२ पात्तुरुस 1 - याक्खा1 येसु खिरिस्टका सेवाक नुङ् सेगुम्पाक का सिमोन पात्तुरुसङा, ना छेप्फा एङ्गा निङ्वाफुमा नुङ् मुक्ति पिखुबा येसु खिरिस्टका धार्मिक्ताभाङ् आनिङ्गा लोॽवाना इम्मायि मेयामाना बिस्वास तोक्खुबा न्निङ्दा घाक छेप्मासिमेॽनेनिन्हा॥ 2 न्निङ्दा निङ्वाफुमाङा प्याक आनुगाराहा नुङ् हाङ्हाङ् पिइगानि, इजाङ्बाङ्निङ् न्निङ्दा निङ्वाफुमा नुङ् एङ्गा हाङ्बा येसु खिरिस्ट चिनाचोग्वाम्गा॥ बिस्वासपे पुसाङ् खेॽमाहा उतुम्बे 3 पाबित्तारा हिङ्लुङ् हिङ्मागा चाहाचोक्माहा घाक चेॽया निङ्वाफुमागा साक्तिभाङ्माङ् तोक्तुक्सुम, इजाङ्बाङ्निङ् उका माहिमा नुङ् भालाइभाङ् काखुबा निङ्वाफुमा कानिङ् चिना चोगुक्सुम॥ 4 न्ना माहिमा नुङ् भालाइ भाङ्माङ् उङा कानिङ् इन्मा मेयामाहा नुङ् माम्माहा बाचा पियामा॥ न्निङ्दा ना कायुङ्लेनबेॽहा नास चोक्खुबा इसिॽहा चेॽयाभाङ् लोन्दिघोङ् निङ्वाफुमागा स्वाभाबका साहाभागि लेक्सिगानिभोङ् खा बाचा पिइघा ओम॥ 5 न्हाङामाङ् यासुम्गानुङ् न्निङ्गा बिस्वासपे उचुन्हा चेॽया थापाचोक्साङ् खेॽमागा बोल चोगामासानि॥ न्हाङा इहा उचुन्हा ङ्खा चोगुम्घोङ् ग्यान पुसानुम॥ 6 ग्यानबे आफाइ तायेनबे वामाहा चेॽया थापाचोगानुम, ङ्खाबे धाइर्या, धाइर्याबे भाक्ति, 7 भाक्तिबे फुनुन्छाचि चोक्माहा दाया, फुनुन्छाचि चोक्माहा दायाबे लुङ्मा तुक्खुसाचामाहा चेॽया थापाचोगानुम॥ 8 इजाङ्बाङ्निङ् न्निङ्दाबे वामा पोर्ने चेॽया खामाङ् ओम॥ खाॽलाहा चेॽया न्निङ्दाबे प्याक वान्नेहाभोङ् न्निङ्दा चिनाचोगुम्गाना येसु खिरिस्टपे प्याक काम लाचोक्खुबा नुङ् उसा केङ्खुबा लेक्सिॽवाघा॥ 9 ङ्खाॽनिङ्गो खा चेॽया मेवाखुबा याॽमिचि च्हेन माङ्दुहा चेॽया मेनिखुबा नुङ् मिक्सुरुम्बा लोॽवा न्सामेहा॥ ङ्खाचिङा ओन्दाङ्हा उङ्चि पाप पाहाङ् सुद्दा न्लेक्साहा चेॽया म्मुन्दिनेस्वा॥ 10 न्हाङामाङ् आफुआनुन्छा आनाआनुन्छाचि, निङ्वाफुमाङा न्निङ्दा काइघा नुङ् सेगिघा चेॽया जेप्पा ओम बाङ्ना था तोक्मागा हाकुचा जागारिलो लेक्सानि॥ खाॽला चोगिगाभोङ् न्निङ्गा बिस्वास हेॽनिङ्चा म्मासिॽवाम्गान्ना॥ 11 खाॽला एङ्गा हाङ्बा नुङ् मुक्ति पिखुबा येसु खिरिस्टका साधाइभोरि वान्नुङ्खुबा राज्याबे न्निङ्दा इब्बे-इब्बे स्वागातनुङ् उमा तोक्त्वाम्गाना॥ 12 खा घाक चेॽया न्निङ्दा था वान्ने, न्हाङ् न्निङ्दा तोक्तुम्गाना सात्याताबे चात्तु लेक्सिमिगा, ङ्खोङ्चा खा चेॽया न्निङ्दा साधाइ साम्झा चोङ्मेॽनेनिन्हा॥ 13 का हिङ्ङानुङ् सोम्मा खा चेॽया न्निङ्दा साम्झा चोङ्नुङ्मा उचुन एमेङ्, 14 इजाङ्बाङ्निङ् ना आका खामगा सालुङ् नाॽनामाना बेला ताहेक्साना बाङ्ना चेॽया हाङ्बा येसु खिरिस्टङा का सोॽमेतियामाङ्हा॥ 15 का सिङ्खेॽङाहोङ्चा खा चेॽया म्मुन्दिम्गान्निभोङ् का यासुङ्नुङ् सोम्मा साधाइ न्निङ्दा लुन्नुङ्मेॽनेनिन्हा॥ खिरिस्टका माहिमागा साचि 16 एङ्गा हाङ्बा येसु खिरिस्ट माडा माहिमा नुङ् साक्तिबे फेरि तामेॽना बाङ्ना चेॽया याॽमिचिङा उङ्चि निङ्वा ङ्ङेन्दुहोङ् न्जोगुहा केङ्ताप्लिक लोॽवा कानिङ् चोगुम्ङाहोङ् लुॽनेनिन्हा मेन्ना॥ कानिङ् आनिङ्गा मिकङा उका माडा माहिमा निसुम्ङा॥ 17 उङा निङ्वाफुमा पाभाङ् आदार नुङ् माहिमा तोक्तु, न्हाङ् माडा माहिमाभाङ्, “ना का लुङ्मा तुक्तुङ्ना आच्या ओम, नानुङ् का तुक्नुङ् चोन्दास्यामाङ्ना” बाङ्ना सेम्ला तायानिङ् कानिङ् न्नाबे वाइङ्॥ 18 कानिङ् उङ्नुङ् पाबित्तारा कोङ्गुबे वाइङ्निङ् वालोकपाहाङ् तायाना ना सेम्ला कानिङ् आफाइङा खेप्सुम्ङा॥ 19 न्हाङामाङ् निङ्वाफुमाभाङ् चेक्खुबाचिङा पार्चार न्जोगुहा चेॽयाबे हाकुचा जेप्पा ओमभोङ् भोरोसा युक्स्वाम्ङा॥ न्निङ्दा खा चेॽयाबे निङ्वा पिम्गाभोङ् उचुन लेङ्मेहा, इजाङ्बाङ्निङ् ङ्खाङा न्ना लेन मेन्दाले सोम्मा नुङ् न्निङ्गा निङ्वाबे भेनिक्ना चोक्चोकिगा ओम्ना चाम्का मेन्जोक्ले सोम्मा कुइम्नाबे हान्दुना कुप्पिगा काम चोग्वाहा॥ 20 ङ्खाॽनिङ्गो धार्मासाप्लाबे निङ्वाफुमाभाङ् चेक्खुबाचिङा ङ्गायाहा चेॽया च्हेन याॽमि आफाइङा उङ्चिगा बुद्दिभाङ् ङ्गायाहा ओमभोङ् म्मितानुम्निन, 21 इजाङ्बाङ्निङ् निङ्वाफुमाभाङ् चेक्खुबाचिङा ङ्गायाहा चेॽया याॽमिगा निङ्वाभाङ् तायाहा मेन्हा, ङ्खाॽनिङ्गो ङ्खा चेॽया न्जेक्तुनिङ् ङ्खाचि पाबित्तारा आत्मागा तायेनबे ङ्वायाहोङ् न्जेक्तुहा ओम॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.