२ थेस्लोनिकि 1 - याक्खा1 एङ्गा निङ्वाफुमा पा नुङ् हाङ्बा येसु खिरिस्टपे बिस्वास चोक्खुबा थेस्लोनिकेबेॽना छुम्वाङ्गा लागि कानिङ् पावाल, सिलास नुङ् तिमोथिङा ना छेप्फा छेप्मासिइवाङ्॥ 2 एङ्गा निङ्वाफुमा पा नुङ् हाङ्बा येसु खिरिस्टङा न्निङ्दा आनुगाराहा नुङ् हाङ्हाङ् पिइगानि॥ सातावाट्पे उत्साहा 3 आफुआनुन्छा आनाआनुन्छाचि, न्निङ्गा लागि कानिङ् निङ्वाफुमा साधाइ नुनिङ्वा पिॽमामाङ् पोर्ने ओम, न्हाङ् खाॽला नुनिङ्वा पिॽमा थेन्दिसिॽवा चा, इजाङ्बाङ्निङ् न्निङ्गा बिस्वास नुङ् एकोङा हेकोना लुङ्मा तुक्खुसाचामाना चेॽया न्निङ्दाबे पुसाङ् खेॽमासिम्मे॥ 4 ङ्खोङ्माङ् सातावाट नुङ् तुखि आङ्मा यामाना न्निङ्गा साक्ति नुङ् न्निङ्गा बिस्वासका उतुम्बे निङ्वाफुमागा हेकोहा छुम्वाङ्चिबे चा कानिङ् नाभुक माडा चोक्साङ् चेक्मा यासिॽवाङ्हा॥ 5 निङ्वाफुमाङा घाक याॽमिचिगा निरिक तो-मो मेन्जोक्ले उचुन चोग्वाहा बाङ्ना चेॽयागा पार्मान खा चेॽयाङा पिमेहा॥ न्निङ्दा निङ्वाफुमागा राज्यागा लागि योग्या लेक्सानि, ङ्खागा लागिमाङ् न्निङ्दा तुखि आङ्मासिइवागा॥ 6 निङ्वाफुमा निरिक चोक्खुबा ओम्होङ्माङ् न्निङ्दा तुखि पिखुबाचि उङा तुखि पिवाचिहा॥ 7 उङा न्निङ्दा तुखि आङ्खुबाचि फोक्सिॽवागा न्हाङ् उङा कानिङ् चा फोङ्मेहा॥ खा घाक च्हेन हाङ्बा येसु वालोकपाहाङ् उका साक्तिसालि वालोक्दुतचिनुङ् मिलेपपे तामेॽनिङ् चोग्वाहा॥ 8 उङा निङ्वाफुमा चिनामेन्जोक्खुबाचि नुङ् एङ्गा हाङ्बा येसु खिरिस्टका नुसाला मेयेन्खुबाचि दान्डा पिवाचि॥ 9 ङ्खाचिङा तोक्माहा दान्डा च्हेन ङ्खाचि हाङ्बागा साक्तिसालि माहिमा नुङ् उका साङ्गातिभाङ् न्लोन्हाङ्मे, न्हाङा साधाइगा लागि नास न्जोङ्मेहा॥ 10 खा चेॽया हाङ्बा येसु तामाना लेन लेङ्मेहा॥ न्ना लेन हाङ्बा येसुङा उका पाबित्तारा याॽमिचि नुङ् घाक बिस्वासिचिभाङ् आदार नुङ् माहिमा तोक्त्वा॥ न्निङ्दा चा ङ्खाचिनुङ् वाइवाघा, इजाङ्बाङ्निङ् न्निङ्दा कानिङ् लुॽनेनिन्हा चेॽयाबे बिस्वास चोगुम्गा॥ 11 न्हाङामाङ् निङ्वाफुमाङा न्निङ्दा इगा लागि काइमिगा, ङ्खागा लागि योग्या चोगिगानि न्हाङा उका साक्तिङा घाक उचुन्हा काम चोक्माना निङ्वा नुङ् बिस्वासका काम पुरा चोक्मा फातिगानिभोङ् कानिङ् साधाइ पार्थाना चोगिॽवाङ्हा॥ 12 ङ्खाॽला लेक्साभोङ् एङ्गा हाङ्बा येसुगा आदार लेङ्मे न्हाङा उङ्भाङ् न्निङ्गा चा आदार लेङ्मेहा, इजाङ्बाङ्निङ् न्निङ्दा निङ्वाफुमा पा नुङ् हाङ्बा येसुभाङ् आनुगाराहा तोक्तुक्सुम्गा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.