३ युहान्ना 1 - याक्खा1 जेप्पा का आलुङ्मा तुक्नेन्ना काम्निभाक गायास, ना छेप्फा का छुम्वाङ्गा एल्डारङा छेप्मासिमेॽनेन्ना॥ 2 आलुङ्मा तुक्नेन्ना काम्निभाक, ङ्गा घाक चेॽयाबे उचुन लेङ्नि, न्हाङ् ङ्गा आत्मा लोॽवा न्सालुङ् चा निरोगि लेङ्नुङ्निभोङ् का पार्थाना चोङ्मेङ्ना॥ 3 न्दा जेप्पामाङ् सात्या चेॽयागा हेक्साङ् लाचोगागाहोङ् ङ्खाबेॽमाङ् चोन्सिॽमासिमेकाना बाङ्ना चेॽया इखिङ् फुनुन्छाचि न्दायाहोङ् का खेम्मेता॥ ङ्खा खेप्सुङ्होङ् का इब्बे-इब्बे चोन्दास्याङ्ना॥ 4 आका पिछाचि सात्यागा हेक्साङ् लान्जोक्मासिमेहा बाङ्ना चेॽया खेम्मा तोक्मानिङ् लेङ्माहा आनान्दा हाक्निङ् प्याक हेकोहा इहा चेॽयाङा आनान्दा पिॽमायामेहा? 5 आलुङ्मा तुक्नेन्ना काम्निभाक, न्दा बिस्वास योग्या लेक्साघोङ् इहा काम चोक्मासिमेका, ङ्खा घाक बिस्वासि फुनुन्छा नानुन्छाचिगा लागि चोक्मासिमेका॥ न्हाङ् मुक्खे च्हेन चिनायि न्दोक्तुन्चिगान्हा याॽमिचिगा चा सेवा चोक्मासिमेका॥ 6 उङ्चिङा छुम्वाङ्गा ओन्दाङ् न्दाबे वेॽना लुङ्मा तुक्माना निङ्वागा उतुम्बे योक्मेतामा॥ न्दा उङ्चिगा लागि लाम्बुबे चाहाचोक्माहा थोक्का तार्तुम्बि तोक्सुबिचिगा भोङ् उचुन लेङ्मेहा, खा चेॽया निङ्वाफुमाङा उसाप थाक्त्वाहा॥ 7 इजाङ्बाङ्निङ् बिस्वास मेन्जोक्खुबाचिभाङ् इहाचा मेन्दाप्ले हाङ्बागा सेवा चोक्मागा उङ्चि न्लाम्मासिमेहा॥ 8 कानिङ् बिस्वासिचिङा खाॽलाहा याॽमिचि फाॽमाहाचि॥ खाॽला फाॽमाचिमाङ् सात्यागा काम चोक्मा ओम॥ 9 खागा उतुम्बे का छुम्वाङ् एकोहिच्चि चेॽया छेम्नुङ्साॽनेनिन, ङ्खाॽनिङ्गो न्निङ्गा लुम्बे मा लेङ्मा योक्खुबा डियोतिरिफासङा आका चेॽया ङ्खेप्स्वान्हा॥ 10 का न्नाबे तामेङ्निङ् उङा आनिङ्गा बिरुद्दाबे इहा चोगुहा, इमिन्हा इसिॽहा चेॽया लुयाहा, ङ्खा घाक लुमेॽनेनिन्हा॥ न्ना आनिङ्गा बिरुद्दाबे इसिॽनुङ् चेङ्घोमे, ङ्खिङ्से मेन्ना न्नाङा बिस्वासिचि चा स्वागात न्जोग्वान्चिन॥ स्वागात चोक्माना निङ्वा चोक्खुबाचि चा चोक्मा म्बिवान्चिन, न्हाङ् ङ्खाचि छुम्वाङ्भाङ् लोन्धाक्स्वाचि॥ 11 का आलुङ्मा तुक्नेन्ना आनुन्छा, इसिॽहा चेॽया इसाभाङ् चा न्जिन्दान, ङ्खाॽनिङ्गो उचुन्हा चेॽया से चिन्दा॥ इसाङा उचुन्हा काम चोग्वा न्ना निङ्वाफुमागा याॽमि ओम, न्हाङ् इसाङा इसिॽहा काम चोग्वा न्नाङा निङ्वाफुमा चिनायि न्जोगुक्सुन्ना॥ 12 डेमेतिरियासका उतुम्बेको घाकङा उचुन्हा गाबाहि पियामा, न्हाङ् सात्या आफाइङा चा खा चेॽयागा गाबाहि पिमे॥ कानिङ् चा गाबाहि पिमेॽनेनिन, न्हाङ् आनिङ्गा गाबाहि जेप्पाहा बाङ्ना चेॽया न्दा था वान्ने॥ 13 न्दा लुॽमाहा चेॽया गो प्याक वान्ने, ङ्खाॽनिङ्गो छेप्माहोङ् मेन्ना, 14 का न्दानुङ् हानि तुप्माना आस युक्सुक्सुङ्, न्हाङ् कानिङ् तुबिहोङ् उचुन साला लेन्दि॥ 15 निङ्वाफुमागा हाङ्हाङ् न्दानुङ् वानि॥ नाबेॽहा घाक काम्निभाकचिङा चा न्दा सेवायो न्लुयामागा, न्हाङ् न्नाबेॽहा घाक काम्निभाकचि आका सेवायो लुताब्याङ्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.