२ तिमोथि 1 - याक्खा1 खिरिस्ट येसुबेॽना हिङ्लुङ्गा बाचागा उतुम्बे खेम्मेॽमागा निङ्वाफुमाङा खिरिस्टका सेगुम्पाक लेङ्मागा सेगाङ्ना का पावालङा, 2 आलुङ्मा तुक्नेन्ना आच्या तिमोथि, का ङ्गा लागि ना छेप्फा छेप्मासिमेङ्ना॥ निङ्वाफुमा पा नुङ् एङ्गा हाङ्बा येसु खिरिस्टङा न्दा आनुगाराहा, दाया नुङ् हाङ्हाङ् पिक्कानि॥ नुनिङ्वा नुङ् उत्हासागा चेॽया 3 आका पुर्खाचिङा न्जोगुहा लोॽवा का चा सुद्दा बिबेकङा निङ्वाफुमागा सेवा चोग्वाङ्, न्हाङा का पार्थाना चोङ्मेङ्निङ् साधाइ न्दा मिसाङ् निङ्वाफुमा नुनिङ्वा पिवाङ्ना॥ 4 ङ्गा म्मिॽवा मित्वाङ्निङ् लेॽनिसेॽनि न्दानुङ् तुप्मा मिमेङ्॥ न्दानुङ् तुप्मा तोक्तुङ्निङ्बि इखिङ् चोन्दास्याङ्बि॥ 5 न्दानुङ् वान्नेॽना न्ना जेप्पाना बिस्वास मित्वाङ्, ङ्खाॽलाना बिस्वास ओन्दाङ् म्मुम लोइस नुङ् म्मा युनिसपे वाया॥ न्हाङ् का था वान्ने, न्दाबे चा ङ्खाॽलाना बिस्वासमाङ् वान्नेॽना॥ 6 न्हाङामाङ् का लुमेॽनेन, न्दा छोङ्बे आमुक युक्सुङ्निङ् निङ्वाफुमाभाङ् तोक्तुगाना पिनिक्ला मितु, न्हाङा न्दा न्ना पिनिक्ला चालाचोगु॥ 7 इजाङ्बाङ्निङ् निङ्वाफुमाङा कानिङ् किसिॽमाना आत्मा मेन्ना, ङ्खाॽनिङ्गो साक्ति, लुङ्मा तुक्माना नुङ् आफाइ तायेनबे युङ्माना आत्मा पियामाहा॥ 8 न्हाङामाङ् एङ्गा हाङ्बा येसुगा गाबाहि पिॽमा नुङ् का उका उनिङ्बे छेक्पा लेक्साङ्ना चेॽयाबे ङ्ङोन्दास्यान, ङ्खाॽनिङ्गो न्दा चा नुसाला खेम्मेॽमागा लागि निङ्वाफुमागा साक्तिबे का लोॽवा तुखि आङ्मागा त्यार लेक्सा॥ 9 निङ्वाफुमाङामाङ् कानिङ् हिङ्मेताहोङ् उका पाबित्तारा याॽमि लेङ्से काया॥ कानिङ् चोगुम्हा कामङा मेन्ना, ङ्खाॽनिङ्गो कानिङ् उका चोक्मागा उका उनिङ्वाङा नुङ् आनुगाराहाङा हिङ्मेताहोङ् कायाहा ओम॥ उथुक हाक्निङ्चा ओन्दाङ् ना आनुगाराहा खिरिस्ट येसुभाङ् कानिङ् पियाहा ओम॥ 10 ङ्खाॽनिङ्गो न्ना आनुगाराहा कानिङ् मुक्ति पिखुबा येसु खिरिस्ट तायाहोङ् कानिङ्बे पार्काट चोगु॥ उङामाङ् सिमाना चेॽया नास चोगु, न्हाङा नुसालाभाङ् हेॽनिङ्चा मेन्सिमाना हिङ्लुङ् पार्काट चोगु॥ 11 निङ्वाफुमाङा का खा नुसाला खेम्मेखुबा सेगुम्पाक नुङ् चिन्खुबा लेङ्मागा सेगाङ्ना ओम॥ 12 न्हाङामाङ् का खा तुखि आङ्मासिमेङ्॥ ङ्खाॽनिङ्गो का खा चेॽयाबे ङ्ङोन्सिमेङान्ना, इजाङ्बाङ्निङ् का इसा बिस्वास चोगुक्सुङ् न्ना का था वान्ने॥ न्हाङा उङा का इहा जिम्मा पियामाङ्, ङ्खा चेॽया उङामाङ् उङ् लान्दाराॽमाना लेन सोम्मा जोगाचोगुनेस्वाहा बाङ्ना चेॽयाबे का ढुक्काइङाना॥ 13 का चिन्नेन्हा जेप्पाहा चेॽया पालाना चोगु, न्हाङ् हाङ्बा येसुबेॽना बिस्वास नुङ् लुङ्मा तुक्माना चेॽयाबे लाचोगामासा॥ 14 न्दा जिम्मा पिॽनेन्हा काम लाचोक्माहा जेप्पाहा चेॽया कानिङ्बे वाखुबा पाबित्तारा आत्मागा साक्तिङा उचुन युक्सुक्सु॥ 15 न्दा था वान्नेॽमाङ्, एसियाबे वाखुबा घाक काभाङ् माङ्दु न्लेक्सामा, ङ्खाचि माध्येबे फुगेलास नुङ् हार्मोगेनास चा ओम्चि॥ 16 ओनेसिफारासका पाङ्बेॽहा याॽमिचि हाङ्बाङा दाया चोगुचिनि, इजाङ्बाङ्निङ् का छेक्पाङ्बे आयामासाङ्निङ् उङ् प्याक खेप तुप्से तासाङ् का उत्साहा पियाङ्, न्हाङ् का छेक्पाङ्बे वायाङ्निङ्चा उङ् ङ्ङोन्दास्यान॥ 17 बुरु रोमबे तायाहोङ् सोलोक उङा ओक्खिपिक्खि योगाङ्होङ् का तुप्साङ्॥ 18 हाङ्बा तामाना लेनबे उङा हाङ्बाभाङ् आनुगाराहा तोक्तुनि॥ का एफिसासपे वायाङ्निङ्चा उङा प्याक चेॽयाबे फातामासाङ्ना न्दा था वान्ने॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.