेॽयागा उतुम्बेको वालोकपेॽना निङ्वाफुमा आप्पाङा से निर्नाया चोक्मा यास्वाहा॥ 8 ङ्खाॽनिङ्गो पाबित्तारा आत्मा न्निङ्दाबे तामेहोङ् साक्ति तोक्त्वाम्गा, न्हाङा न्निङ्दा यारुसालेमबे, घाक याहुदिया लिङ्खामबे, सामारिया लिङ्खामबे, न्हाङा ताम्दाङ्फुमागा योना उलाप सोम्मा आका साचि लेक्सिॽवाघा॥” 9 येसुङा खिङ् लुइचिहोङ् उङ् न्सोहेक्सुनुङ् तो-तो वालोकपोटि चान्दाख्या, न्हाङा खिम्फुरुम्माङा एप्तेहेतु॥ 10 ङ्खाचिङा येसु ताङ्खेङ्पोटि चान्दाख्याना चि न्सोनेसुक्सानिङ् न्नाबे थाप्थुम्बे हिप्पाङ् फुहा तेक वाखुबा वालोक्दुतचि चेङ् येबारायाचि॥ 11 न्हाङा ङ्खाचिङा लुयाचुचि, “हाओ गालिल लिङ्खामबेॽहा याॽमिचि, इजाङ् ताङ्खेङ्पोटि सोसाङ् येबिनेसिॽवाघा? लोप येसु इमिन वालोकपे तो चान्दाख्याना निसुम्गा, ङ्खाॽलामाङ् उङ् इलेन तामेॽना॥” याहुदागा साटो मात्तियास न्सेगुना ( मात्ति २७:३-१० ) 12 न्हाङा सेगुम्पाकचि जाइतुन बाङ्ना कोङ्गुभाङ् यारुसालेमबे न्लासा॥ न्ना यारुसालेमभाङ् ए किलोमिटारहिङ् माङ्दु साया॥ 13 ङ्खाचि यारुसालेमबे न्दायाब्याहोङ् पाङ्गा तोप्पारिक साधाइ उङ्चि वामाना कोठाबे न्थाङा॥ ङ्खाचि पात्तुरुस, युहान्ना, याकुब, आन्दिरियास, फिलिप, थोमा, बार्थोलोमाइ, मात्ति, आल्फायासका उच्या याकुब, खाम्युकभाक्ता न्लुना सिमोन, न्हाङा याकुबका उच्या याहुदा न्साया॥ 14 न्नाबे येसुगा उमा मारियाम, येसुगा उनुन्छाचि नुङ् हेकोहा मामुचि चा ङ्वाया॥ उङ्चि घाक एको निङ्वागा न्लेक्साहोङ् पार्थाना न्जोगामासा॥ 15 ङ्खिङ्बेला पात्तुरुस ए होम्बोक हिच्खेङ् हिङ् बिस्वासिचिगा उलुम्बे येबाहोङ् ङ्खाचि खाॽला लुचि, 16-17 “आफुआनुन्छा आनाआनुन्छाचि, याहुदा इस्कारियोत कानिङ्नुङ् माङ् वाया, न्हाङ् निङ्वाफुमागा सेवा चोक्माना जिम्मा चा तोक्तुक्सा॥ ङ्खाॽनिङ्गो उका उतुम्बे हाङ् दाउदका उयाभाङ् पाबित्तारा आत्मा ओन्दाङ्माङ् न्ना याॽमिङा येसु लाप्से ताखुबाचि इमिन तिक्त्वाचिहाभोङ् चेक्तामासा॥ ङ्खा धार्मासाप्लाबे छेप्ताहा चेॽया इमिन्होङ्चा पुरा लेङ्माहा साया॥” 18 (याहुदाङा इसिॽहा काम चोगुहोङ् उबुहा याङ्ङा एको रोपा इनु॥ न्नाबेॽमाङ् उङ् हुच्चेरेप चेप्तास्या, न्हाङा ओफोक पेगाहोङ् उहिरुॽवाचि घाक पाखा न्लोन्दाभोक्सा न्हाङ् स्या॥ 19 खा चेॽया यारुसालेमबेॽहा याॽमिचिङा था न्दोक्तुहोङ् न्ना रोपागा उनिङ् उङ्चि चेॽयाभाङ् “आखेल्दामा” ङ्युक्सु॥ न्नागा तुम्बिला ओम हेलिगा ओमेन्ङा इनाना रोपा)॥ 20 पात्तुरुसङा खाॽला लुचि, “इजाङ्बाङ्निङ् छेमगा छेप्तापपे खाॽला छेप्तामा, ‘न्ना वामाना ठोङ् लुङ्माहिम्हिम लेङ्नि’ न्हाङ् ‘न्नाबे इसा चा ङ्वानिन्नि’ न्हाङा ‘उका कामगा जिम्मा हेकोनाङा तोक्तुनि॥’ 21 “न्हाङामाङ् हाकु न्नागा साटोबे एको याॽमि सेगुम, न्ना याॽमि च्हेन, येसु कानिङ्नुङ् वायानिङ्, लामानिङ् कानिङ्नुङ् वाखुबा, 22 युहान्नाङा बाप्तिस्मा पिचिहा बेला नाहाङ्तो हाङ्बा येसु वालोक ख्याना बेला सोम्माहा चेॽया निखुबा आखुबा सानि॥ न्हाङा उङ् हाङ्बा येसु स्यानाभाङ् हिङ्गिलिक लेक्साना चेॽयागा कानिङ्नुङ् साचि लेङ्नि॥” 23 न्हाङामाङ् ङ्खाचिङा बार्साबास बाङ्ना योसेफ (उका हेकोना उनिङ् युस्तास चा साया) नुङ् मात्तियास न्नाबे न्दाचि॥ 24 न्हाङा उङ्चिङा खाॽला कासाङ् पार्थाना न्जोगा, “ओ घाक याॽमिगा निङ्वाबेॽहा चेॽया निखुबा हाङ्बा, खाचिबे न्दा इसा सेगुक्सुगाना कानिङ् सोॽमेता॥ 25 न्ना याॽमिङा कानिङ्नुङ् ङ्गा सेवागा काम चोक्मा यासुनि, इजाङ्बाङ्निङ् याहुदाङा च्हेन खा काम नासिहोङ् उङ् थेन्सिॽमाना लाम्बुमाङ् ख्यामा॥” 26 न्हाङा उङ्चिङा चिठ्ठा ङ्ङेन्दु, चिठ्ठा ङ्ङेन्दुनिङ् मात्तियासका उनिङ्बे आया॥ न्हाङा उङ् एए सेगुम्पाकचिबे थापाचोगा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.